Read Ariun Bible 2013 – Ариун Библи 2013 Шүүгчид 21 Bible Online

Шүүгчид 21 - Ariun Bible 2013 – Ариун Библи 2013 bible

Шүүгчид 21

¹Тэгээд Израилийн эрчүүд Мизпад “Бидний хэн нь ч охиноо бениамин хүнд эхнэр болгон өгөхгүй” хэмээн тангараглав.

²Ард түмэн Бетелд ирж, тэнд Бурханы өмнө үдэш болтол суугаад, дуугаа өндөрсгөн гашуудан уйлалдав.

³Тэд —Израилийн Бурхан, ЭЗЭН минь, яагаад Израильд энэ мэт хэрэг болж, өнөөдөр Израилиас нэгэн овог дутах болов оо? гэцгээв.

⁴Дараа өдөр нь ард олон эртлэн босоод, тэнд тахилын ширээ босгож, шатаалт тахил ба эвийн тахилуудыг өргөв.

⁵Тэгээд Израилийн хөвгүүд —Израилийн бүх овгоос ЭЗЭН дээр чуулганд ирээгүй нь хэн бэ? хэмээцгээв. Учир нь Мизпад ЭЗЭНд хүрч ирээгүй хүний тухайд —Тэр нь заавал алагдах болно хэмээн тэд хатуу тангараг тавьсан болой.

⁶Израилийн хөвгүүд өөрсдийн дүү Бениаминыг өрөвдөн —Өнөөдөр Израилиас нэг бүтэн овог таслагдав гэцгээв.

⁷Тэдний үлдсэн хүмүүст эхнэр олоход нь бид хэрхэн дэмжиж туслах вэ? Тэдэнд бидний хэн ч охиноо эхнэр болгон өгөхгүй гэж бид өөрсдөө ЭЗЭНд тангарагласан шүү дээ гэцгээв.

⁸Тэд —Израилийн овгууд дотроос хаанахын хэн нь Мизпад ЭЗЭН дээр хүрч ирсэнгүй вэ? гэжээ. Харагтун, Иабеш-гилеадаас нэг нь ч хуаран дахь чуулганд ирээгүй байв.

⁹Учир нь ард түмнийг тоолсонд, харагтун, Иабеш-гилеадын оршин суугчдаас нэг нь ч тэнд байсангүй.

¹⁰Тиймээс хотол түмэн эрэлхэг дайчдаас арван хоёр мянган хүнийг тийш нь илгээж, тэдэнд —Яваад, Иабеш-гилеадын оршин суугчдыг эмэгтэйчүүд ба хүүхдүүдтэй нь хамт илдний ирээр цавчигтун хэмээн тушаав.

¹¹Энэ бол та нарын хийх зүйл билээ. Бүх эрчүүдийг нь болон эрэгтэй хүнтэй хавьтсан эмэгтэй болгоныг бүрэн устгагтун гэж тушаав.

¹²Тэд Иабеш-гилеадын оршин суугчдын дундаас эр хүнтэй хавьтаж үзээгүй дөрвөн зуун онгон охидыг олж, тэднийг Канаан газарт байдаг Шилогийн хуаран уруу авч ирэв.

¹³Тэгээд даяар хотол түмэн Риммоны хаданд байгаа Бениамины хөвгүүд уруу үг илгээж, тэдэнд эвлэрлийг тунхаглав.

¹⁴Ингээд Бениамин тэр цагт буцаж ирцгээв. Израильчууд тэдэнд Иабеш-гилеадын эмэгтэйчүүдээс тэдний амьд үлдээсэн бүсгүйчүүдийг тэдэнд өгсөн боловч тэдэнд хүрэлцсэнгүй.

¹⁵ЭЗЭН, Израилийн овгуудын дунд цоорхой гаргасан тул ард түмэн Бениаминыг өрөвдөв.

¹⁶Хотол түмний ахмадууд —Бениамины эмэгтэйчүүд устгагдсан хойно үлдсэн хүмүүсийг нь эхнэртэй болгохын тулд бид юу хийвэл зохих вэ? гээд —

¹⁷Энэ овог Израилиас арчигдан устгагдахгүйн тулд Бениамины амьд үлдэгсдэд залгамжлагчид байх ёстой.

¹⁸Гэвч бид өөрсдийн охидоо тэдэнд эхнэр болгон өгч чадахгүй гэв. Учир нь Израилийн хөвгүүд тангараг тавин —Бениаминд эхнэр өгсөн хүн нь хараагдах болтугай гэсэн билээ.

¹⁹Тэгээд тэд —Харагтун, Бетелээс хойд зүгт, Бетелээс Шехем ордог замын наран ургах талд буюу Лебонагийн өмнөдөд байдаг Шило хотод жил бүр ЭЗЭНий баяр болдог гэв.

²⁰Тэд Бениамины хөвгүүдэд —Явж, усан үзмийн талбайд нуугдан хүлээгтүн гэж тушаав.

²¹Үзэгтүн, хэрэв та нарыг харж байхад Шилогийн охид бүжиглэхээр гарч ирвэл та нар усан үзмийн талбайгаасаа гарч ирэн хүн бүр Шилогийн охидоос өөрийн эхнэрээ сонгон барьж, Бениамин нутагтаа буцагтун.

²²Охидын эцгүүд, эсвэл ах нар нь ирж, бидэнд[39] гомдол мэдүүлбэл бид тэдэнд “Тэднийг энэрэгтүн. Бидний хэн нь ч дайны үед эхнэр аваагүй. Та нар ч охидоо тэдэнд өөрсдөө өгөөгүй учраас та нар одоо буруутахгүй” хэмээн хэлнэ гэв.

²³Ингээд Бениамины хөвгүүд тийнхүү үйлдэв. Тэдний булаасан бүжиглэгчид буюу барьсан болгон эхнэр нь болов. Тэд өөрсдийн өв болох нутагтаа буцаж ирээд, хотуудаа сэргээн босгож тэндээ суурьшив.

²⁴Тэр үед Израилийн хөвгүүд тэндээс тус тусын овог болон ураг уруугаа явцгаав. Ингээд хүн бүр тэндээсээ өөрсдийн өв болох газар уруугаа одоцгоов.

²⁵Тэр өдрүүдэд Израильд хаан гэж байсангүй. Хүн бүр өөр өөрийн нүдэнд зөв зүйтэй гэснээ үйлдэж байлаа.