Read Ariun Bible 2013 – Ариун Библи 2013 Шүүгчид 7 Bible Online

Шүүгчид 7 - Ariun Bible 2013 – Ариун Библи 2013 bible

Шүүгчид 7

¹Дараа нь Иеруббаал (буюу Гидеон) болон түүний хамт байсан бүх ард олон эртлэн босож Хародын булгийн дэргэд хуарагнан буув. Мидианчуудын цэргийн хуаран хөндийд, тэднээс умард зүгт Морегийн толгойн хажууд байлаа.

²ЭЗЭН, Гидеонд —Мидианчуудыг Израилийн гарт өгөхөд чамтай байгаа хүмүүс хэтэрхий олон байна. Израиль “Би өөрийн гараар өөрийгөө аварсан” гэж Намайг эсэргүүцэн сайрхах вий.

³Тиймээс одоо ард олны чихэнд “Айж сүрдэж байгаа хэн боловч буц, Гилеад уулаас эртхэн холдогтун” гэж тунхагла гэв. Ингэхэд хорин хоёр мянган хүн буцаж, арван мянган хүн үлдэв.

⁴ЭЗЭН, Гидеонд —Ард олон мөн л дэндүү олон байна. Тэднийг ус уруу дагуулан аваач. Тэнд Би тэднийг чиний төлөө шалгая. Миний чамд “Энэ нь чамтай хамт явна” гэж хэлсэн хүн чамтай хамт явах болно. Харин чамд “Энэ нь чамтай хамт явж болохгүй” гэж хэлсэн бүхэн явах ёсгүй гэж айлдлаа.

⁵Ингээд Гидеон ард олныг ус уруу дагуулан авчрав. ЭЗЭН, Гидеонд —Нохой шиг, хэлээрээ ус долоох хүн бүрийг чи нэг талд гарга, өвдөг дээрээ бөхийн ус ууж буй хүмүүсийг түүнчлэн салангид байлга гэв.

⁶Амандаа гараараа ойртуулан долоогч хүний тоо гурван зууд хүрэв. Харин үлдсэн хүмүүс бүгд өвдөг дээрээ бөхийн ус ууж байлаа.

⁷ЭЗЭН, Гидеонд —Ус долоогч гурван зуун хүнээр Би та нарыг аварч, мидианчуудыг чиний гарт өгнө. Харин үлдсэн бүх хүнийг гэр гэрт нь хариул гэж айлдав.

⁸Тиймээс тэд бусдынхаа замын хүнс болон эвэр бүрээг гартаа авчээ. Гидеон Израилийн бүх эрчүүдийг өөр өөрсдийнх нь майхан уруу буцаан явуулж, харин гурван зуун хүнийг тэр тэндээ авч үлдэв. Мидианы цэргийн хуаран нь түүний доор, хөндийд байв.

⁹Тэр шөнөдөө ЭЗЭН, Гидеонд —Бос, тэр цэргийн хуаран уруу оч. Би түүнийг чиний гарт өгсөн.

¹⁰Хэрэв чи явахаасаа айж байвал өөрийн зарц Пуратай хамт цэргийн хуаран уруу оч.

¹¹Чи тэдний юу ярилцаж байгааг сонс. Ингэсний дараа гар чинь хүчирхэгжиж чи хуаран уруу бууж очиж чадах болно гэв. Тэгээд Гидеон, зарц Пурагийн хамт хуаран дахь харуулын захад бууж ирэв.

¹²Мидианчууд, амалекчууд болон дорнын бүх хөвгүүд хөндийд царцаа мэт олноороо ханаран байв. Тэдний тэмээнүүд нь далайн эргийн элс мэт тоо томшгүй олон байв.

