Read Ariun Bible 2013 – Ариун Библи 2013 1Самуел 21 Bible Online

1Самуел 21 - Ariun Bible 2013 – Ариун Библи 2013 bible

1Самуел 21

¹Давид Нобт, тахилч Ахимелех уруу очив. Ахимелех цочирдон дагжсаар Давидыг угтан очиж, түүнд —Яагаад та хэнтэй ч биш, ганцаараа явж байна вэ? гэж асуув.

²Давид, тахилч Ахимелехт —Хаан нэг хэргийг тушааж, “Чамайг илгээж, чамд тушаах зүйлийг нэг ч хүнд мэдүүлж болохгүй” гэсэн тул залуустайгаа өөр нэгэн газарт уулзахаар болзсон гээд

³одоо чиний гарт юу байна вэ? Таван талх ч хамаагүй, юу байгаагаа надад өгөөч гэв.

⁴Тахилч, Давидад —Миний гарт жирийн талх алга. Гэсэн ч тавиг талх бий бөгөөд зөвхөн эмэгтэйчүүдтэй хавьтаагүй эрчүүд идэж болох юм гэж хариулав.

⁵Давид тахилч нарт —Намайг гарснаас хойш өдий хүртэл манайхан хоёр гурав хоног эмэгтэйчүүдийг цээрлэж ирсэн бөгөөд хэдийгээр энэ жирийн аялал боловч хүмүүсийн бие нь бузартаагүй. Өнөөдөр бүр ч илүү болох бус уу гэж хариу хэлэв.

⁶Тиймд тахилч түүнд ариусгаснаас өгөв. Учир нь халуун талх тавихаар, ЭЗЭНий өмнөөс салгаж авсан тавиг талхнаас өөр талх түүнд байсангүй.

⁷Тэр өдөр Саулын зарц нарын нэг нь тэнд ЭЗЭНий өмнө саатан үлдсэн байв. Түүний нэрийг Доег гэдэг байсан бөгөөд тэр Саулын хоньчдын ахлагч, едом хүн байв.

⁸Давид Ахимелехт —Энд чиний гарт жад, илд байхгүй юм уу? Би өөрийн илдээ ч, зэр зэвсгээ ч гартаа барьж ирсэнгүй. Учир нь хааны тушаал яаралтай байв гэлээ.

⁹Тэгэхэд тахилч —Үзэгтүн, Елагийн хөндийд чиний алсан филист хүн Голиатын илд нь ефодын ард даавуунд ороолттой байгаа. Хэрэв хүсвэл түүнийг өөртөө авагтун. Энд түүнээс өөр юм байхгүй гэж хэлэв. Давид —Тийм илдийг хаанаас ч олохгүй. Надад өгөгтүн гэв.

¹⁰Дараа нь Давид босож, тэр өдөр Саулаас зугтан Гатын хаан Ахиш уруу очив.

¹¹Гэтэл зарц нар нь Ахишт —Энэ хүн тэр нутгийн хаан Давид гэдэг нь биш үү? Тэд түүний тухай “Саул мянгыг, Давид түмийг алав” гэж дуулж бүжиглэдэг бус уу? гэцгээв.

¹²Давид энэ үгийг зүрхэндээ хүлээн авч, Гатын хаан Ахишаас ихэд айж эмээв.

¹³Ийнхүү Давид тэдний өмнө эрүүл саруул ухаантайгаа нуун галзуу солиотой юм шиг байж, хаалганы[54] самбар дээр юм сараачин, сахал уруугаа шүлсээ гоожуулав.

¹⁴Тэгэхэд Ахиш зарц нартаа —Та нарын харж байгаа энэ хүн галзуу солиотой юм шиг байна. Юунд та нар түүнийг над уруу авчрав?

¹⁵Би галзуу солиотой хүнээр дутлаа гээд та нар миний өмнө энэ нэг юмыг үзүүлэхээр авчрав уу? Үүнийг миний гэрт оруулах гээ юү? гэж хэлэв.