Read Ariun Bible 2013 – Ариун Библи 2013 Иошуа 21 Bible Online

Иошуа 21 - Ariun Bible 2013 – Ариун Библи 2013 bible

Иошуа 21

¹Тэгтэл левичүүдийн бүлийн тэргүүнүүд нь тахилч Елеазар, Нуны хүү Иошуа болон Израилийн хөвгүүдийн бусад овгийн бүлийн тэргүүнүүд дээр

²Канаан нутгийн Шилод ирж, тэдэнд хандан —ЭЗЭН бидэнд амьдран суух хотуудыг мал сүргийн бэлчээрийг нь оролцуулан өгөхийг Мосегоор дамжуулан тушаасан билээ гэв.

³Тийнхүү ЭЗЭНий тушаал ёсоор Израилийн хөвгүүд өөрсдийнхөө өвөөс левичүүдэд эдгээр хотуудыг, бэлчээр нутагтай нь хамт өглөө.

⁴Эхний шавга нь кохатчуудын урагт буув. Иуда, Симеон, Бениамин овгуудаас арван гурван хотыг шавгаар тахилч Аароны үр удам болох левичүүд хүлээн авав.

⁵Ефраим, Дан болон Манассегийн хагас овгийн ургаас арван хотыг шавгаар Кохатын үлдсэн хөвгүүд хүлээн авлаа.

⁶Иссахар, Ашер, Нафтали овгуудын ургаас болон Башан дахь Манассегийн хагас овгийн ургаас арван гурван хотыг шавгаар Гершоны хөвгүүд хүлээн авав.

⁷Реубен, Гад, Зебулун овгуудаас арван хоёр хотыг Мерарийн хөвгүүд ургуудынхаа дагуу авав.

⁸Ингээд ЭЗЭНээс Мосегоор дамжуулан тушаасан ёсоор Израилийн хөвгүүд левичүүдэд эдгээр хотуудыг бэлчээртэй нь шавгаар өглөө.

⁹Тэд Иуда овог болон Симеоны хөвгүүдийн овгоос дараах нэрээрээ дурдагдсан хотуудыг өгсөн бөгөөд

¹⁰Левийн хөвгүүдэд, кохатчуудын ургийнхны Аароны үр удамд эдгээр нь ногдсон юм. Учир нь эхний шавга тэдэн дээр буусан билээ.

¹¹Ингээд тэд Иудагийн уулан дахь Кириат-арбаг (энэ нь Хеброн) эргэн тойрных нь бэлчээрийн хамт тэдэнд өгөв. Арба бол Анакийн өвөг эцэг юм.

¹²Гэхдээ хотод харьяалагдах тариалангийн талбай болон тосгодыг нь тэд Иефуннегийн хүү Калебт өмч болгон өглөө.

¹³Тийнхүү тахилч Аароны хөвгүүдэд тэд хүн алсан хэрэгтнүүдийн хоргодох хот болох Хеброныг бэлчээртэй нь, Либнаг бэлчээртэй нь,

¹⁴мөн Иаттир хотыг бэлчээртэй нь, Ештемоа хотыг бэлчээртэй нь,

¹⁵Холоныг бэлчээртэй нь Дебирийг бэлчээртэй нь,

¹⁶Аиныг бэлчээртэй нь, Иуттаг бэлчээртэй нь, Бет-шемешийг бэлчээртэй нь хамт нийт есөн хотыг дээрх хоёр овгоос өгөв.

¹⁷Бениамин овгоос Гибеон хотыг бэлчээртэй нь, Гебаг бэлчээртэй нь,

¹⁸Анатотыг бэлчээртэй нь, Алмоныг бэлчээртэй нь хамт нийт дөрвөн хотыг өгөв.

¹⁹Аароны хөвгүүд болох тахилч нарын бүх хот нь бэлчээрүүдийнхээ хамт нийлээд арван гурван хот байлаа.

²⁰Дараа нь Ефраим овгоос Кохатын хөвгүүдийн ургийн левичүүдэд буюу Кохатын үлдсэн хөвгүүдэд хотуудыг хуваарилан өгөв.

²¹Ефраимын уулархаг нутаг дахь хүн алсан хэрэгтнүүдийн хоргодох хот болох Шехемийг бэлчээртэй нь, Гезерийг бэлчээртэй нь,

²²мөн Кибзаим хотыг бэлчээртэй нь, Бет-хороныг бэлчээртэй нь хамт нийт дөрвөн хотыг тэдэнд өгөв.

