Read Ariun Bible 2013 – Ариун Библи 2013 Шүүгчид 18 Bible Online

Шүүгчид 18 - Ariun Bible 2013 – Ариун Библи 2013 bible

Шүүгчид 18

¹Тэр өдрүүдэд Израильд хаан гэж хараахан байсангүй. Тэр үед Дан овгийнхон суурьших өвийн нутгаа хайсаар байв. Учир нь тэр өдрийг хүртэл Израилийн овгууд дунд тэдэнд өвийн газар ногдоогүй байлаа.

²Иймд Даны хөвгүүд өөрсдийн ургийг төлөөлүүлж, нийтийн дундаас Зора болон Ештаолын таван зоригт[34] эрийг газар нутаг тандаж судлуулахаар илгээж, тэдэнд —Явж, газрыг тандагтун гэв. Тэд Ефраимын ууланд Микагийн гэрт ирж, тэндээ хоноглов.

³Тэд Микагийн гэрийн ойролцоо байхдаа леви залуугийн аялгууг таньжээ. Тэгээд тэд тийш замаасаа хэлбийж, түүнд —Хэн чамайг энд авчрав? Энд чи юу хийж байгаа юм бэ? Юунд энд байж байгаа билээ? гэцгээв.

⁴Тэр тэдэнд —Тэр намайг хөлсөлж, би түүний тахилч болсон юм. Мика надад эдгээрийг үйлдэв гэж өчив.

⁵Тэд түүнд хандан —Бидний аян зам бүтэмжтэй болж, бид зорьсондоо хүрэх эсэхийг бидэнд мэдүүлэхийг Бурханаас асууж өгнө үү? гэв.

⁶Тахилч тэдэнд —Амар тайван явагтун. Та нарын аян зам ЭЗЭНий мэлмий дор гэв.

⁷Тэгээд таван эр цааш яван, Лаишид хүрч, тэндхийн ард олон сидон хүмүүсийн адил санаа зовох юмгүй, амар тайван сууж буйг харав. Энэ газарт хөрөнгөөрөө хохирсон эсвэл хохироон булаасан хүн аль аль нь үгүй ажээ. Тэд сидон хүмүүсээс алс төдийгүй бусадтай ч холбоо харьцаагүй байв.[35]

⁸Туршуулууд Зора болон Ештаолд буй ах дүү нар дээрээ буцаж ирэхэд ах дүүс нь —Та нар яав? гэсээр угтлаа.

⁹Тэд —Босоцгоо, тэдэн уруу довтолцгооё. Бид тэр газрыг үзсэн. Маш сайн газар байна. Та нар юу ч хийхгүй байх гэж үү? Явахдаа хойргошилгүй харин тэр нутагт нэвтрэн орж эзэмшилдээ ав!

¹⁰Та нар яваад ажиг сэжиггүй ард олон дээр хүрч очно. Бас нутаг нь бүх талаараа өргөн уудам. Хорвоод байдаг ямар ч зүйлээр дутагддаггүй нутгийг Бурхан та нарын гарт өгчээ гэв.

¹¹Тэгээд Даны ургаас зэвсэг агссан зургаан зуун хүн Зора ба Ештаолоос мордов.

¹²Тэд явсаар Иудагийн Кириат-Иеаримд хуарагнав. Тийм учраас тэд энэ өдрийг хүртэл тэр газрыг Махане-дан гэж нэрлэсэн юм. Харагтун, энэ нь Кириат-Иеаримын ар талд буй.

¹³Тэд тэндээс явж өнгөрөн Ефраимын уулархаг нутагт Микагийн гэрт хүрэв.

¹⁴Тэгээд Лаиш нутгийг тандахаар явсан таван хүн нь ах дүүстээ хандан —Эдгээр гэрийн дотор ефод, гэрийн шүтээн, сийлмэл болон цутгамал хөрөг дүрсүүд байгааг та нар мэдсэнээс хойш хэрхэхээ мэдтүгэй гэв.

¹⁵Тэд эргэн яваад, нөгөө залуу леви хүний гэрт буюу Микагийн гэрт орж түүний амар мэндийг асуув.

