Read Ateso Ageun 17 Bible Online

Ageun 17 - Ateso bible

Ageun 17

¹ Nakeraar Aburam loka ikar akaisakanykaoŋon ka lukanykaoŋon, kitaanyikin Edeke Aburam, kobala ebe, “Bon Edeke Lokapedor kere, kolosenenei kakonyeneka, koluor ekadoliton.

² Etutuki eoŋ akaitutuket kajo, kesupui da noi adepar.”

³ Kibiror Aburam ebuburia: kinera Edeke kaŋes atiar,

⁴“Eoŋ da, koany, ejai aitutuketeka kajo, iraun ijo da papa loka atekerin nuipu.

⁵ Mam bobo kinyaritai ekonikiror Aburam, konye eraun do ekonikiror Aburaam; naarai ketuluo jo papa loka atekerin nuipu.

⁶Kesupui da noi adepar, ketuluori jo atekerin, elomunete da ikabakan kotomakon.

⁷ Etogogoŋi da akaitutuket eoŋ ka jo ka akoniwur naetupanakini, anatar aturioke kere, araun aitutuket namam enaŋi, araun Edeke kaneijai ijo ka akoniwur da naetupanakini.

⁸ Ido kainakin jo ka akoniwur naetupanakini akwap nakiloseneneo, akwap kere naka Kanaan, airum ikar kere; Eoŋ da araun Edekekec.”

⁹ Kotema Edeke Aburaam atiar, “Ijo da, irici akaitutuket, ijo ka akoniwur naetupanakini anatar aturiokec kere.

¹⁰ Na ŋes akaitutuket, nairicenenete, kidiŋ eoŋ ka jo ka akoniwur naetupanakini; Ekepeneneo ŋolikiliokit kotomakus.

¹¹ Ido kikepeneneo amuny naka ekiliokanekus; eraun da ŋin aanyunet naka aitutuket kidiŋ eoŋ ka yes.

¹² Ekepeneneo kotomakus yenedaunit apaarasia akanykauni; ŋolikiliokit kotoma aturiokus, loewurikinio okal, ka ŋol da lokitwegelete imo kapesan, lomere loka aurikon.

¹³Loeurio kokalekon, ka ŋol da loegweleneneo kapesanakon, ibusakinit akepio. Ejaununei da akaitutuket toma awatekus araun aitutuket namam edaun.

¹⁴ Ekiliokit da lomam ekepep amuny naka ekiliokaneke, abil ŋol aitutuketeka, egelario etuŋanan ŋol kotuŋake.”

¹⁵Kotema Edeke Aburaam atiar, “Akoniberu Sarai, mam bobo inyarit ekekiror Sarai, konye Sara[8] ŋes do ekekiror.

¹⁶ Eoŋ da esirereŋi ŋes, ido kainakini jo ikoku kamake: eebo, esirereŋi ŋes: eraun da toto naka atekerin; elomunete ikabakan luka ituŋa kotomake.”

¹⁷ Kopaari Aburaam aibirokin ebuburia, kokieni, kinera kotauke ebe, “Euruuni ŋopeŋol ikoku loadau ikar akwatat? Ido ka Sara da naadau ikar akaisakanykaoŋon, eurie?”

¹⁸Kotema Aburaam Edeke atiar, “Arai gwai Isimael eraun lokajaran kakonyenekon!”

¹⁹ Kotema Edeke atiar, “Mam, konye kiwurikin Sara aberukon ikoku; imaikini ijo da ekekiror Isaak; [9] ka eoŋ da etogogoŋi akaitutuket kaŋes araun aitutuket namam edaun mama ejai aurike naetupanakini.

²⁰ Kanuka Isimael keira jo; koany, esireren ŋes, ido esupui, ido eyatakin noi; euriei ijaka itomon ka luarei, ido etuluori ateker naepol.

²¹ Konye etogogoŋi akaitutuket kama ejai Isaak, lokiwurikini Sara kapak kanapekana kokaru kaloebunit.”

²² Kinye einer kaŋes, konyou Edeke kama ejai Aburaam.

²³ Koya Aburaam ikekoku Isimael, ka ŋul kere luaurikinio okaleke, ka ŋul kere luagwelio kikeboro, ŋolikiliokit kotoma otuŋa lukokal loka Aburaam, kokep kes kapaaran kaŋin amuny naka ekiliokanekec, kwape ketemaria ŋes Edeke.

²⁴Kodaunite Aburaam ikar akaisakanykaoŋon ka lukanykaoŋon, nakekepere amuny naka ekiliokaneke.

²⁵Adaunit okokuke da Isimael ikar itomon ka luuni, nakekepere amuny naka ekiliokaneke.

²⁶ Kapaaran kaŋin kokepai Aburaam ka okokuke Isimael.

²⁷ Ikiliok kere lukokaleke ka luaurikinio okal, ka ŋul lukitwegelenenete imo kiboro, kokepai nepepe kaŋes,