Read Ateso Ageun 22 Bible Online

Ageun 22 - Ateso bible

Ageun 22

¹ Kosodi kanen kokau kaŋun, kitem Edeke Aburaam, kotema atiar, “Aburaam.” Kotema atiar, “Eoŋ lo.”

² Kotema atiar, “Koya kwape kwana ikokukon, ikonikoku iteluna yenimina, ŋes Isaak, kolot akwap nako Moria; koinak kaŋina araun ainakinet naicweio kotoma ediopet koroŋan lokalimokini.”

³ Konyou Aburaam tupuruc sek, kopetanak lupetan asigiriake, koyaŋa iarei kotoma ikatumunakake, ka Isaak da ikekoku; kibet akito nuka ainakinet naicweio, konyou, kolot aibois naabala ŋes Edeke.

⁴Kapaaran kanakiwuniet kiteluo Aburaam akekonye, koany aibois.

⁵Kolimok Aburaam ikekatumunak ebe, “Kosala yesi ne nepepe kasigiria, kilosi eoŋ da ka itelepat laije; kamaata kaboŋutu neijaas.”

⁶ Koyaŋa Aburaam akito nuka ainakinet naicweio, kisibwok Isaak ikekoku; koyaŋa akim ka ekileŋ kakaninike; koloto kesi luarei nepepe.

⁷Kotema Isaak papake Aburaam atiar, “Ipapa.” Kotema atiar, “Eoŋ lo, ikakoku.” Kotema atiar, “Akim ka akito enu; konye anibo imerekek yenikainakinet naicweio?”

⁸ Kotema Aburaam atiar, “Kadumakini eoŋ Edeke imerekek yenikainakinet naicweio, ikakoku.” Koloto do kesi luarei nepepe.

⁹ Kodoloto aibois naalimokinit ŋes Edeke; kodukok Aburaam etem nen, kigaŋ akito, koen ikekoku Isaak, kisiperik otem, kuju akito.

¹⁰ Korio Aburaam akekan, kolem ekileŋ aaria ikekoku.

¹¹Kiworo emalaika loka EJAKAIT ebwoi kokuju, kobala ebe, “Aburaam, Aburaam.” Kotema atiar, “Eoŋ lo.”

¹² Kotema atiar, “Sirikidokok akan otelepat, kwabo sirikisubak idiobore: naarai ajeni kwana kwape iyonitor Edeke, naarai mam kimikit ikokukon, ikonikoku iteluna.”

¹³ Kitonyou Aburaam akekonyen, kosesen, ido koany, kojai emerekek kauken, ikamunit amoni amumwarake: kolot Aburaam koyaŋa emerekek, koinak araun ainakinet naicweio aibois naka ikekoku.

¹⁴Komaik Aburaam aibois ŋin Yawe-yire: kwape inerare aitodol lolo ebe, “Komoru loka EJAKAIT edumunere.”

¹⁵Kiworo emalaika loka EJAKAIT Aburaam irwan nakiareit kokuju.

¹⁶ Kobala ebe, “Ebala EJAKAIT ebe, Esumun kanukaŋ, naarai iswama kwaŋin, kwabo mam kimikit ikokukon, ikonikoku iteluna:

¹⁷ Kotoma arereŋ kesirereŋenenei jo, ka aiyat keyatanakinenei akoniwur kwape kaacer nukotoma akuj, ido kwape kasiŋe naejai ariri naka aŋolol; irumi da aurikon erute loka lukasurupokec;

¹⁸ Ido toma aurikon isirerenere atekerin kere nuka akwapisinei; naarai irima ekaporoto.”

¹⁹Kosodi koboŋo Aburaam mama ajaas ikatumunakake, konyout kolot nepepe Beer-seba; kiboienenei Aburaam koBeer-seba.

²⁰ Kosodi kokau kaŋun kolimokinai Aburaam ebe, “Koany, Milika da abu kourik onacekon Nakor idwe;

²¹ Us ekiyaike, ka Bus onaceke; ka Kemuel papa loka Aram;

²²Ka Kesed, ka Kaso, ka Pilidas, ka Yidulap; ka Betuel.”

²³ Betuel kouri Rebeka; ŋullukanykauni kes luaurikini Milika Nakor, onaceke ka Aburaam.

²⁴Abulesitike da ekekiror Reuma, ŋes da kouri Teba, ka Gakam, ka Takas, ka Maaka.