Read Ariun Bible 2013 – Ариун Библи 2013 1Самуел 4 Bible Online

1Самуел 4 - Ariun Bible 2013 – Ариун Библи 2013 bible

1Самуел 4

¹Ийнхүү Самуелын үг Израиль даяар тархав. Израиль филистчүүдтэй[9] тулалдахаар гарч, Ебенезерийн дэргэд хуарагнан, харин филистчүүд Афект хуарагнан буув.

²Филистчүүд Израильтай учран тулалдахаар жагсаж ирсэн бөгөөд тулаан газар авахад Израиль филистчүүдэд цохигдон филистчүүд хээр талд тэдний цэргээс дөрвөн мянга орчим хүнийг алав.

³Ард олныг хуаранд буцаж ирэхэд Израилийн ахмадууд —ЭЗЭН яагаад өнөөдөр биднийг филистчүүдийн өмнө цохиулсан бэ? Шилогоос ЭЗЭНий гэрээний авдрыг өөрсдөдөө авчиръя. Тэгвэл Тэр[10] бидний дунд ирж, биднийг дайснуудын гараас аврах юм гэж хэлжээ.

⁴Тиймээс ард олон Шило уруу хүмүүсийг илгээж, херубуудын дээр орших түг түмдийн ЭЗЭНий гэрээний авдрыг тэндээс авч ирэв. Елигийн хоёр хөвгүүн Хофни, Финехас нар Бурханы гэрээний авдрын хамт тэнд ирлээ.

⁵ЭЗЭНий гэрээний авдрыг хуаранд оруулж ирэхэд бүх Израиль газар доргион хүнгэнүүлсэн их дуугаар уухайлан хашхирав.

⁶Филистчүүд тэр дуу чимээг сонсоод —Еврейчүүдийн хуаранд юун сүртэй уухай гарах нь энэ вэ? гэлцэв. Тэгээд ЭЗЭНий гэрээний авдрыг хуаранд оруулж ирснийг тэд мэдлээ.

⁷Филистчүүд —Бурхад тэдний хуаранд залран ирлээ хэмээлдэн түгшицгээв. Тэгээд —Урьд нь ийм юм тохиолдож байгаагүй тул бид золгүй еэ!

⁸Бид золгүй еэ! Хэн биднийг энэ агуу хүчит бурхдын мутраас мултлан аврах вэ? Эдгээр нь египетчүүдийг элдэв төрлийн гамшгаар цөлд цохисон бурхад мөн билээ.

⁹Филистчүүд ээ, зоригтой, эрэлхэг байгтун. Эс тэгвээс еврейчүүд та нарын боол байсны адил та нар еврейчүүдийн боол болно. Эрэлхэг байж, тулалдагтун гэлцэв.

¹⁰Тэгээд филистчүүд тулалдсанд Израиль цохигдон хүн бүр майхан уруугаа зугтав. Израилиас гучин мянган явган цэрэг хөсөр унасан нь аймшигтай том ялагдал байлаа.

¹¹Бурханы авдар булаагдаж, Елигийн хоёр хөвгүүн Хофни, Финехас нар ч алуулав.

¹²Нэгэн бениамин хүн тулалдааны тэргүүн шугамаас зугтан тэр өдрөө Шилод ирэв. Тэр хувцсаа урж, толгойдоо шороо цацсан байлаа.

¹³Хараач, түүнийг ирэхэд Ели замын хажуу талын сандал дээр суун зүрх нь Бурханы авдрын төлөө түгшиж байсан учир тэр анхааран харуулдаж байлаа. Өнөөх хүн хот уруу орж мэдээг дуулгахад хотынхон бүгд бархиран хашхиралдав.

¹⁴Ели уйлалдах дууг сонсоод —Энэ юун дуу шуугиан бэ? гэсэнд өнөөх хүн яаравчлан ирж Елид мэдүүлэв.

¹⁵Ели ерэн найман настай бөгөөд нүд нь харанхуйлан юм үзэхээ больсон байв.

¹⁶Өнөөх хүн Елид —Би тулалдаанаас ирээд байгаа нэгэн байна. Би өнөөдөр тулалдааны талбараас зугтаж ирлээ гэсэнд Ели —Юу болсон бэ? Хүү минь гэж асуув.

¹⁷Тэгэхэд мэдээ хүргэгч —Израиль филистчүүдээс зугтааж, ард олны дунд их аллага болж, таны хоёр хүү Хофни, Финехас нар үхэж, Бурханы авдар булаагдав гэж хариуллаа.

¹⁸Түүнийг Бурханы авдрын тухай дурдахад Ели хаалганы хажууд буй сандал дээрээсээ гэдрэг унан хүзүүгээ хугалж үхэв. Учир нь тэр өтөл настай лагс биетэй хүн байжээ. Тэрээр дөчин жил Израилийг шүүжээ.

¹⁹Түүний бэр, Финехасын эхнэр жирэмсэн, төрөх дөхсөн байлаа. Бурханы авдар булаагдаж, хадам эцэг болон нөхөр нь үхсэн тухай мэдээг сонсонгуут төрөх өвдөлт нь эхэлж, тэрээр сөхөрч суун хүүхдээ төрүүлэв.

²⁰Тэр эмэгтэйг үхэх гэж байхад тэнд байсан эмэгтэйчүүд —Чи хөвгүүн төрүүлсэн тул бүү ай гэж хэлсэн боловч тэр юу ч хариулсангүй, зүрх сэтгэл нь ч хөдөлсөнгүй.

²¹Бурханы авдар булаагдсанаас болон хадам эцэг бас нөхрийнхөө улмаас тэр эмэгтэй —Алдар нь Израилиас салж одов гээд хөвгүүнээ Ихабод[11] гэж нэрлэв.

²²Тэрээр —Бурханы авдар булаагдсанаас болж алдар нь Израилиас салж одов гэжээ.