Read Ateso Ageun 23 Bible Online

Ageun 23 - Ateso bible

Ageun 23

¹Kobut Sara ikar akwatat ka akaisaarei ka lukanykaarei; ŋul kes ikar luabu Sara kodau.

² Kotwanik Sara Kiriat-aruba (ŋes Keburon) kakwap naka Kanaan; kobu Aburaam akuudian ka eibworo Sara.

³Konyou Aburaam kaneejai nakatwanike, kotema idwe luka Ket atiar,

⁴ “Arai eoŋ epejonon ido ekaloton kama ijaas; koinakinai aibois nakidaanakina, koraun nakaŋ kotoma akwapukus kedaik nakatwanika, kenyek aanyunun bobo.”

⁵Koboŋokis idwe luka Ket Aburaam kotemasi atiar,

⁶ “Kopupokinai ejakaitikos; irai ijo ejakait lokapolon kama kijaa isio: kidaik nakatwanikon toma atesinakosi naiseuni ijo kere; emamei kasio yenikimiki aijaikin aketes, aidaikin nakatwanikon.”

⁷ Konyou Aburaam, kokukokin ituŋa luka akwap kaŋin, kes idwe luka Ket.

⁸Kinera kakes kobala ebe, “Arai ikotosi eoŋ aidaikin nakatwanika kenyek aanyunun bobo, kopupokinai, kiŋaiŋaikinai Epuron okoku loka Sokar.

⁹Kainak abua naka Makupela, naejai ŋes, naenesit kotoma omanikorike; ketwegel etiaike kere kokidiŋikus koraun akates cut.”

¹⁰ Eboie Epuron kokidiŋ kidwe luka Ket, koboŋok Epuron Ekitit Aburaam, kopupete idwe luka Ket, kes kere luapotu kolomasi orute loka ere, kobala ebe,

¹¹ “Mam, ejakaitika, kiirarai, kainak emanikor, ka abua da naejai toma kainak; kakonyen nuka idwe luka ikatuŋa kainak jo; kidaik nakatwanikon.”

¹²Kokukokin Aburaam kakonyen nuka ituŋa luka akwap kaŋin.

¹³ Kotema ŋesi Epuron kopupete ituŋa luka akwap atiar, “Konye arai ikoto, keŋaiŋait, kiirarai; atacakini etiai loka emanikor; kiyu kainak, edaikini eoŋ da nakatwanika nen.”

¹⁴Koboŋok Epuron Aburaam kolimok ebe,

¹⁵ “Ekajakait, kiirarai; emanikor etiaike isekelin [11] luka epuesa akwat aoŋon ŋes bo inyo kama ajai eoŋ ka jo? Aso kidaik nakatwanikon.”

¹⁶ Kiira Aburaam Epuron; kitem Aburaam epuesa loalimokinit ŋes Epuron kopupete idwe luka Ket, isekelin luka epuesa akwat aoŋon, luka epuesa loetwasamaenenete ikagwelanarak kapakio kaŋun.

¹⁷ Kwaŋin aponi kitebeai Aburaam emanikor loka Epuron, loajai toma Makupela, loitei Mamure, emanikor ka abua naajai toma, ka ikito kere luajaas toma omanikor, luerimorito eikoruke kere.

¹⁸Araun luke kakonyen nuka idwe luka Ket, kakonyen nuka ŋul kere luapotu kolomut korute loka ereke.

¹⁹ Kokau kaŋun, kidaik Aburaam aberuke Sara toma abua nakotoma omanikor loka Makupela loitei Mamure (ŋes Keburon), toma akwap naka Kanaan.

²⁰ Emanikor ka abua naajai toma kitebeai Aburaam kakonyen nuka idwe luka Ket araun luke cut, araun aibois nakidaanakina.