Read Ariun Bible 2013 – Ариун Библи 2013 1Самуел 20 Bible Online

1Самуел 20 - Ariun Bible 2013 – Ариун Библи 2013 bible

1Самуел 20

¹Давид, Рамагийн Наиотоос зугтан Ионатан уруу ирж —Би ямар хэрэг хийсэн юм бэ? Надад ямар хилэнц байна вэ? Би таны эцэгт ямар нүгэл үйлдсэн болоод тэр миний амийг эрнэ вэ? гэж хэлэв.

²Ионатан түүнд —Тийм явдал хол байг. Чи алагдах ёсгүй. Үзэгтүн, миний эцэг их бага ямар ч хэргийг надад дуулгалгүй үйлддэггүй юм. Тэгэхлээр энэ хэргийг миний эцэг надаас яагаад нуух билээ? Тийм юм байхгүй гэж хэлэв.

³Гэсэн ч Давид тангараглан[48] —Намайг таны нүдэнд тааллыг олсон гэдгийг таны эцэг сайн мэднэ. Тэр “Ионатаныг гомдоохгүйн тулд энэ хэргийг түүнд мэдүүлэхгүй байгтун” гэж хэлсэн билээ. ЭЗЭН амьд! Та ч бас амьд! Миний үхэл нэг алхмын зайнд ирээд байна гэж хэлэв.

⁴Ионатан, Давидад —Хэлсэн бүх санааг чинь чиний төлөө би гүйцэлдүүлье гэв.

⁵Тиймээс Давид, Ионатанд —Харагтун, маргааш шинэ сарын баяр тул би хаантай хамт зоогийн ширээнд суух ёстой. Гэвч намайг явуулж өгөөч. Гурав дахь өдрийн үдэш хүртэл талд нуугдъя.

⁶Хэрэв таны эцэг намайг сураглавал “Давид, Бетлехем хот уруугаа явахаар надаас хичээнгүйлэн гуйсан юм. Учир нь тэнд түүний бүх ураг төрлийнхний төлөө жилийн тахил өргөх ёслол болох ажээ” гэж хэлэгтүн.

⁷Хэрэв таны эцэг “зүйтэй” гэвэл таны боол аврагдана. Харин хэрэв тэр ихээр хилэгнэвэл тэр надад хорон мууг учруулахаар шийджээ гэдгийг мэдтүгэй.

⁸Иймээс боолдоо энэрэнгүй хандаач. Учир нь та ЭЗЭНд тангараглан боолтойгоо гэрээ байгуулсан билээ. Гэвч хэрэв надад хилэнц байвал та өөрөө намайг алагтун. Намайг эцэгтээ аваачиж өгөх ямар хэрэг танд байна вэ? гэв.

⁹Ионатан —Тийм явдал чамаас хол байг. Миний эцэг чамд хорон мууг үйлдэхээр шийджээ гэдгийг лавтай мэдвэл би чамд хэлж мэдүүлэхгүй гэж үү? гэхэд

¹⁰Давид, Ионатанд —Хэрэв таны эцэг танд хатуу хариу өгвөл хэн надад мэдүүлэх вэ? гэв.

¹¹Ионатан, Давидад —Явъя, хээр талд гаръя гэв. Тэгээд тэд хоёулаа хээр гарав.

¹²Тэгэхэд Ионатан Давидад —Израилийн Бурхан ЭЗЭН гэрч болог. Би маргааш эсвэл нөгөөдөр өдий үед эцгийнхээ санааг тандаж мэдье. Хэрэв Давидын талаар сайхан сэтгэлтэй байвал би хүн илгээж чамд дуулгахгүй гэж үү?

¹³Хэрэв миний эцэг чамд хорон мууг үйлдэхээр шийдсэн байвал үүнийг чихэнд чинь дуулгахгүй, чамайг эсэн мэнд зугтаалгахгүй бол ЭЗЭН, Ионатан намайг тийнхүү бас түүнээс ч илүүгээр шийтгэх болтугай. ЭЗЭН миний эцэгтэй хамт байсны адил чамтай ч хамт байх болтугай.

¹⁴Миний амьд ахуйд чи надад ЭЗЭНий хайр энэрлийг үзүүлэхгүй гэж үү? Намайг үхсэн ч бас

¹⁵ЭЗЭН, Давидын дайснаас нэгийг ч үлдээлгүй газрын хөрснөөс устгасан үед ч чи өөрийн хайр энэрлийг миний гэрээс үүрд бүү салгаг гэж хэлэв.

¹⁶Ионатан, Давидын гэртэй ийнхүү гэрээ байгуулаад —ЭЗЭН, Давидын дайснуудын гараас үүнийг нэхэг! гэв.[49]

¹⁷Ионатан, Давидад хайртай байсан тул түүгээр дахин тангараглуулав. Учир нь Ионатан өөрийн амийг хайрлах адил Давидыг хайрладаг байжээ.

¹⁸Ионатан, Давидад —Маргааш шинэ сарын баяр. Чиний суудал хоосон байх тул чамайг байхгүй гэдгийг мэдэх болно.

¹⁹Гурван өдөр болоход чи гарч яваад,[50] урьд нь нуугдаж байсан нөгөө газартаа очиж, Езелийн чулууны дэргэд байгтун.

²⁰Би бай харваж буй мэт тэр зүг уруу гурван сум тавина.

