Read Ariun Bible 2013 – Ариун Библи 2013 1Тимот 3 Bible Online

1Тимот 3 - Ariun Bible 2013 – Ариун Библи 2013 bible

1Тимот 3

¹Энэ бол итгэмжит үг. Хэрэв хэн нэгэн нь харгалзагч болохыг эрмэлзвэл, тэр сайн ажил хүсэж байна.

²Тиймээс харгалзагч нь өө сэвгүй, нэг эхнэрийн нөхөр,[3] биеэ барьдаг, хэрсүү, хүндэтгэгдсэн, зочломтгой ба заах чадвартай,

³дарсанд үл шимтэгч, зодоонч биш, харин дөлгөөн, хэрүүлч бус, мөнгөнд шуналгүй,

⁴өөрийн гэрийг сайн захирдаг, бүхий л хүндлэл дор хүүхдүүдээ захирдаг байх ёстой.

⁵(Хэрэв хэн нэгэн өөрийн гэрийг захирч мэдэхгүй бол хэрхэн Бурханы чуулганыг халамжлах билээ?)

⁶Шинэ итгэгч байж болохгүй. Эс бөгөөс биеэ тоон диаволын шүүлтэд унах вий.

⁷Тэрээр буруутгалд хийгээд диаволын урхинд орчихгүйн тулд гадна байгсдын зүгээс сайн гэрчлэлтэй байх ёстой.

⁸Үүнчлэн үйлчлэгчид хүндтэй, хоёрдмол үгтэй бус, дарсанд шунадаггүй, эдийн шуналгүй,

⁹итгэлийн нууцыг цэвэр мөс чанараар сахидаг байх ёстой.

¹⁰Эхлээд тэд шалгагдаг. Тэгээд гэм зэмгүй аваас үйлчлэг.

¹¹Түүнчлэн эмэгтэйчүүд[4] хүндтэй, гүтгэгч бус, тэвчээртэй, бүгдэд итгэмжтэй байх ёстой.

¹²Үйлчлэгчид нь нэг эхнэрийн нөхөр,[5] хүүхдүүдээ болон гэр бүлээ сайн захирдаг байг.

¹³Учир нь онц үйлчилсэн нь сайн байр суурь ба Христ Есүс дэх итгэлдээ үлэмж зоригийг олж авдаг.

¹⁴Удахгүй чам дээр очно гэж найдан, эдгээрийг би бичиж байна.

¹⁵Хэрэв би саатвал, үнэний багана ба суурь болсон амьд Бурханы чуулган болох Бурханы гэр бүл дотор хэрхэн биеэ авч явах учиртайг чи мэдэх ёстой.

¹⁶Итгэл сүсгийн нууц агуу нь эргэлзээгүй. Махбодоор илчлэгдсэн Тэр Сүнс дотор зөвтгөгдсөн[6]. Тэнгэрэлч нарт үзэгдсэн Тэр Харийнханд ч тунхаглагдсан. Ертөнцөд итгэгдсэн Тэр Сүр алдраар дээш авагдсан.