Read Ariun Bible 2013 – Ариун Библи 2013 Шүүгчид 11 Bible Online

Шүүгчид 11 - Ariun Bible 2013 – Ариун Библи 2013 bible

Шүүгчид 11

¹Гилеад хүн Иефта нь эрэлхэг хүчит дайчин боловч янхны хөвгүүн байв. Гилеад, Иефтагийн эцэг байжээ.

²Гилеадын эхнэр ч түүнд хөвгүүдийг төрүүлэв. Тэр эхнэрийн хөвгүүд өсөж өндийгөөд Иефтаг хөөж, түүнд —Чи өөр эмийн хөвгүүн тул бидний эцгийн гэр чамд юу ч өвлүүлэхгүй гэв.

³Ийнхүү Иефта өөрийн ах дүүсээс дайжин зугтаж Тобын нутагт амьдрах болжээ. Үл бүтэх хүмүүс Иефта уруу цуглаж түүний хамт явав.

⁴Хэсэг хугацааны дараа Аммоны хөвгүүд Израилийн эсрэг дайтлаа.

⁵Аммоны хөвгүүд Израилийн эсрэг тулалдахад Гилеадын ахмадууд Иефтаг Тобын нутгаас авчрахаар явжээ.

⁶Тэд Иефтад —Ирж, биднийг Аммоны хөвгүүдийн эсрэг тулалдахад бидний жанжин бологтун гэж ятган хэлсэнд

⁷Иефта Гилеадын ахмадуудад —Намайг үзэн ядаж, эцгийн минь гэрээс хөөж гаргасан улс та нар биш бил үү? Одоо зовлонд орохоороо та нар яагаад над уруу ирэх болов? гэв.

⁸Гилеадын ахмадууд Иефтад —Чи бидэнтэй явж Аммоны хөвгүүдтэй тулалдвал Гилеадын бүх оршин суугчдын тэргүүн болно шүү дээ. Иймээс л бид чам уруу ирлээ гэв.

⁹Тэр Гилеадын ахмадуудаас —Хэрэв та нар намайг Аммоны хөвгүүдтэй тулалдуулахын тулд буцаан авч, ЭЗЭН тэднийг миний гарт өгвөл би үнэхээр та нарын тэргүүн болох уу? гэж асуусанд

¹⁰Гилеадын ахмадууд Иефтад —Бид чиний хэлснийг эс үйлдвэл ЭЗЭН бидний хооронд гэрч болог гэв.

¹¹Тэгээд Иефта Гилеадын ахмадуудын хамт явж, ард олон түүнийг өөрсдийн тэргүүн бөгөөд жанжин болгов. Иефта Мизпад өөрийн хамаг үгийг ЭЗЭНий өмнө хэлэв.

¹²Иефта Аммоны хөвгүүдийн хаанд элч нарыг илгээж —Миний газар нутгийн эсрэг дайтахаар миний эсрэг ирэх юу чи бид хоёрын дунд болсон юм бэ? гэж хэлүүлсэнд

¹³Аммоны хөвгүүдийн хаан Иефтагийн элч нарт хариулж —Израиль Египетээс гарч ирэхдээ Арнонаас Иаббок хүртэлх мөн Иорданыг хүртэлх миний нутгийг авсан билээ. Тиймээс одоо эдгээр газар нутгийг энх тайвнаар буцааж өг гэжээ.

¹⁴Иефта Аммоны хөвгүүдийн хаанд дахин элч нарыг илгээж,

¹⁵түүнд Иефта ийнхүү хэлүүлжээ. “Моабын газрыг ч, Аммоны хөвгүүдийн нутгийг ч Израиль аваагүй.

¹⁶Харин Израиль Египетээс гарч, Улаан тэнгис хүртэл цөлийг туулан явж Кадешт ирэхдээ

¹⁷Едомын хаанд элч нар илгээн «Биднийг өөрийнхөө газраар нэвтрүүлээч гэж гуйж байна» гэсэн боловч Едомын хаан сонсоогүй. Тэд түүнчлэн Моабын хаанд элч нарыг илгээсэн боловч тэр ч бас зөвшөөрөөгүй. Ингээд Израиль Кадешт үлдсэн юм.

¹⁸Дараа нь тэд цөлийг туулан Едом болон Моабын газрыг тойрч Моабын нутгийн зүүн талаас нь ирж, Арноны цаана буудаллав. Гэвч Арнон нь Моабын хил тул тэд Моабын газар нутагт орсонгүй.

¹⁹Израиль бээр Хешбоны хаан, аморичуудын хаан Сихонд элч нарыг илгээн «Биднийг газар нутгаараа дамжин өнгөрүүлнэ үү? Өөрсдийн газарт очих гэсэн юм» хэмээн хэлүүлсэн боловч,

²⁰Сихон Израильд үл итгэн өөрийн газар нутгаар өнгөрүүлэлгүй бүр бүх ард түмнээ цуглуулж Иахазад хуарагнан Израилийн эсрэг тулалдсан юм.

