Read Ateso Ageun 21 Bible Online

Ageun 21 - Ateso bible

Ageun 21

¹ Koanyana EJAKAIT Sara kwape kinerar, ido kiswamak EJAKAIT Sara kwape alimokinia.

² Kopotuu Sara, kourik Aburaam ikoku yenitelepat, kemojoŋ, toma apak ŋin nakelimokinit ŋes Edeke.

³ Komaik Aburaam ikoku yenaurikini Sara ekekiror Isaak.

⁴ Kokep Aburaam okokuke Isaak kedau apaarasia akanykauni, kwape ecorakinitor ŋes Edeke.

⁵Ido adaunit Aburaam ikar akwatat eurikinio ŋes ikokuke Isaak.

⁶ Kotema Sara atiar, “Ketekien Edeke, ŋinituŋanan yeniirari kikienenei keoŋ.”

⁷ Kotema atiar, “Iŋai ŋol lo tiketema Aburaam ebe, ‘Ebuni Sara aitanak ikedwe’? Naarai aurik ŋes ikoku yenitelepat kamoionuke.”

⁸Kopoloor ikoku, kojaka: kipo Aburaam epucit loepol kapaaran kanaajakaria Isaak.

⁹ Koany Sara ikoku yenika Kagar Amisiriat yenaurikini Aburaam, isekelo.

¹⁰ Ŋes ketemaria Sara Aburaam atiar, “Kireŋea abulesit na ka ikekoku, naarai ikoku yenika abulesit kana mam epedori araun ekeruman nepepe kikakoku, ŋes Isaak.”

¹¹ Korau akirot ŋin naapagal noi kakonyen nuka Aburaam kanuka ikekoku.

¹² Kotema Edeke Aburaam atiar, “Kinye araut naepagal kakonyenekon kanuka ikoku, ido kanuka abulesitikon; kere nukilimokini Sara, kopupununei eporotoke; naarai kotoma Isaak ŋes enyaraununere akoniwur;

¹³ Ido kotoma okoku loka abulesit elomuni ateker, naarai ŋes aurikon.”

¹⁴ Konyou Aburaam tupuruc sek, kolem aimuj ka eriagi loka emukule loka akipi, koinak Kagar, kibwaik okeperike, ka ikoku da, kotwar: kolot ipasitoi toma amodiŋ naka Beer-seba.

¹⁵ Kodaunos akip nukotoma omukule, kirupak ŋesi ikoku amoni;

¹⁶ Kikunyak, kiboikin kwap kobwatara bala apak naegumario ekojo: naarai abu kobala ebe, “Sirikete ikoku etwani.” Kiboikin kobwatara, kodelo, komony.

¹⁷ Kiira Edeke eporoto loka etelepat, kiworo emalaika loka Edeke Kagar ebuni kokuju, kotema atiar, “Inyo bo itururwoo ijo? Sirikikurianar; naarai eira Edeke eporoto loka etelepat kaneejai.

¹⁸ Konyou, kitonyou etelepat, kitiŋ kakonikan; naarai abuni aituluor ŋes ateker naepol.”

¹⁹ Kitekweny Edeke akekonye, koany atan naka akipi; kolot kileleb akipi toma oriagi, kitamat etelepat.

²⁰ Kojai Edeke nepepe ketelepat, kopoloor; kiboienenei kamodiŋ, koluor ekaguman imalia.

²¹ Kiboienenei kamodiŋ naka Paran; komanyak totoke ŋes aberu kotoma akwap nako Misiri.

²² Kosodi kapakio kaŋun apotu Abimelek ka Pikol ekapolon loka ajoreke kolimokis Aburaam ebe, “Ejai Edeke nepepe kajo kotoma kanuiswamai kere;

²³ Aso kiyapoikinoi kane kokiror loka Edeke ebe, Mam kimodakin eoŋ, karaida okokuka, karaida okoku loka okokuka; konye kwape ejaar asianut naabu keswamak, ijo da kiswamakinai eoŋ kwaŋin, ka akwap da nakiboieneneo.”

²⁴Kotema Aburaam atiar, “Eyapoi.”

²⁵ Kitoron Aburaam Abimelek kanuka Atan naka akipi, naapotu ibulesin luka Abimelek kodemasi kagogoŋ.

²⁶Kotema Abimelek atiar, “Mam ajeni yenikiswamai kwaŋin; ido mam lem jo kisiiranari eoŋ, ido mam apupununei, dimarai akiirar ŋes lolo.”

²⁷ Koyaŋa Aburaam amerekekin ka imoŋin koinak Abimelek; kitutukoto aitutuket kes iarei.

²⁸Kibwaik Aburaam amerekekin akanykaarei nukotoma osipan owaikec bonik.

²⁹ Kotema Abimelek Aburaam atiar, “Amerekekin ŋun akanykaarei nuigitaa apoloukec inyo?”

³⁰ Kotema atiar, “Iyaŋaari amerekekin ŋun akanykaarei kakanika, tetere eraun aanyunet kama ajai aitejenun ebe eoŋ aboki atan ŋin.”

³¹ Ŋes amaikinia aibois ŋin Beer-seba; naarai nen ŋes etutukioto kesi kere.

³² Kwaŋin kitutukoto aitutuket koBeer-seba: konyou Abimelek ka Pikol ekapolon loka ajoreke, koboŋosi akwap naka Ipilisitian.

³³ Kiraik Aburaam epeduru toma Beer-seba, kiwonei kanen ekiror loka EJAKAIT, Edeke lomam edaun.

³⁴Kodau Aburaam apaarasia nuipu kakwap naka Ipilisitian.