Read Ariun Bible 2013 – Ариун Библи 2013 Шүүгчид 4 Bible Online

Шүүгчид 4 - Ariun Bible 2013 – Ариун Библи 2013 bible

Шүүгчид 4

¹Ехүдийг нас барсны дараа Израилийн хөвгүүд ЭЗЭНий мэлмийд үргэлжлүүлэн ёрын мууг үйлдэв.

²Тиймээс ЭЗЭН, Хазорт хаанчилж байсан Канааны хаан Иабины гарт тэднийг тушаав. Иабины цэргийн жанжин нь Сисера бөгөөд тэр Харошет-хагоимд амьдран суудаг байв.

³Тэр есөн зуун төмөр тэрэгтэй байсан бөгөөд хорин жилийн турш Израилийн хөвгүүдийг харгислан дарангуйлж байсан тул Израилийн хөвгүүд ЭЗЭНээс тусламж эрж хашхиран гуйв.

⁴Тэр үед Лаппидотын эхнэр, эш үзүүлэгч эмэгтэй Дебора Израилийг шүүж байлаа.

⁵Тэр эмэгтэй Ефраимын уулан дахь Рама болон Бетелийн дунд байдаг Деборагийн далдуу модны доор амьдран суудаг байв. Израилийн хөвгүүд хэрэг явдлаа шүүлгэхээр түүн дээр өгсөж ирдэг байлаа.

⁶Тэрээр Кедеш-нафталд буй Абиноамын хөвгүүн Баракт элч илгээж дуудуулав. Тэгээд тэр түүнд —Израилийн Бурхан ЭЗЭН тушааж байна. “Яв, Табор ууланд гар. Өөртэйгөө хамт Нафтали болон Зебулуны хөвгүүдээс арван мянган эрийг дагуул.

⁷Би Иабины цэргийн жанжин Сисераг тэрэгт цэрэгтэй нь болон олон цэрэгтэй нь хамт Кишоны зүг та нар уруу явуулж, та нарын гарт өгнө” гэв гэж хэлүүлэв.

⁸Тэгтэл Барак түүнд —Хэрэв чи надтай хамт явбал би явна. Харин чи надтай хамт явахгүй бол би явахгүй гэв.

⁹Харин Дебора —Би чамтай хамт дуртайяа явна. Харин ЭЗЭН, Сисераг нэгэн эмэгтэйн гарт тушаах учир чиний явах аянд алдар хүнд нь чамд ногдохгүй гэв. Ингээд Дебора босож, Барактай хамт Кедеш уруу явжээ.

¹⁰Барак Зебулун ба Нафталийг Кедешт дуудан цуглуулж, арван мянган эрийг дагуулан явсан бөгөөд Дебора ч түүний хамт явав.

¹¹Тэр үед кен хүн Хебер нь Мосегийн хадам эцэг Хобабын үр удам болох кенчүүдээс салж, Кедешийн ойролцоох Заананним дахь царсан ой хүртэл майхнаа босгов.

¹²Абиноамын хөвгүүн Барак Табор ууланд гарсныг Сисерад мэдэгдсэнд

¹³Сисера есөн зуун төмөр тэргээ мөн өөртэй нь хамт байсан бүх хүнээ Харошет-хагоимаас Кишоны хөндийд дуудан цуглуулжээ.

¹⁴Дебора, Баракт хандан —Бос! Өнөөдөр ЭЗЭН чиний гарт Сисераг өгсөн билээ. ЭЗЭН Өөрөө чиний өмнө явна гэв. Ингээд Барак арван мянган эрийг дагуулан Табор уулаас буулаа.

¹⁵ЭЗЭН, Баракийн өмнө Сисера болон түүний бүх тэрэгт цэрэг, цэргүүдийг илдний ирээр хядсанд Сисера тэргээ хаян явган зугтаж одлоо.

¹⁶Харин Барак тэрэг ба цэргүүдийг нь Харошет-хагоим хүртэл мөшгөн хөөв. Сисерагийн цэргүүд нэг нь ч үлдэлгүй бүгд илдний ирэнд унацгаав.

¹⁷Тэгтэл Сисера, кен хүн Хеберийн эхнэр Иаелын майхан уруу явган зугтаж ирэв. Учир нь Хазорын хаан Иабин болон кен хүн Хеберийн гэрийн хооронд энх тайван байв.

¹⁸Иаел Сисераг угтан гарч ирээд, түүнд —Орж хайрла, эзэнтэн минь. Манайд орж хайрла. Бүү эмээгтүн гэв. Сисера түүний майханд орсонд Иаел түүнийг хөнжлөөр[11] хучив.

¹⁹Сисера түүнд —Уух жаахан ус өгөөч. Би цангаж байна гэсэнд Иаел сүүтэй арьсан тулмыг онгойлгож түүнд уулгаад, түүнийг дахин хучив.

²⁰Сисера түүнд —Чи майхны үүдэнд зогсоод, хэрэв хэн нэгэн нь ирж “Энд хүн байна уу?” гэж чамаас асуувал “Байхгүй” гэж хэлээрэй гэв.

²¹Сисера ядарснаас гүн нойронд автахад Хеберийн эхнэр Иаел майхны гадас авч гартаа алх барин сэмхэн түүнд ойртож очоод чамархай уруу нь гадсаа шааж газартай зоов. Ингээд Сисера ухаан алдаж үхэв.

²²Харагтун, Барак, Сисераг мөшгөн хөөж ирэхэд Иаел түүнийг угтан гарч ирээд —Нааш ир, таны хайж байгаа хүнийг би танд харуулъя гэв. Тэр майханд орсонд, харагтун, Сисера чамархайдаа майхны гадас зоолгоостой, үхсэн хэвтэж байлаа.

²³Ийнхүү Бурхан тэр өдөр израильчуудын өмнө Канааны хаан Иабиныг номхруулав.

²⁴Израилийн хөвгүүдийн гар ширүүсэн ширүүссээр эцэст нь Канааны хаан Иабиныг устгав.