Read Ariun Bible 2013 – Ариун Библи 2013 Шүүгчид 12 Bible Online

Шүүгчид 12 - Ariun Bible 2013 – Ариун Библи 2013 bible

Шүүгчид 12

¹Дараа нь Ефраимын эрчүүд дуудагдан цугларч хойд зүг уруу гатлан очоод Иефтад —Чи яагаад өөртэйгөө цуг явахаар биднийг дуудалгүйгээр Аммоны хөвгүүдтэй дайтахаар гатлав? Бид чамайг орон гэртэй чинь хамт галдан шатаана гэжээ.

²Иефта тэдэнд —Би болон миний ард түмэн Аммоны хөвгүүдтэй маш ширүүн маргалдсан. Би та нарыг дуудахад та нар намайг тэдний гараас аварсангүй.

³Намайг аврахгүй болохыг чинь хараад би амь өрсөж, Аммоны хөвгүүдийн эсрэг хөдөлсөнд ЭЗЭН тэднийг миний гарт өгөв. Юунд та нар энэ өдөр миний эсрэг дайтахаар над уруу ирдэг билээ? гэж өчив.

⁴Тэгээд Иефта Гилеадын бүх эрсийг цуглуулж, Ефраимтай дайтав. Гилеадчууд тэдэнд —Та нар бол Ефраимын оргодлууд, тэгээд ч гилеадчууд бид Ефраим болон Манассегийн дунд байдаг бус уу гэж хэлээд тэднийг бут цохив.

⁵Гилеадчууд Ефраимын харалдаа байрлах Иорданы гармыг эзлэв. Ефраимын оргодлууд —Гол гатлуулж өгөөч гэж гуйхад нь Гилеадын эрчүүд —Чи ефраим хүн үү? гэхэд тэр хүн —Үгүй гэж хэлэхэд нь

⁶тэд түүнийг сорин —Чи “шибболет” гэж хэл дээ гэхэд нь тэд зөв аялгаар хэлж эс чадан “сибболет” гэхэд нь тэд барьж аваад Иорданы гарам дээр алдаг байв. Ийнхүү тэр үед дөчин хоёр мянган ефраим хүн алагджээ.

⁷Иефта Израилийг зургаан жил шүүв. Тэгээд гилеад хүн Иефта өөд болсонд Гилеадын хотуудын нэгэнд нь[20] хөдөөлүүлэв.

⁸Түүний дараа Бетлехемийн Ибзан Израилийг шүүв.

⁹Тэр гучин хүүтэй байв. Тэр гучин охиноо гадагш явуулж, мөн өөрийн хөвгүүдэд гучин охидыг гаднаас авав. Тэр долоон жил Израилийг шүүжээ.

¹⁰Ибзаныг өөд болоход Бетлехемд хөдөөлүүлэв.

¹¹Түүний дараа зебулун хүн Елон Израилийг шүүв. Тэрээр Израилийг арван жил шүүжээ.

¹²Тэгээд зебулун хүн Елон өөд болсонд Зебулун нутгийн Аиалонд хөдөөлүүлэв.

¹³Түүний дараа пиратон хүн Хиллелийн хөвгүүн Абдон Израилийг шүүв.

¹⁴Тэрбээр далан илжиг унасан дөчин хүү, гучин ачтай байв. Тэр найман жил Израилийг шүүжээ.

¹⁵Тэгээд пиратон хүн Хиллелийн хөвгүүн Абдон өөд болоход Ефраим нутаг дахь амалекчуудын уулан дахь Пиратонд хөдөөлүүлэв.