Read Ariun Bible 2013 – Ариун Библи 2013 1Самуел 19 Bible Online

1Самуел 19 - Ariun Bible 2013 – Ариун Библи 2013 bible

1Самуел 19

¹Саул өөрийн хөвгүүн Ионатан хийгээд бүх зарцынхаа өмнө Давидыг алах тухайгаа[47] ярив. Гэвч Саулын хөвгүүн Ионатан Давидад их хайртай байжээ.

²Тиймд Ионатан, Давидад —Миний эцэг Саул чамайг алахаар санаархаж байна. Маргааш өглөө болгоомжтой байж, далд газар нуугдахыг гуйж байна.

³Би гадагш гарч, чиний нуугдан байгаа талбайд эцгийнхээ дэргэд зогсон чиний тухай эцэгтэйгээ ярина. Хэрвээ би ямар нэг юм мэдэх бол чамд дуулгая гэжээ.

⁴Дараа нь Ионатан, эцэг Саулдаа Давидыг сайшаан ярьж —Тэр таны эсрэг нүгэл үйлдээгүй бус уу. Мөн түүний үйлдсэн зүйлс нь танд маш их ашиг авчирсан тул хаантан та боол Давидынхаа эсрэг нүгэл бүү үйлдэг.

⁵Учир нь тэрээр амиа үл хайрлан филист хүнийг цохиж устгасан. Ийнхүү ЭЗЭН бүх Израильд агуу их авралыг хайрлав. Та үүнийг үзээд баяссан билээ. Гэтэл одоо та яагаад ямар ч шалтгаангүйгээр Давидыг алж, гэмгүй хүний цусыг урсган түүний эсрэг нүгэл үйлдэх гэж байгаа юм бэ? гэв.

⁶Ионатаны хэлэхийг Саул сонсоод, тангараглан —ЭЗЭН амьд! Тэр бүү алагдаг гэж хэлэв.

⁷Тэгээд Ионатан Давидыг дуудан эдгээр бүх үгийг түүнд дуулгав. Ионатан Давидыг Саул уруу дагуулан очсонд, Давид урьдын адил Саулд үйлчлэв.

⁸Дайн дахин эхлэхэд Давид явж филистчүүдтэй тулалдан тэднийг цохиж үй олноор хядсанд тэд Давидаас зугтав.

⁹Саул өөрийн гэрт гартаа жад барин сууж, Давид Саулын дэргэд өөрийн гараар босоо ятга тоглож байтал ЭЗЭНээс ирсэн муу сүнс Саулыг дайрав.

¹⁰Саул жадаар Давидыг хананд хадах гэтэл Давид Саулаас бултсанд Саулын жад хананд зоогдов. Давид тэр шөнөдөө оргон зайлав.

¹¹Дараа нь Саул Давидын гэр уруу элч нарыг илгээн түүнийг мануулж, өглөө болохоор түүнийг алах гэв. Гэтэл Давидын эхнэр Михал Давидад —Өнөө шөнө чи амиа аврахгүй бол маргааш алуулна гэжээ.

¹²Ийнхүү Михал түүнийг цонхоор буулгасанд тэрээр гадагш гараад оргон зугтав.

¹³Михал гэрийн шүтээнийг авч түүнийг орон дээр тавиад толгой дээр нь хэдэн ямааны үс тавин түүнийг хувцсаараа бүтээв.

¹⁴Давидыг барьж авчруулахаар Саул элч нарыг илгээсэнд Михал —Тэр өвчтэй гэж хэлэв.

¹⁵Тэгэхэд Саул, Давидтай уулзах элч нарыг дахин илгээхдээ тэдэнд —Түүнийг ор дэвсгэртэй нь надад авчрагтун. Би түүнийг ална гэв.

¹⁶Элч нар ортол, үзэгтүн, толгой хэсэгтээ ямааны үстэй гэрийн шүтээн орон дээр нь байв.

¹⁷Саул Михалд —Юунд чи намайг ингэж хуурч, миний өстөн дайсныг оргуулан, надаас түүнийг зугтаалгав? гэхэд Михал Саулд —Тэр “Намайг явуул, үгүй бол би чамайг ална” гэж надад хэлсэн билээ гэв.

¹⁸Давид оргон зугтааж, Рама уруу Самуел дээр ирээд Саул өөрт нь үйлдсэн бүгдийг Самуелд хэлэв. Тэрээр Самуелтай хамт Наиотод очиж суув.

¹⁹Саулд —Давид Рамагийн Наиотод байна гэж мэдэгдэв.

²⁰Тэгээд Саул Давидыг барьж авчруулахаар элч нарыг илгээв. Гэвч хэсэг эш үзүүлэгч эш үзүүлэн Самуел тэднийг удирдаж байхыг элч нар харахад, Бурханы Сүнс ч Саулын элч нарт бас ирж тэд мөн эш үзүүлэв.

²¹Саулд энэ тухай мэдэгдсэнд тэр өөр элч нарыг илгээсэн бөгөөд тэд ч мөн эш үзүүлэв. Ийнхүү Саул гурав дахь удаагаа элч нарыг илгээсэнд тэд ч мөн эш үзүүлэв.

²²Тэгээд Саул өөрөө Рама уруу явж, Сехуд байдаг нэгэн том усан сан болох худаг дээр ирэв. —Самуел, Давид нар хаана байна? гэж Саул асуусанд нэг хүн —Харагтун, тэд Рамагийн Наиотод байна гэж хэлэв.

²³Саул тэндээс Рамагийн Наиот уруу явсан ба түүнд Бурханы Сүнс ирж, тэрээр зүгээр эс байн Рамагийн Наиотод очих хүртэлээ эш үзүүлсээр явав.

²⁴Мөн тэрээр дээлээ тайлж, өдөржин шөнөжин Самуелын өмнө нүцгэнээрээ сунан хэвтэж эш үзүүлэв. Тиймээс хүмүүс —Саул ч бас эш үзүүлэгч юм уу? гэцгээдэг юм.