Read Ariun Bible 2013 – Ариун Библи 2013 Шүүгчид 13 Bible Online

Шүүгчид 13 - Ariun Bible 2013 – Ариун Библи 2013 bible

Шүүгчид 13

¹Израилийн хөвгүүд ЭЗЭНий мэлмийд ёрын мууг үргэлжлүүлэн үйлдсэнд ЭЗЭН тэднийг дөчин жилийн турш филистчүүдийн гарт өгөв.

²Даны ургийн Зорагийн хүн, Маноа хэмээх нэртэй нэгэн эр байжээ. Түүний эхнэр нь хүүсэр тул хүүхэд төрүүлсэнгүй.

³ЭЗЭНий тэнгэрэлч тэр эмэгтэйд үзэгдэн —Үзэгтүн, чи хүүхэд төрүүлээгүй хүүсэр боловч жирэмсэлж хүү төрүүлнэ.

⁴Одоо болгоомжлогтун. Усан үзмийн дарс болон сархдыг ууж үл болно. Бузар идээг ч идэж үл болно.

⁵Үзэгтүн, чи жирэмсэлж хүү төрүүлэх болно. Тэр хөвгүүний тэргүүнд тонгорог хүргэж болохгүй. Учир нь тэр эхийн хэвлийд байхаасаа Бурханд зориулагдан тусгаарлагдсан назир[21] хүн болох юм. Тэр филистчүүдийн гараас Израилийг аварч эхэлнэ гэж хэлэв.

⁶Өнөөх эмэгтэй ирж, нөхөртөө —Бурханы хүн над дээр ирэв. Түүний төрх нь Бурханы тэнгэрэлчийн төрх мэт ихэд аймшигтай байв. Харин түүнийг хаанаас гэдгийг би ч лавласангүй, тэр надад нэрээ ч хэлсэнгүй.

⁷Тэгээд тэр надад “Үзэгтүн, чи жирэмсэн болж хүү төрүүлнэ. Одоо чи усан үзмийн дарс, сархад ууж, бузар идээг идэж үл болно. Учир нь хөвгүүн эхийн хэвлийд байхаасаа үхэх өдрөө хүртэл Бурханд зориулагдсан назир хүн болох юм” гэж айлдлаа хэмээн ярив.

⁸Тэгэхэд нь Маноа, ЭЗЭНд залбирч —Эзэн минь, төрөх гэж буй хөвгүүнд юуг үйлдвэл зохихыг бидэнд сургахын тулд Таны илгээсэн Бурханы хүнийг дахин бидэнд ирүүлж соёрхооч гэв.

⁹Маноагийн дууг Бурхан сонсжээ. Өнөөх эмэгтэй тариалангийн талбайд сууж байхад нь Бурханы тэнгэрэлч түүн дээр дахин ирэв. Харин нөхөр Маноа нь түүнтэй хамт байсангүй.

¹⁰Эмэгтэй яаран гүйж очоод, нөхөртөө —Үзэгтүн, тэр өдөр над дээр ирсэн хүн надад үзэгдлээ гэж сонордуулахад

¹¹Маноа босож, эхнэрээ даган явж нөгөө хүн дээр очоод —Энэ эмэгтэйтэй ярьсан хүн та мөн үү? гэхэд тэр —Би мөн байна гэв.

¹²Маноа —Одоо таны үг биелэгдэх үед хөвгүүний амьдралын хэв маяг, үйлчлэл нь ямар байх вэ? гэж хэлсэнд

¹³ЭЗЭНий тэнгэрэлч, Маноад —Юуны түрүүнд миний хэлсэн бүхэнд эмэгтэй болгоомжтой хандаг.

¹⁴Усан үзмийн модноос гарсан ямар ч юмыг тэр идэж үл болно. Мөн усан үзмийн дарс болон сархдыг ууж үл болно. Бузар идээг идэж болохгүй. Миний түүнд тушаасан бүхнийг тэр эмэгтэй сахиг гэж айлдлаа.

¹⁵Тэгэхэд нь Маноа, ЭЗЭНий тэнгэрэлчид —Та бидэн дээр түр саатна уу? Бид танд зориулан ишиг төхөөрмөөр байна гэв.

¹⁶Тэгтэл ЭЗЭНий тэнгэрэлч, Маноад —Чи намайг саатуулсан ч би чиний идээнээс үл иднэ. Харин чи шатаалт тахилыг өргөе гэвэл түүнийгээ ЭЗЭНд өргөгтүн гэв. Учир нь Маноа түүнийг ЭЗЭНий тэнгэрэлч гэдгийг эс мэдэв.

¹⁷Маноа, ЭЗЭНий тэнгэрэлчид хандан —Таны нэр алдар хэн бэ? Таны үг биелэгдэх үед бид таныг хүндлэх болно гэсэнд

¹⁸ЭЗЭНий тэнгэрэлч түүнд —Миний нэр аугаа гайхамшигтай[22] гэдгийг харсаар байж юунд түүнийг асууна вэ? гэж айлдлаа.

¹⁹Тийнхүү Маноа ишиг ба идээн өргөлийг авч, хадан дээр ЭЗЭНд өргөв.[23] Маноа болон түүний эхнэрийг харж байхад нь ЭЗЭНий тэнгэрэлч гайхамшгийг үйлдэв.

²⁰Галын дөл тахилын ширээнээс тэнгэр өөд дүрэлзсэнд ЭЗЭНий тэнгэрэлч тахилын ширээний дөлөн дотор дээш одов. Маноа болон түүний эхнэр үүнийг хараад нүүрээрээ газарт унав.

²¹Маноа болон түүний эхнэрт ЭЗЭНий тэнгэрэлч дахин үзэгдсэнгүй. Тэгэхэд Маноа түүнийг ЭЗЭНий тэнгэрэлч байсныг мэджээ.

²²Маноа эхнэртээ —Бид Бурханыг үзсэн тул зайлшгүй үхэх болно гэв.

²³Харин эхнэр нь түүнд —Хэрэв биднийг алах нь ЭЗЭНд тааламжтай байсан аваас Тэр бидний гараас шатаалт тахил болон идээн өргөлийг зөвшөөрөн авахгүй байсан бөгөөд энэ бүгдийг ч бидэнд үзүүлэхгүй бас одоо ийм юм бидэнд сонсгохгүй байх байсан гэв.

²⁴Тэгээд эмэгтэй хөвгүүн төрүүлж, түүндээ Самсон хэмээх нэр өгөв. Хөвгүүнийг өсөж өндийхөд нь ЭЗЭН ерөөв.

²⁵Зора, Ештаол хоёрын дундах Махане-дан хотод байхад нь ЭЗЭНий Сүнс түүнийг хөдөлгөж эхлэв.