²¹За тэгээд, би нэгэн хөвгүүнийг явуулж, “Явж, сумнуудыг олж ир” гэж хэлнэ. Хэрэв би хөвгүүнд тусгайлан “Хар, сум чиний наад талд байна. Түүнийг авч ир” гэж хэлбэл чи гарч ирээрэй. ЭЗЭН амьд![51] Чамд ямар ч гай тотгор, аюул байхгүй.

²²Харин би залууд “Хар, сум чиний цаад талд байна” гэж хэлбэл чи яваарай. Учир нь ЭЗЭН чамайг явуулж байна.

²³Чи бид хоёрын ярьсан зүйлийн тухайд бол, харагтун, чи бид хоёрын дунд ЭЗЭН мөнх байг! гэж хэлэв.

²⁴Ингээд Давид хээр талд нуугдав. Шинэ сарын баяр болоход хаан зоогийн ширээнд суулаа.

²⁵Хаан заншил ёсоороо хананы дэргэд өөрийн суудалдаа суув. Ионатан босож, Саулын хажууд Абнер суусан ба Давидын суудал хоосон байв.

²⁶Гэсэн ч Саул тэр өдөр юу ч хэлсэнгүй. Учир нь тэр —Түүнд санаандгүй зүйл тохиолдож, тэр биеэ бузарласан биз гэж санажээ.

²⁷Дараагийн өдөр, шинэ сарын баярын хоёр дахь өдөр ч Давидын суудал хоосон байв. Ингээд Саул өөрийн хөвгүүн Ионатанаас —Яагаад Иессийн хөвгүүн өчигдөр ч, өнөөдөр ч зоогонд ирсэнгүй вэ? гэж асуув.

²⁸Тэгэхэд Ионатан, Саулд —Давид надаас Бетлехем уруу явъя гэж ихэд гуйсан юм.

²⁹Тэр “Манай төрөл төрөгсөд тэр хотод тахил өргөх ёстой бөгөөд миний ах намайг ирэхийг тушаасан учраас намайг явуулж өгнө үү? Хэрэв таны нүднээ би тааллыг олсон бол намайг явуулж, ах нартай минь уулзуулахыг гуйя” гэсэн билээ. Тийм учраас хааны зоогийн ширээнд Давид ирээгүй юм гэж хариулав.

³⁰Саул, Ионатанд ихэд хилэгнэн —Бузар тэрслүү эмийн хүү! Чи Иессийн хөвгүүнтэй шадарлаж, өөрийгөө шившиглэн эхийгээ ичгүүр болгож байгааг чинь би мэдэхгүй гэж бодож байна уу?

³¹Иессийн хөвгүүн энэ газар дээр амьд байгаа цагт чи ч, чиний хаанчлал ч тогтохгүй. Тийм учраас одоо хүн илгээж түүнийг надад авчир. Тэр заавал үхэх ёстой гэж хэлэв.

³²Харин Ионатан, эцэг Саулдаа хариулан —Яагаад тэр хүнийг алах ёстой юм бэ? Тэр хүн юу үйлдсэн юм бэ? гэж хэлэв.

³³Тэгэхэд Саул, Ионатаныг алахаар түүн уруу жад шидэв. Ийнхүү эцэг нь Давидыг алахаар шийдсэнийг Ионатан мэджээ.

³⁴Ионатан ихэд уурлан зоогийн ширээнээс босож, шинэ сарын баярын хоёр дахь өдөр зоог барьсангүй. Учир нь Давидыг түүний эцэг доромжилсонд Давидын төлөө сэтгэл нь зовж байв.

³⁵Өглөө болоход Ионатан бяцхан хөвгүүнийг дагуулан Давидтай болзсон цагтаа хээр тал уруу гарч явав.

³⁶Тэр, хөвгүүнд —Миний харвах гэж байгаа сумыг олж ир гэв. Хөвгүүнийг гүйж одоход Ионатан тэр хөвгүүний араас сумаа тавив.

³⁷Ионатаны сум харвасан газарт тэр хөвгүүн хүрч очиход Ионатан хөвгүүний араас дуудан —Сум чиний цаана чинь байна гэж хашхиран хэлэв.

³⁸Ионатан, хөвгүүний араас дуудаж —Хурдал, түргэл, зогсож болохгүй гэв. Ионатаны хөвгүүн сумыг түүн авч, эзэн дээрээ ирэв.

³⁹Гэвч хөвгүүн юу ч мэдээгүй ба зөвхөн Ионатан Давид хоёр л учрыг мэдэж байлаа.

⁴⁰Ионатан өөрийнхөө зэвсгийг хөвгүүнд өгч —Үүнийг хот уруу авч яв гэж хэлэв.

⁴¹Хөвгүүнийг явахад Давид өмнө зүгээс[52] гарч ирэн нүүрээрээ газар унаж, гурван удаа мөргөв. Тэд бие биенээ үнсэж, хамтдаа уйлсан ба Давид илүү ихээр уйлав.[53]

⁴²Ионатан, Давидад —Амар тайван явагтун. Чи бид хоёр “ЭЗЭН чи бид хоёрын дунд болон миний үр удам ба чиний үр удмын хооронд мөнхөд байг!” гэж ЭЗЭНий нэрээр бие биендээ тангарагласан билээ гэв. Тэгээд Давид босож явав. Ионатан хот уруу буцжээ.