¹⁶Даны хөвгүүдээс зэвсэг агссан зургаан зуун эрс хаалганы нь үүдэнд зогсож байлаа.

¹⁷Тахилч нь зэвсэг агссан зургаан зуун хүний хамт хаалганы үүдэнд зогсож байх зуур тэр газрыг тагнахаар явсан таван хүн дээш гаран дотогш орж сийлмэл хөрөг дүрс, ефод, гэрийн шүтээнүүд болон цутгамал хөрөг дүрсийг авав.

¹⁸Тэдгээр хүмүүс Микагийн гэрт орж, сийлмэл хөрөг дүрс, ефод, гэрийн шүтээнүүдийг болон цутгамал хөрөг дүрсийг авсанд тахилч тэднээс —Та нар юу хийж байгаа нь энэ вэ? гэж асуув.

¹⁹Тэд түүнд —Дуугүй бай! Гараараа амаа таглаад, бидний хамт явж, бидэнд эцэг бөгөөд тахилч бологтун. Чамд ганц хүний гэрийн тахилч байх нь дээр үү, эсвэл Израилийн овог болон ургийн тахилч байх нь дээр үү? гэв.

²⁰Тахилчийн сэтгэл баярлан хөөрч, тэрээр ефод, гэрийн шүтээнүүд, сийлмэл хөрөг дүрсийг авч, хүмүүсийн дунд орж явлаа.

²¹Ингээд тэд эргэн, хүүхэд багачууд, мал хөрөнгө, үнэт зүйлсээ урдаа оруулан аян замаа үргэлжлүүлэв.

²²Тэд Микагийн гэрээс нэлээд холдсон хойно Мика хөрш айлуудын эрсийг дуудан цуглуулж, Даны хөвгүүдийн араас хөөж гүйцэв.

²³Даны хөвгүүд уруу хашхиралдсанд тэд эргэж хараад, Микад —Чи эднийг дуудан цуглуулаад яах гээв? гэсэнд

²⁴Мика —Та нар миний бүтээсэн бурхад болон миний тахилчийг авч явчихаад надад юу үлдээсэн юм бэ? Тэгээд та нар надад “Чи яах гээв?” гэж хэлж хэрхэн чадаж байна вэ? гэлээ.

²⁵Даны хөвгүүд Микад —Дуугаа аяд. Эс тэгвэл догшин хилэнтэй эрчүүд бид чамд халдаж чи өөрийнхөө амийг гэрийнхнийхээ амьтай хамт алдах болно гэв.

²⁶Тэднийг өөрөөс нь илүү хүчтэйг Мика хараад, эргэн гэр өөдөө буцлаа. Ингээд Даны хөвгүүд замаа хөөн одов.

²⁷Тэд Микагийн бүтээсэн юмсыг болон түүний тахилчийг авч, Лаишид ирэв. Тэгээд тэнд амар амгалан бөгөөд ажиг сэжиггүй хүмүүс дээр ирж, тэднийг илдний ирээр цохиж, хотыг галдан шатаав.

²⁸Тэр хот Сидоноос алслагдсан төдийгүй хэн нэгэнтэй харилцаагүй байсан учир тэднийг аврах хүн ганц ч байсангүй. Тэр хот Бет-рехобын ойролцоо хөндийд байв. Тэд хотыг дахин сэргээн босгож, тэндээ суурьшив.

²⁹Тэд тэр хотыг Израильд төрсөн өөрсдийн өвөг эцэг Даны нэрээр Дан гэж нэрлэжээ. Урьд нь Лаиш гэдэг байж.

³⁰Газар нутаг нь боолчлогдох өдрийг хүртэл Даны хөвгүүд өөрсдөдөө зориулан сийлмэл шүтээнийг босгов. Манассегийн хөвгүүн Гершомын хүү Ионатан ба түүний хөвгүүд Дан овгийн тахилч нар байв.

³¹Ийнхүү Бурханы өргөө Шилод байх бүх өдрүүдэд тэд Микагийн бүтээсэн сийлмэл хөрөг дүрсийг өөрсдөдөө зориулан тавьдаг байв.