Read Ariun Bible 2013 – Ариун Библи 2013 Шүүгчид 17 Bible Online

Шүүгчид 17 - Ariun Bible 2013 – Ариун Библи 2013 bible

Шүүгчид 17

¹Ефраимын уулархаг нутагт Мика нэртэй нэгэн хүн байв.

²Тэрээр эхдээ —Та мянга нэг зуун мөнгөн зоосоо алдчихаад харааж байхыг чинь би сонссон. Мөнгө чинь надад бий. Би авчихсан юм гэхэд эх нь —ЭЗЭН миний хүүг ивээх болтугай гэв.

³Тэгээд тэр эхдээ мянга нэг зуун мөнгөн зоосыг буцааж өгсөнд эх нь —Энэ мөнгө ЭЗЭНд ариун гэдгийг одоо би үүгээр илэрхийлье. Энэ нь гараас минь гарч, хүүгийн минь төлөө сийлмэл ба цутгамал хөрөг болог. Иймд одоо үүнийг чамд эргүүлж өгье гэв.

⁴Тэр эхдээ мөнгийг буцааж өгсөнд эх нь хоёр зуун мөнгөн зоосыг авч, мөнгөний дарханд өгөөд, түүгээр сийлмэл ба цутгамал хөрөг дүрсийг хийлгэв. Тэдгээр нь Микагийн гэрт байв.

⁵Ийнхүү Мика гэгч нь бурхдын өргөөтэй болж, ефод болон гэрийн шүтээнүүдийг хийж, хөвгүүдийнхээ нэгэнд сахил хүртээн, өөрийнхөө тахилч болгов.

⁶Тэр өдрүүдэд Израильд хаан гэж байсангүй. Хүн бүр өөр өөрийн нүдэнд зөв зүйтэй гэж үзсэнээ үйлдэж байлаа.

⁷Иудагийн Бетлехемээс ирсэн Иудагийн ургийн нэгэн леви залуу байв. Тэр тэнд цагаачлан сууж байжээ.

⁸Тэр хүн Иудагийн Бетлехем хотоос гарч цагаачлах газар хайн аялж явсаар Ефраимын уулархаг нутагт Микагийн гэрт ирсэн билээ.

⁹Мика түүнээс —Чи хаанаас ирэв? хэмээн асуухад тэр —Би Иудагийн Бетлехемээс гаралтай леви хүн байна. Би хаа хүрсэн газраа цагаачилж суухаар явна даа гэжээ.

¹⁰Тэгэхэд Мика түүнд —Надтай хамт байж, надад эцэг бас тахилч бологтун. Би чамд жил бүр арван мөнгөн зоос өгч, хувцас ба хүнсээр хангана гэжээ. Тэгээд леви хүн гэрт нь оржээ.

¹¹Леви хүн түүнтэй хамт амьдрахыг зөвшөөрч, залуу эр түүний хөвгүүдийн нэг адил байх болов.

¹²Мика леви хүнд сахил хүртээв. Залуу эр түүний тахилч болж, Микагийн гэрт байх болжээ.

¹³Тэгээд Мика —Би леви тахилчтай болов. ЭЗЭН надад сайныг үйлдэнэ гэдгийг би одоо мэдэж байна гэж хэлэв.