Read Ateso Ageun 20 Bible Online

Ageun 20 - Ateso bible

Ageun 20

¹ Konyou Aburaam kaŋina kolot akwap naka ari naka Eŋalakimak, kiboikin kidiŋ ka Kades ka Sur; kiboikin toma Gerar.

² Kinera Aburaam nuka Sara aberuke ebe, “ŋes kinacika.” Ido kiyakia Abimelek ekabaka loka Gerar, koyaŋa Sara.

³ Kobu Edeke mama ejai Abimelek kotoma airuja naka akuare, kolimok ebe, “Koany, irai ijo bala ekatwan, kanuka aberu naibu koyaŋa, naarai ejai ŋes okilenike.”

⁴ Ido eroko Abimelek ikunyakina neejai ŋesi; kotema atiar, “EJAKAIT, ibuni aiar ateker karaida kedolit?

⁵Mam abu elopet kotema atiar, ‘Ŋes kinacika’? Aberu da alopet kotema atiar, ‘Ŋes onaceka.’ Eswamai eoŋ ŋin ketau loedolit, ka akanin nuemameete aronis.”

⁶ Kolimok Edeke ŋes kairujasit ebe, “Eebo, ajeni ebe iswamai ŋun ketau loedojit, ŋes ketikokinia kinye amunaun kaneajai eoŋ: ŋes da kesimikia atiror ŋes.

⁷ Aso kinyaka aberu naka etuŋanan, naarai erai ŋesi enabi, ŋes da kilipakini, ijo da ijari; konye arai mam inyakarit, kojen ebe mam iswaki atwanare, ijo ka luijaatar kere.”

⁸Konyou Abimelek tupuruc sek, konyarau ikekejaanakinak kere, kolimok ŋun kere akikec: kokuriakaros ituŋa noi.

⁹ Konyarau Abimelek Aburaam, kiŋit ebe, “Kiswamak anyoika? Adiaka anyoika kamakon, tape kiinuni eoŋ ka akajakanut da adiakaret naepol? Kiswamak numam ibusakinit aiswamakinio.”

¹⁰Kotema Abimelek Aburaam atiar, “Ibu koany anyoika, nukiinakinete aswam kwaŋin?”

¹¹ Kotema Aburaam atiar, “Naarai abu kaomite ebe, emamei cut aiyoŋ Edeke kaibois kana; ido da kapedorete aiar eoŋ kanuka akaberu.

¹² Abeit erai kinacika, akoku naka papaka, konye mere akoku naka totoka; koraun do akaberu.

¹³ Kosodi ketolot Edeke anyoun kotogo loka papaka, kasodi alimokin ŋes ebe, ‘Na ŋes arerenukon nakitodianakini eoŋ: kotoma ŋiniibois nakidolenenei kinerenena mama ajai eoŋ ebe erai onaceka.’ ”

¹⁴ Koyaŋa Abimelek amerekekin ka aituk ka ibulesin ka abulesin, koinak Aburaam, kinyakak ŋes akeberu Sara.

¹⁵ Kotema Abimelek atiar, “Koany, akwapuka ejai akonyenekon; kiboikin neikoto ijo kere.”

¹⁶ Kolimok Sara da atiar, “Koany, ainak onacekon iboro elukumit luka epuesa: koany, ŋes yenirapakina akonyenekon kama ejaas ŋul kere luejaas kajo; ido toma akiro kere kigeli.”

¹⁷ Kilip Aburaam Edeke; kitaŋaleu Edeke Abimelek ka aberuke, ka abulesinike; kouriata idwe.

¹⁸ Naarai kegolokinit EJAKAIT akoikes kere nukokalloka Abimelek, kanuka Sara aberu naka Aburaam.