Read Ariun Bible 2013 – Ариун Библи 2013 Шүүгчид 9 Bible Online

Шүүгчид 9 - Ariun Bible 2013 – Ариун Библи 2013 bible

Шүүгчид 9

¹Иеруббаалын хөвгүүн Абимелех Шехемд байдаг нагац нар дээрээ очиж тэдэнд болон эхийнхээ эцгийн бүлийн бүхий л овогт хандан —

²Шехемийн бүх иргэдийн өмнө хэлэгтүн. “Иеруббаалын бүх хөвгүүд болох далан хүн та нарыг захирах эсвэл ганц хүн та нарыг захирахын аль нь та нарт дээр вэ?” гэж асуу. Би та нарын яс махны тасархай гэдгийг санагтун гэв.

³Түүний эдгээр үгсийг Шехемийн бүх иргэдэд Абимелехийн нагац нар нь хэлсэнд Абимелех тэдний зүрхэнд нийцэж —Тэр бидний ах дүү шүү дээ гэж тэд хэлцгээжээ.

⁴Тэд Баал-беритийн сүмээс далан шекел мөнгө авч, Абимелехт өгсөнд тэр мөнгөөр үл бүтэх, бодлогогүй этгээдүүдийг хөлслөв. Тэд Абимелехийг дагалдан явлаа.

⁵Тэгээд Абимелех, Офра дахь эцгийнхээ гэрт очиж, өөрийн ах дүү болох Иеруббаалын хөвгүүд, далан хүнийг нэг чулуун дээр алав. Харин Иеруббаалын отгон хөвгүүн Иотам нуугдсан тул амьд гарчээ.

⁶Шехемийн болон Бет-миллогийн хамаг иргэд нэгдээд тэд явж Шехемд байдаг баганын царс модны дэргэд Абимелехийг хаанаар өргөмжлөв.

⁷Иотамд энэ тухай мэдэгдэхэд тэр явж Геризим уулын оргил дээр гарч зогсоод дуугаа өндөрсгөн тэдэнд хандаж —Шехемийн иргэд ээ, намайг сонсогтун. Тийнхүү Бурхан та нарыг сонсох болно.

⁸Нэгэн удаа модод өөрсдийн хааныг өргөмжлөн тослохоор явцгаав. Тэд чидун модонд хандан “Бидний хаан болооч” гэсэнд

⁹чидун мод тэдэнд “Бурхад ба хүмүүсийг хүндлэхийн тулд хэрэглэдэг өөрийн тосыг би орхин, моддын дээгүүр найган ганхах хэрэг үү?” хэмээв.

¹⁰Тэгэхээр нь модод инжрийн модонд “Ирж, бидний хаан болооч” гэсэнд

¹¹инжрийн мод тэдэнд “Би амтлаг сайн үр жимсээ хаяж, моддын дээгүүр найган ганхах хэрэг үү?” гэж хэлэв.

¹²Тэгэхэд модод усан үзмийн модонд “Ирж, бидний хаан болооч” гэв.

¹³Харин усан үзмийн мод тэдэнд “Бурхад ба хүмүүсийг баярлуулах шинэ усан үзмийн дарсаа би орхин, моддын дээгүүр найган ганхах хэрэг үү?” гэв.

¹⁴Эцэст нь бүх модод махирст “Ирж, бидний хаан болооч” гэсэнд

¹⁵махирс хариуд нь “Хэрэв та нар үнэхээр намайг хаанаа болгон тосолж байгаа бол ирж, миний сүүдэрт хоргодогтун. Эс тэгвээс махирсаас гал гарч Ливаны хушин ойг шатааг” гэжээ.

¹⁶Гэтэл одоо та нар Абимелехийг үнэн ба чин сэтгэлээр хаанд өргөмжлөв үү? Иеруббаал болон түүний гэрийнхэнд сайныг хийн, ачит үйлсийнх нь ёсоор хандав уу?

¹⁷Учир нь миний эцэг та нарын төлөө тулалдаж, өөрийн амийг үл хайрлан та нарыг Мидианы савраас чөлөөлөн аварсан билээ.

¹⁸Харин та нар өнөөдөр миний эцгийн гэрийн эсрэг босож түүний хөвгүүд болох далан хүнийг нэг чулуун дээр алаад та нарын ах дүүгийн хүн учир шивэгчний хөвгүүн Абимелехийг Шехемийн иргэдийн хаан болгов.