²³Дан овгоос Елтеке хотыг бэлчээртэй нь, Гиббетоныг бэлчээртэй нь,

²⁴Аиалоныг бэлчээртэй нь, Гат-риммоныг бэлчээртэй нь хамт нийт дөрвөн хотыг өгчээ.

²⁵Манассегийн хагас овгоос Таанахыг бэлчээртэй нь, Гат-риммоныг бэлчээртэй нь хамт нийт хоёр хотыг тэдэнд хуваарилан өгөв.

²⁶Кохатын үлдсэн хөвгүүдэд өгсөн бүх хотууд бэлчээртэйгээ нийтдээ арав байлаа.

²⁷Мөн Манассегийн хагас овгоос тэд левичүүдийн ургийн нэг болох Гершоны хөвгүүдэд алуурчдын хоргодох хот болох Башан дахь Голаныг бэлчээртэй нь, Бе-ештераг бэлчээртэй нь хамт нийт хоёр хотыг өгөв.

²⁸Иссахар овгоос тэд Кишионыг бэлчээртэй нь, Дабератыг бэлчээртэй нь

²⁹мөн Иармутыг бэлчээртэй нь, Ен-ганнимыг бэлчээртэй нь хамт нийт дөрвөн хотыг өглөө.

³⁰Ашер овгоос тэд Мишалыг бэлчээртэй нь, Абдоныг бэлчээртэй нь

³¹мөн Хелкатыг бэлчээртэй нь, Рехобыг бэлчээртэй нь хамт нийт дөрвөн хотыг тэдэнд өгөв.

³²Нафталийн овгоос хүн алсан хэрэгтний хоргодох хот болох Галил дахь Кедешийг бэлчээртэй нь мөн Хаммот-дорыг бэлчээртэй нь, Картаныг бэлчээртэй нь хамт нийт гурван хотыг өгөв.

³³Гершончуудын ургуудад ногдсон бүх хот нь бэлчээртэйгээ бүгд арван гурав байлаа.

³⁴Зебулун овгоос тэд Мерарийн хөвгүүдийн ургуудад буюу үлдсэн левичүүдэд Иокнеамыг бэлчээртэй нь, Картаг бэлчээрийнх нь хамт

³⁵мөн Димнаг бэлчээртэй нь, Нахалалыг бэлчээрийнх нь хамт нийт дөрвөн хотыг өгөв.

³⁶Реубен овгоос тэд Безерийг бэлчээртэй нь Иахазыг бэлчээртэй нь,

³⁷Кедемотыг бэлчээртэй нь, Мефаатыг бэлчээртэй нь хамт бүгд дөрвөн хотыг өгөв.

³⁸Гад овгоос тэд, алуурчдын хоргодох хот болох Гилеад дахь Рамотыг бэлчээртэй нь мөн Маханаимыг бэлчээртэй нь,

³⁹Хешбон хотыг бэлчээртэй нь, Иазерыг бэлчээртэй нь хамт нийт дөрвөн хотыг өгөв.

⁴⁰Эд бүгд левичүүдийн ургийн үлдэгдэл болох Мерарийн хөвгүүдийн урагт шавгаар буусан хотууд байсан бөгөөд нийт арван хоёр хот байлаа.

⁴¹Израилийн хөвгүүдийн эзэмшлийн дундах левичүүдийн хотууд нийтдээ дөчин найман эдлэн бэлчээртэй хот байв.

⁴²Эдгээр хот тусбүр эргэн тойрондоо эдлэн бэлчээртэй байжээ. Бүх хот ийм байв.

⁴³Ийнхүү өвөг дээдэст нь өгөхөөр амласан бүх нутгийг ЭЗЭН, Израильд өгсөн ба тэд түүнийг эзэмшин, тэндээ суурьшин амьдрав.

⁴⁴Мөн тэдний өвөг дээдэст нь амласан бүхнийхээ дагуу ЭЗЭН тэдэнд бүх талаар амар амгаланг өгсөн бөгөөд тэдний дайснуудаас нь хэн ч тэдний өмнө сөрөн зогсоогүй юм. ЭЗЭН бүх дайсныг нь тэдний гарт өгөв.

⁴⁵Израилийн гэрт ЭЗЭНий өгсөн сайн амлалтуудын нэг нь ч талаар эс болж бүгд биелэв.