¹³Гидеон тэнд очиход, харагтун, нэгэн хүн найздаа зүүдээ ярьж байв. Тэр —Үзэгтүн, би нэгэн зүүд зүүдэллээ. Харагтун, зүүдэнд арвайн гурилаар хийсэн нэгэн бин мидианчуудын цэргийн хуаранд өнхөрч ирэв. Тэр өнхөрч ирээд майханд хүрч мөргөсөнд майхан нурж унасан ба бин түүнийг хөмрүүлэн нураав гэв.

¹⁴Тэгэхэд түүний найз нь —Энэ чинь израиль хүн, Иоашийн хөвгүүн Гидеоны илднээс гарцаагүй. Мидиан болон бүх цэргийн хуаранг Бурхан түүний гарт өгчээ гэж хариулав.

¹⁵Гидеон зүүдний өгүүлэл болон тайллыг нь сонсоод сөгдөн мөргөв. Тэгээд Израилийн цэргийн хуаранд буцаж ирээд —Босогтун! ЭЗЭН, Мидианы хуаранг та нарын гарт өгчээ гэж тунхаглав.

¹⁶Тэгээд тэр гурван зуун хүнээ гурван бүлэгт хувааж, хүн бүрийн гарт эвэр бүрээ болон хоосон ваар бариулж, ваарны дотор бамбар хийлгэв.

¹⁷Гидеон тэдэнд —Намайг харж, дуурайн үйлдэгтүн. Харагтун. Би цэргийн хуарангийн захад хүрээд юуг үйлдэнэ та нар ч мөн адил үйлдэгтүн.

¹⁸Би болон надтай хамт байгчид бүгд эвэр бүрээ үлээхэд та нар ч бас хуаранг бүхэлд нь тойрон эвэр бүрээг үлээж дуугарган, “ЭЗЭНий төлөө, Гидеоны төлөө” хэмээн хашхирагтун гэв.

¹⁹Ингээд Гидеон болон түүнтэй хамт байсан зуун хүн шөнө дундын харуул эхлэх цагт хуарангийн захад хүрэв. Тэнд харуул дөнгөж солигдоод байв. Тэд эвэр бүрээгээ үлээж хүнгэнүүлэн, гартаа байсан ваарыг цохиж хагалав.

²⁰Гурван бүлэг бүрээ үлээн хүнгэнүүлж, ваараа цохиж хагалан, зүүн гартаа бамбараа барьж, баруун гартаа бүрээгээ барин чанга үлээж —Илд ээ, ЭЗЭНий төлөө болон Гидеоны төлөө гэж чангаар хашхирав.

²¹Тэд цэргийн хуаранг хүрээлэн, хүн бүр өөрийн байранд зогсоцгоов. Тэгтэл хуаран даяараа гүйлдэн, бархирч орилолдон зугтав.

²²Гурван зуун хүнийг эвэр бүрээ үлээн дуугаргах үед ЭЗЭН бүхэл цэргүүдийн дунд нэгнийх нь илдийг нөгөөгийнх нь эсрэг зөрөлдүүлсэнд цэргүүд Зерерагийн зүг орших Бет-шитта болон Таббатын ойролцоох Абел-мехолагийн хил хязгаар хүртэл зугтацгаав.

²³Нафтали, Ашер болон бүх Манассегаас хамтдаа дуудагдсан израиль эрчүүд Мидианы араас мөшгөн хөөв.

²⁴Гидеон, Ефраимын бүхий л уулархаг нутгаар элч нарыг илгээн —Мидианчуудыг довтлохоор буун ирж Иордан болон Бет-барагийн усыг тэдний өмнө булаан авагтун гэсэнд Ефраимын бүх эрчүүд хамтдаа дуудагдан, Иордан болон Бет-барагийн усыг булаан авав.

²⁵Тэд мидианчуудыг нэхэн хөөж байхдаа Мидианы хоёр ноён Ореб болон Зеебийг олзолж, Оребыг Оребын хадан хавцалд, Зеебийг Зеебийн усан үзмийн шахуурга дээр алаад тэдний толгойг Иорданы нөгөө талд буй Гидеонд авчрав.