¹⁹Хэрэв та нар энэ өдөр Иеруббаал болон түүний гэрт үнэн ба чин сэтгэлээр хандсан аваас та нар Абимелехийг баярлуул, тэр ч бас та нарыг баярлуулаг.

²⁰Харин тийм бус аваас Абимелехээс гал гарч Шехемийн болон Бет-миллогийн хүмүүсийг галдан шатааг. Бас Шехем болон Бет-миллогийн хүмүүсээс гал гарч Абимелехийг галдан шатааг гэв.

²¹Тэгээд Иотам оргон зайлж Беерт ирээд өөрийн ах Абимелехээс айж тэнд суув.

²²Абимелех гурван жил Израилийг захирчээ.

²³Дараа нь Бурхан, Абимелех болон Шехемийн иргэдийн хооронд муу сүнсийг илгээсэнд Шехемийн иргэд Абимелехээс урвав.

²⁴Энэ нь Иеруббаалын далан хүүд үйлдсэн хэрцгийлэл болон ах дүүгээ алсан Абимелех дээр хийгээд энэ гэмт явдалд Абимелехийг зоригжуулсан Шехемийнхний дээр тэдний цусыг эргэн буулгахын тулд болой.

²⁵Түүнд дайсагнасан Шехемийн иргэд уулсын оройд сууж, замын дагуу хажуугаар нь өнгөрсөн бүх хүнийг дээрэмдэж байв. Удалгүй энэ хэрэг Абимелехт дуулдав.

²⁶Ебедийн хөвгүүн Гаал ах дүүсийнхээ хамт Шехемд нүүн ирж, Шехемийн иргэд түүнд найдвар тавих боллоо.

²⁷Тэд талбайд гарч усан үзмээ хураан шахаад баяр наадам хийв. Тэд өөрсдийн бурхны өргөөнд ороод идэж уун Абимелехийг хараацгаав.

²⁸Тэр үед Ебедийн хөвгүүн Гаал —Абимелех гэгч хэн бэ? Шехемийнхэн бид хэн болоод түүнд зарагдах ёстой вэ? Абимелех бол Иеруббаалын хөвгүүн, Зебул бол Абимелехийн түшмэл биш үү? Шехемийн эцэг Хаморын эрчүүдэд бид үйлчилж болох атал юунд Абимелехт зарагдана вэ?

²⁹Энэ ард түмэн миний эрхэн дор байсан ч болоосой! Тэгвэл би Абимелехийг хөөн зайлуулахсан хэмээн агсраад, Абимелехт —Цэргийн хүчээ нэмэн, хүрч ирэгтүн гэж хэлүүлэв.

³⁰Ебедийн хөвгүүн Гаалын үгийг хотын захирагч Зебул сонсож, уур хилэн нь бадарлаа.

³¹Тэр Арума уруу Абимелехэд нууцаар элч нарыг илгээн —Үзэгтүн, Ебедийн хөвгүүн Гаал ах дүүсийнхээ хамт Шехемд ирээд байна. Одоо тэд хотыг таны эсрэг босгож байна.

³²Тэгэхээр өөрийнхөө хүмүүсийн хамт шөнөөр босож, талд отон суугтун.

³³Өглөө эрт нар мандмагц та эртлэн босож, хот уруу дайран орогтун. Гаал болон түүний хамтрагчид таны эсрэг гарч ирэх цагт та өөрийн хийж чадах бүх зүйлээ үйлдэгтүн гэж хэлүүлэв.

³⁴Ийнхүү Абимелех ба түүнтэй хамт байгч бүх ард олон шөнөөр босож, дөрвөн ангид хуваагдан, Шехемийн эсрэг отон суув.

³⁵Ебедийн хөвгүүн Гаал гарч ирэн хотын хаалганы үүдэнд зогсов. Абимелех өөрийнхөө хүмүүсийн хамт нуувчаасаа босоцгоолоо.

³⁶Гаал тэр хүмүүсийг хараад Зебулд —Хараач, уулсын оройгоос хүмүүс буун ирж байна гэсэнд Зебул түүнд —Чи уулсын сүүдрийг хүн гэж харж л дээ гэв.

³⁷Гаал дахин —Үзэгтүн, хүмүүс энэ газрын өндөрлөгөөс бууж ирж байна. Бас нэг анги царс модны хавиас ирж байна гэв.

