Read Ateso Ageun 2 Bible Online

Ageun 2 - Ateso bible

Ageun 2

¹Kodaun aisub akuj ka akwap, ka ajoresiokec kere.

² Kapaaran nakikanyetekaarei kodaunite Edeke aisubuke nakesubi.

³ Kisirereŋ Edeke apaaran nakikanyetekaarei, kitalau; naarai ŋipeŋin ŋes ebworaria kaisubuke kere nakesubi Edeke, nakiswamai.

⁴Ŋol ŋes esube loka akuj, ido loka akwap naasubere. Kapaaran nakesubia EJAKAIT Edeke akwap ka akuj,

⁵ ido koriŋa ejauna luebwanete luka ais kakwap, koroko da ebwanuna ikui luka ais; naarai mam EJAKAIT Edeke kitetepit akiru kakwap, komamei ituŋanan yenekoriei akwap.

⁶Konye kopurionori elisina kokwap, kitapapalenenei akwap kere.

⁷ Kosub EJAKAIT Edeke etuŋanan kapua naka akwap, kokutak eiyeŋane loka aijar okumesike; koraun etuŋanan etau lokajaran.

⁸ Kiraik EJAKAIT Edeke emanikor ari nakokide, toma Eden; kibwaik nen etuŋanan lokesubi ŋesi.

⁹ Kitabwan EJAKAIT Edeke kakwap ŋolikitoi loisiyalamikinit akonyen, loejok ainyam; ekitoi loka aijar da kokidiŋ omanikor, ka ekitoi da loka ajenun nuejok ka nueroko.

¹⁰ Kolom ecor kotoma Eden, aitapapal emanikor; ido kanen kotiakas koraunos icorin iwoŋon.

¹¹ Losodit ekekiror Pison; ŋol ŋes loirimorit akwap kere naka Kabila, naejai esabu.

¹²Esabu da loka akwap kaŋin ejokuna; ejai nen ebedelium [1] ka amor nuemelomeloto.

¹³Ecor lokiareit da ekekiror Gikon: ŋol ŋes loirimorit akwap kere naka Kus.

¹⁴ Ecor lokiwuniet da ekekiror Kidekel, ŋol ŋes loelosi kari nakokide naka Asuria; ka ecor lokiwoŋonet ŋes Eupurat.

¹⁵Koyaŋa EJAKAIT Edeke etuŋanan, kibwaik ŋes toma omanikor loka Eden, akorienen ka aidar ŋes.

¹⁶Kicorak EJAKAIT Edeke etuŋanan ebe, “Inyamenenei kwape ikotor araito nuka ŋolikitoi lokomanikor:

¹⁷dimarai mam inyami nuka ekitoi loka ajenun nuejok ka nueroko: naarai kapaaran nainyamia ŋun itwani cut.”

¹⁸Kobala EJAKAIT Edeke ebe, “Mam ejok etuŋanan ajakut bon; asubakini eoŋ ŋes ikenarakinan yenibusakinit.”

¹⁹ Kosodi kosubak EJAKAIT Edeke toma akwap ŋolitiaŋ loka ais, ka lueporitos kotoma apak; koyau kes neejai etuŋanan aanyun kwape emaanakinia ikecekiroriajido ŋolikiror kere lokemaikin etuŋanan ŋinibore yenikajaran, koraun ŋol ekekiror.

²⁰Komaanak etuŋanan ibaren kere ikiroria, ka lueporitos kapak, ka itiaŋ kere luka ais. Konye komam etuŋanan edumakina ikenarakinan yenibusakinit.

²¹ Kitojoto EJAKAIT Edeke etuŋanan ajo nuipu, kojotoor; koditu amaran adiopet, kinyakak akiriŋ toma aiboisike.

²² Kosub EJAKAIT Edeke aberu kamaran kaŋin naadituni kotuŋanan, koyau ŋes neejai etuŋanan.

²³ Kobala etuŋanan ebe, “Na ŋes akoit naka akojoka, Ido ŋes akiriŋ naka akiriŋika: enyarao ŋes Aberu, naarai aditunio kotuŋanan.”

²⁴ Ŋes inyeinia ekiliokit papake ka totoke, kiketakin neejai akeberu: koraut adiopekuan.

²⁵ Emujalalas kesi kere, etuŋanan ka akeberu, komam ileicikinito.