Read Ariun Bible 2013 – Ариун Библи 2013 1Самуел 31 Bible Online

1Самуел 31 - Ariun Bible 2013 – Ариун Библи 2013 bible

1Самуел 31

¹Филистчүүд Израилийн эсрэг тулалдахад Израилийн эрчүүд филистчүүдээс зугтаж, Гилбоа ууланд хиаран унав.

²Филистчүүд Саул болон түүний хөвгүүдийг гүйцэн авч, Саулын хөвгүүн болох Ионатан, Абинадаб, Малхи-шуа нарыг алжээ.

³Тулалдаан Саулын эсрэг улам ширүүсэж харваачид түүнийг оносонд тэр хүнд шархдав.

⁴Тэгээд Саул өөрийн зэвсэг үүрэгчдээ —Чи илдээ сугалан намайг хатгаж ал. Эс тэгвэл хозлуулаагүй эдгээр хүмүүс ирж, намайг хатган алж, доромжлол болгох болно гэж хэлэв. Гэвч зэвсэг үүрэгч нь ихэд айсан тул үүнийг гүйцэтгэж чадсангүй. Тиймээс Саул илдээ авч, өөрөө дээрээс нь унав.

⁵Зэвсэг үүрэгч нь Саулын үхсэнийг үзээд өөрийнхөө илдний дээрээс унаж, Саулын дэргэд үхэв.

⁶Ийнхүү тэр өдөр Саул гурван хөвгүүнтэйгээ, зэвсэг үүрэгчтэйгээ бүх хүмүүсийнхээ хамт үхэв.

⁷Хөндийн нөгөө талд болон Иорданы цаад талд байсан израиль хүмүүс, Израилийн эрчүүдийг зугтахыг мөн Саул болон түүний хөвгүүдийн үхсэнийг хараад өөрсдийн хотуудыг орхиж, зугтав. Тэгээд филистчүүд ирж тэнд нь суужээ.

⁸Дараа өдөр нь филистчүүд алагдагсдыг тонохоор ирэхдээ Саул болон түүний гурван хөвгүүнийг Гилбоа ууланд үхсэн байхыг олж харав.

⁹Тэд Саулын толгойг огтлон зэвсгийг нь мултлан авч, өөрсдийн шүтээнүүдийн сүмүүд ба ардуудад сайхан мэдээ хүргэхээр тэдгээрийг Филистийн бүх нутагт илгээжээ.

¹⁰Тэд Саулын зэвсгийг Ашторэтын дуганд тавьж, түүний цогцсыг Бет-шаны хэрмэн хананд өлгөв.

¹¹Саулыг филистчүүд хэрхсэнийг Иабеш-гилеадын оршин суугчид сонсоод,

¹²бүх эр зоригт баатрууд нь босож, бүхэл шөнийн туршид алхсаар Саулын цогцос бас хөвгүүдийнх нь цогцсыг ч Бет-шаны ханан хэрэмнээс авч, Иабешт авчраад тэнд шатаав.

¹³Тэгээд тэдний ясыг авч, Иабеш дахь сухай модны доор хөдөөлүүлэн долоо хоног мацаг барив.