²¹Тэгэхэд Израилийн Бурхан ЭЗЭН, Сихон болон түүний бүх ард түмнийг Израилийн гарт тушаан өгсөнд Израиль тэднийг цохив. Ингэж л Израиль тэндхийн уугуул оршин суугчид болох аморичуудын бүх нутгийг эзэмшилдээ авсан билээ.

²²Ийнхүү тэд Арнонаас Иаббокийг хүртэлх мөн цөлөөс Иорданыг хүртэлх аморичуудын бүх нутаг дэвсгэрийг эзэмшсэн юм.

²³Израилийн Бурхан ЭЗЭН Өөрийн ард түмэн болох Израильд аморичуудыг хөөн зайлуулж өгсөн атал одоо чи биднийг зайлуулна гэж үү?

²⁴Чиний бурхан Хемош чамд хэнийг зайлуулж өгнө түүнийг нь л чи эзэмшдэг бус уу? Тиймээс бидний Бурхан ЭЗЭН бидний өмнөөс хэнийг хөөн зайлуулна тэдний нутгийг бид эзэмших болно.

²⁵Чи Зиппорын хөвгүүн Моабын хаан Балакаас илүү юү? Балак Израильтай тэмцсэн юмуу тэдэнтэй дайн өдөөсөн удаа байна уу?

²⁶Израилийг Хешбон ба түүний харьяа суурин, Ароер ба түүний харьяа гацаа болон Арнон голын эргийн дагуух бүх хотуудад гурван зуун жилийн турш оршин суух хугацаанд яагаад үүнийгээ та нар израильчуудаас буцааж аваагүй юм бэ?

²⁷Би чиний эсрэг нүгэл үйлдээгүй. Миний эсрэг дайн өдөөснөөрөө чи надад буруу зүйл хийж байна. Шүүгч болох ЭЗЭН өнөөдөр Израилийн хөвгүүд болон Аммоны хөвгүүдийн хоорондохыг шүүх болтугай” гэж хэлүүлжээ.

²⁸Харин өөрт нь илгээсэн Иефтагийн үгийг Аммоны хөвгүүдийн хаан сонссонгүй.

²⁹ЭЗЭНий Сүнс Иефта дээр байсанд тэрээр Гилеад болон Манассегаар өнгөрч гараад, Гилеадын Мизпагаар дайран Гилеадын Мизпагаас цааш Аммоны хөвгүүд уруу хөдлөв.

³⁰Иефта, ЭЗЭНд андгайлан —Хэрэв Та Аммоны хөвгүүдийг үнэхээр миний гарт өгвөл

³¹Аммоны хөвгүүдээс намайг амар мэнд буцаж ирэх үед гэрийн минь хаалгаар угтан гарч ирэх хэн ч бай тэр ЭЗЭНийх байг. Түүнийг би шатаалт тахил болгон өргөнө гэж хэлэв.

³²Ингээд Иефта Аммоны хөвгүүдтэй тулалдахаар гол гатлав. ЭЗЭН тэднийг Иефтагийн гарт тушаалаа.

³³Иефта тэднийг Ароераас Миннит хүртэл цохиж хорин хот бас Абел-керамимын чанадад хүртэл довтлон маш том ялагдал хүлээлгэв. Ийнхүү Аммоны хөвгүүд Израилийн хөвгүүдийн өмнө бөхийв.

³⁴Иефта Мизпа дахь гэртээ ирэхэд, харагтун, охин нь хэнгэрэг дуугарган бүжиглэсээр түүнийг угтан гарч ирэх нь тэр. Иефтад түүнээс өөр хөвгүүн ч, охин ч байхгүй, тэр түүний цорын ганц охин нь байсан ажээ.

³⁵Иефта охиноо хармагц хувцсаа урж тастан —А-яа, охин минь! Надад чи асар их гаслан авчирлаа. Шаналлын минь учиг чи болов. Учир нь би ЭЗЭНд том ам өгсөн агаад буцах газар надад үгүй гэлээ.

³⁶Охин эцэгтээ —Эцэг минь, та ЭЗЭНд том ам өгсөн. Таны дайсан Аммоны хөвгүүдээс таны өшөөг ЭЗЭН нэгэнт авч өгсөн тул амласныхаа дагуу надад үйлдэгтүн! гэжээ.

³⁷Тэр эцэгтээ хандан —Надад нэгэн зүйлийг зөвшөөрөөч. Би найз охидынхоо хамт уулаар хэрэн хэсэж охин онгоныхоо учир уйлан гашуудах хоёр сарын хугацааг надад өгнө үү? гэсэнд

³⁸Иефта —Явагтун гээд охиноо хоёр сар явуулсанд охин нь найз охидынхоо хамт уулаар өгсөн явж, охин онгоныхоо учир уйлан гашуудав.

³⁹Хоёр сар болсны эцэст охин эцэгтээ буцаж ирэв. Эцэг нь өгсөн өчгийнхөө дагуу түүгээр ам өчгөө биелүүлэв. Тэр охин эр хүнтэй энгэр зөрүүлж үзээгүй байв. Үүнээс уламжлан Израильд нэгэн заншил бий болжээ.

⁴⁰Израилийн охид гилеад хүн Иефтагийн охиныг дурсан жил бүр дөрвөн өдөр явж гашууддаг болсон юм.