Read Ariun Bible 2013 – Ариун Библи 2013 Еврей 3 Bible Online

Еврей 3 - Ariun Bible 2013 – Ариун Библи 2013 bible

Еврей 3

¹Тиймд тэнгэрлэг дуудлагыг хуваалцагч ариун ах дүү нар аа, бидний хүлээн зөвшөөрдөг Элч ба Тэргүүн Тахилч болох Есүсийг ажицгаа.

²Түүний [бүх] гэрт Мосе итгэмжит байсны адил Тэр Өөрийг нь томилсон Нэгэнд итгэмжит байсан юм.

³Учир нь барилгачин барилгаасаа илүү хүндэтгэл хүлээдгийн адил Мосегээс илүү их алдрыг Тэр хүртэх зохистойд тооцогдсон юм.

⁴Учир нь аливаа барилга хэн нэгнээр баригддаг. Харин бүх юмсыг барьсан нь Бурхан мөн.

⁵Учир нь хожим яригдах ёстой гэрчлэлийн төлөө Мосе үйлчлэгчийн хувьд Түүний бүх гэрт итгэмжит байсан.

⁶Харин Христ, Хүүгийн хувьд Түүний гэрт итгэмжит юм. Бид зориг болон найдварын сайрхалаа эцэс хүртэл бат сахиваас бид Түүний гэр болой.

⁷Тиймээс Ариун Сүнсний хэлсэнчлэн болжээ. “Өнөөдөр та нар Түүний дууг сонсвол,

⁸Цөл дэх сорилтын өдрийн тэрслэл дэх шиг Та нар зүрхээ бүү хатууруул.

⁹Үйлсийг минь дөчин жил харсан хэрнээ Эцгүүд чинь Намайг сорьсон.

¹⁰Тиймд Би тэр үеийнхэнд уурлаж, «Тэд зүрхэндээ үргэлж төөрөлддөг Тэд замуудыг минь мэдсэнгүй» гэж хэлээд,

¹¹Тиймээс Би хилэн дотроо «Миний амралтад тэд эс орно» гэж андгайлав” гэсэн байдаг.

¹²Ах дүү нар аа, та нараас хэн нэг нь ёрын, итгэлгүй зүрхтэй байж, амьд Бурханаас салах вий хэмээн болгоомжлогтун.

¹³Харин “өнөөдөр” гэгдэж л байгаа бол бие биенээ өдөр бүр зоригжуулагтун. Эс бөгөөс та нараас хэн нэгэн чинь нүглийн мэхлэлээр хатуурах вий.

¹⁴Учир нь бид итгэлийнхээ эхлэлийг эцсээ хүртэл бат сахиваас Христийн хуваалцагчид болсон байна.

¹⁵Энэ нь “Өнөөдөр та нар Түүний дууг сонсвол, Тэрслэл дэх шиг зүрхээ бүү хатууруул” гэсэнчлэн юм.

¹⁶Сонссон атал тэрсэлсэн нь хэн билээ? Үнэндээ Мосегийн дор Египетээс гарсан тэд бүгдээрээ биш гэж үү?

¹⁷Тэр дөчин жилийн турш хэнд хилэгнэв? Нүгэл үйлдэж, цөлд бие нь унагсдад биш үү?

¹⁸Өөрийнхөө амралтад эс оруулна гэж Тэр хэнд андгайлсан бэ? Дуулгаваргүй байсан тэдэнд биш үү?

¹⁹Итгэлгүй учир тэд орж чадаагүйг бид хардаг.