Read Ariun Bible 2013 – Ариун Библи 2013 1Самуел 3 Bible Online

1Самуел 3 - Ariun Bible 2013 – Ариун Библи 2013 bible

1Самуел 3

¹Балчир хөвгүүн Самуел, Елигийн дор ЭЗЭНд үйлчилж байв. Тэр өдрүүдэд ЭЗЭНий үг ховор, үзэгдлүүд ч цөөн байв.

²Нүд нь муудаж эхэлсэн бөгөөд сайн харж чадахгүй болсон Ели өөрийнхөө газарт хэвтэж байх тэр цагт

³Бурханы дэнлүү хараахан унтраагүй байсан агаад Бурханы авдар орших ЭЗЭНий сүмд Самуел хэвтэж байв.

⁴ЭЗЭН, Самуелыг дуудахад —Би энд байна гэж тэр хэлэв.

⁵Тэгээд тэр Ели уруу гүйж очин —Та намайг дуудсан тул би энд байна гэв. Харин Ели —Би дуудаагүй, буцаад хэвт гэсэнд Самуел яваад хэвтэв.

⁶ЭЗЭН дахин —Самуел! гэж дуудав. Тиймээс Самуел босож, Ели уруу очин —Та намайг дуудсан тул би энд байна гэв. Гэвч Ели —Би дуудаагүй. Хүү минь, буцаад хэвт гэв.

⁷Самуел ЭЗЭНийг хараахан мэддэггүй, ЭЗЭНий үг ч түүнд илэрхийлэгдээгүй байжээ.

⁸ЭЗЭН гурав дахь удаа Самуелыг дахин дуудахад Самуел босож, Ели уруу очин —Та намайг дуудсан учир би энд байна гэв. Тэгэхэд Ели балчир хөвгүүнийг ЭЗЭН дуудаж байжээ гэдгийг ажиж мэдэв.

⁹Тиймээс Ели Самуелд —Яв, хэвтэж амар. Хэрэв Тэр чамайг дуудвал чи “ЭЗЭН минь, айлдаж хайрла. Боол тань сонсож байна” гэж хариул гэв. Ингээд Самуел явж, байрандаа хэвтэв.

¹⁰Тэгэхэд нь ЭЗЭН ирж, дэргэд нь зогсоод, урьдын адил —Самуел аа, Самуел аа! гэж дуудав. Самуел —Айлдаж хайрла. Боол тань сонсож байна гэв.

¹¹ЭЗЭН, Самуелд —Харагтун! Би Израильд нэгэн зүйлийг үйлдэх ба үүнийг сонссон бүхний хоёр чих нь хангинах болно.

¹²Тэр өдөр Би Ели дээр, түүний гэрийн эсрэг Өөрийн айлдсан бүхнээ эхнээс нь дуустал буулгана.

¹³Түүний хөвгүүд өөрсдөдөө хараал авчирсан бөгөөд тэр тэднийг хазаарлаагүй тул түүний мэдсэн хилэнцийн учир өөрийнх нь гэрийг мөнхөд шийтгэхээр зэхэж байгаа хэмээн Би түүнд хэлсэн[8] билээ.

¹⁴Тиймээс Би Елигийн гэрийн хилэнц нь өргөлөөр ч, тахилаар ч мөнхөд арчигдан цэвэрлэгдэхгүй гэж Елигийн гэрт андгайлав гэлээ.

¹⁵Тэгээд Самуел өглөө хүртэл хэвтэв. Дараа нь ЭЗЭНий өргөөний хаалгыг тэр нээлээ. Самуел энэхүү үзэгдлийг Елид ярихаас айв.

¹⁶Тэгэхэд нь Ели, Самуелыг дуудаж —Миний хүү, Самуел аа гэв. Самуел —Би энд байна гэлээ.

¹⁷Ели —Чамд айлдсан үг нь юу вэ? Надаас юу ч бүү нуу. Хэрэв чи Түүний чамд хэлсэн бүх үгнээс аль нэгийг нь нуувал, Бурхан чамд ийн үйлдэж, тийн нэмэг гэв.

¹⁸Тэгэхэд Самуел юу ч нуулгүй үг бүрийг түүнд мэдүүлэв. Тэгээд Ели —Тэр ЭЗЭН мөн. Мэлмийдээ юу тааламжтай гэснээ Тэр үйлдэг! гэв.

¹⁹Самуелыг өсөж торниход ЭЗЭН түүнтэй хамт байж, түүний үгнээс нэг нь ч хөсөр хаягдсангүй.

²⁰Самуелыг ЭЗЭНий эш үзүүлэгч мөн болохыг Данаас Беершеба хүртэлх Израиль даяар мэдэв.

²¹ЭЗЭН, Шилод үзэгдэж байсан бөгөөд Шилод Өөрийнхөө үгээр Өөрийгөө Самуелд илчилсэн юм.