³⁸Тэгэхэд Зебул түүнд —Чиний “Абимелех гэгч хэн юм бэ? Юуны учир бид түүнд зарагдах ёстой вэ?” хэмээн өгүүлсэн бардамнал одоо хаачсан бэ? Чиний басамжилсан хүмүүс чинь эд биш үү? Одоо гарч очоод тэдэнтэй тулалдагтун гэв.

³⁹Тэгэхэд Гаал, Шехемийн иргэдийн түрүүнд гарч яван Абимелехтэй тулалдлаа.

⁴⁰Абимелех давшиж, Гаал ухрав. Хотын хаалга үүд хүртэл олон хүн эрсдэн унав.

⁴¹Дараа нь Абимелех, Арумад үлдэж, харин Зебул, Гаалыг ах дүүсийнх нь хамт Шехемд суулгалгүй тэднийг хөөн зайлуулав.

⁴²Дараагийн өдөр нь ард олон талд гарч ирснийг Абимелехт мэдэгдэв.

⁴³Тэр өөрийн хүмүүсийг авч гурван ангид хуваагаад талд отон суув. Тэгээд ардуудыг хотоос гарч ирэхийг тэр үзээд тэднийг цохив.

⁴⁴Дараа нь Абимелех ба түүнтэй хамт байсан нэг анги нь урагшаа довтолж хотын хаалган дээр зогсов. Нөгөө хоёр анги нь талд байсан бүгд уруу довтолж, тэднийг устгажээ.

⁴⁵Абимелех тэр хотын эсрэг өдөржингөө тулалдсаар түүнийг эзлэн авч, тэнд байсан хүмүүсийг устгав. Дараа нь хотыг газартай нь тэгшлэн дээр нь давс цацав.

⁴⁶Шехемийн цамхгийн бүх иргэд үүнийг сонсоод Ел-беритийн сүмийн доод хонгилд орцгоожээ.

⁴⁷Шехемийн цамхгийн бүх иргэд бүгдээрээ цугларсныг Абимелехт дуулгасанд

⁴⁸Абимелех хамт байсан бүх ард олонтойгоо Залмон ууланд гарав. Абимелех гартаа сүх барьж, модны мөчир цавчин аваад түүнийгээ өргөж мөрөн дээрээ тавив. Тэгээд хамт байсан хүмүүстээ —Миний юу хийхийг харсны дагуу та нар ч даруй дуурайн хийгтүн гэж тушаав.

⁴⁹Бүх ард олон ч мөн нэг нэг мөчир цавчин Абимелехийг даган явж тэдгээрийг доод хонгилын дээр тавьж, дотор нь байгсдын дээр гал асаан доод хонгилыг шатаав. Шехемийн цамхгийн бүх хүн, мянга орчим эрэгтэй, эмэгтэй хүн үхэцгээв.

⁵⁰Тэгээд Абимелех Тебез уруу явж Тебезийн харалдаа бүслэн хуарагнаад түүнийг эзлэв.

⁵¹Гэвч хотын төвд нэгэн бөх бат цамхаг байлаа. Хотын ахлагч нар, бүх иргэд эр эмгүй бүгд тийш зугтан орж өөрсдийгөө түгжин цамхгийн дээвэр өөд авиран гарав.

⁵²Абимелех цамхагт очин тэдний эсрэг тулалдаж, гал тавихаар цамхгийн үүдэнд ойрттол

⁵³нэгэн эмэгтэй Абимелехийн толгой дээр тээрмийн бул чулууг авч шидэн гавлыг нь хагалжээ.

⁵⁴Абимелех зэвсэг үүрэгч залуугаа яаран дуудаж —Чи илдээ сугалан намайг алагтун. Энэ нь “Эмэгтэй хүн түүнийг алсан” хэмээн хэлүүлэхгүйн тулд билээ гэв. Тэгээд залуу түүнийг нэвт хатгасанд тэр үхэв.

⁵⁵Израиль хүмүүс Абимелехийн үхсэнийг хараад бүгд гэр гэртээ харьцгаав.

⁵⁶Ингэж өөрийнхөө далан ах дүүг алж, эцэгтээ үйлдсэн Абимелехийн бузар мууг Бурхан өөрт нь буцаан буулгав.

⁵⁷Бурхан бас Шехемийн эрчүүдийн бүх л бузар мууг эргүүлэн өөрсдийнх нь толгой дээр буулгав. Иеруббаалын хөвгүүн Иотамын хараал ийнхүү тэдэн дээр ирэв.