Read Ateso Ageun 11 Bible Online

Ageun 11 - Ateso bible

Ageun 11

¹ Akwap kere ajai aŋajep adiopet, ka einer ediopet.

² Kosodete kobwota kesi kide, kodumut apuuton kakwap naka Sinar; kiboioto kanen.

³Kotemanaros atiar, “Tkatuna, keswamata amatapalin, kecweata cut.” Kojaas kamatapalin aibois naka amor; alupot da aibois naka elupe.

⁴ Kinerasi atiar, “Ikatuŋa, kadukoto ere ka etogo loeoja noi, loedoli aidike toma akuj, kadumuniata ekiror; kenyeis aisiarakin akwap kere.”

⁵ Kodoku EJAKAIT kwap aanyun ere ka etogo loeoja noi loadukete idwe luka ituŋa.

⁶ Kotema EJAKAIT atiar, “Koany, eraas ŋulluka adiopeteker, ido eraas kesi kere luka aŋajep adiopet, ido napena ŋes egeunito kesi aswam; emamei do ibore yenekurwokini kes, yenekotosi aswam.

⁷ Aso, kadokasi kwap, kenyalinyalatakanen aŋajepakec, kinye ŋinituŋanan ajenun einer loka yenice.”

⁸ Kwaŋin kisiarak EJAKAIT kes cut anyoun kaŋina kikaaros akwap kere: kinyeis kesi aiduk ere.

⁹ Ŋes kemaikinere ekekiror Babel, naarai kanen ŋes enyalinyalia EJAKAIT aŋajep naka akwap kere; ido kaŋina kisiarak kes EJAKAIT akwap kere.

¹⁰ Na ŋes aur naka Sem. Adaunit Sem ikar akwatat, kouru Arupakusad ikar iarei akaulo kakalele.

¹¹Kodau Sem ikar akwat akany kedau aur Arupakusad, kouri idwe lusap ka lupesur.

¹² Kodau Arupakusad ikar akaisauni ka lukany, kouru Sela;

¹³Kodau Arupakusad ikar akwat aoŋon ka iuni, kedau aur Sela, kouri idwe lusap ka lupesur.

¹⁴Kodau Sela ikar akaisauni, kouru Eber:

¹⁵Kodau Sela ikar akwat aoŋon ka iuni kedau aur Eber, kouri idwe lusap ka lupesur.

¹⁶ Kodau Eber ikar akaisauni ka luoŋon, kouru Peleg:

¹⁷Kodau Eber ikar akwat aoŋon ka akaisauni kedau aur Peleg, kouri idwe lusap ka lupesur.

¹⁸Kodau Peleg ikar akaisauni, kouru Reu;

¹⁹Kodau Peleg ikar akwat aarei ka ikanykaoŋon kedau aur Reu, kouri idwe lusap ka lupesur.

²⁰Kodau Reu ikar akaisauni ka luarei, kouru Serug;

²¹Kodau Reu ikar akwat aarei ka ikanykaarei kedau aur Serug; kouri idwe lusap ka lupesur.

²²Kodau Serug ikar akaisauni, kouru Nakor;

²³Kodau Serug ikar akwat aarei kedau aur Nakor, kouri idwe lusap ka lupesur.

²⁴Kodau Nakor ikar akaisaarei ka lukanykaoŋon, kouru Tera:

²⁵Kodau Nakor ikar akwatat ka itomon ka lukanykaoŋon kedau aur Tera, kouri idwe lusap ka lupesur.

²⁶ Kodau Tera ikar akaisakanykaarei, kouri Aburam, ka Nakor, ka Karan.

²⁷ Na ŋes aur naka Tera. Tera kouri Aburam, ka Nakor, ka Karan; Karan kouru Lot.

²⁸Kotwanik Karan neejai papake Tera toma akwap naaurikinio ŋes, toma Ur akwap naka Ikaludean.

²⁹ Komanyata Aburam ka Nakor aŋor, ekiror loka aberu naka Aburam ŋes Sarai; ka ekiror loka aberu naka Nakor, Miluka, akokuke ka Karan, papake ka Miluka, ido papa loka Isika.

³⁰ Kerai Sarai arakan; komamei ŋes ikoku.

³¹ Koyaŋa Tera Aburam okokuke, ka Lot okoku loka Karan, opapaitike, ka Sarai aberu naka okokuke; konyout kesi kakwap naka Ur naka Ikaludean alosit toma akwap naka Kanaan; kodoloto Karan, kiboienenete kanen.

³²Apaarasia nuka Tera kes ikar akwat aarei ka ikany: kotwanik Tera Karan.