Read Ateso Ageun 24 Bible Online

Ageun 24 - Ateso bible

Ageun 24

¹ Amoionit Aburaam kokokosanite da noi: kisirereŋenenei EJAKAIT Aburaam kotoma akiro kere.

² Kolimok Aburaam ekebulesit, ekapolon loka etogoke, loayanaarit kere luajaas kaŋes ebe, “Keŋaiŋait, kibwaik akonikan kwap kamurwoka.

³ Eoŋ da kesiyapoikini jo kama ejai EJAKAIT, Edeke loka akuj ido Edeke loka akwapisinei, ebe mam imanyakini ikakoku aberu naelomuni kotoma apesur nuko Kanaan, nukaneeboio eoŋ.

⁴ Konye ilosi akwapuka, neejaas iinacanaka, komanyak okokuka Isaak aberu kaŋina.”

⁵Kotema ebulesit atiar, “Elemuni mam aberu iyuuni abunore keoŋ adolun akwap na; ebusakinit kereka eoŋ ainyakar okokukon akwap nakolo kibunio?”

⁶ Kotema Aburaam atiar, “Mam inyakari okokuka nepepec da.

⁷ EJAKAIT, Edeke loka akuj lokalemuni kotogo loka papaka, kakwap da nakaurikinio, ido loabu kinera keoŋ, keyapoik da kobala ebe, ‘Ainakini akoniwur akwap na’; ijukuni ŋol ekemalaika aiŋarenikin jo, imanyakini okokuka aberu naka ŋina.

⁸ Arai mam aberu iyuuni abunore kajo, emameete nukibeikinete jo kotoma aiyaposit kana, konye sirikinyaka okokuka ŋina.”

⁹Kibwaik ebulesit akekan kwap kamurwo naka papake Aburaam, kiyapoik kanuka akirot kaŋin.

¹⁰ Koyaŋa ebulesit ikaalai itomon, lukotoma okaalai luka papake, kolot; kojaas kiboro kere lukajokak luka papake kotoma akaninike; konyou, kolot Mesopotamia, ore loka Nakor.

¹¹ Kitukukok ikaalai kiŋa naka ere neejai atan naka akipi, napejosi, apak naeponiata aŋor aiwok akipi.

¹² Kotema atiar, “Wu EJAKAIT, Edeke loka ejakaitika Aburaam, keŋaiŋait, koinakinai arereŋ lolo, kitodik ejakaitika Aburaam asianut.

¹³Koany, abwoi kariri naka atan naka akipi, ido epote apesur nuka ituŋa lukore aiwok akipi;

¹⁴ Aso kojau kwana, apese naatemari eoŋ ebe, ‘Kooku amotikon, keŋaiŋait kamat’; kosodi ŋesi da ebe, ‘Komat, eruanakini da ikonikaalai’; koraun ŋin naiseikinit ekonibulesit Isaak; nen do ajenunia ebe itodik ekajakait asianut.”

¹⁵ Kwaŋin, eroko inera, koany, kolom Rebeka nakeurie Betuel okoku loka Milika, aberu naka Nakor, onace loka Aburaam, kojai amotike okeperike.

¹⁶ Etemelel da apese noi, abekot namam ejeni ekiliokit; kijesar atan, kileleb amotike, kodok.

¹⁷ Koker ebulesit airiamun kaŋes kotema atiar, “Keŋaiŋait, ae adisikipi nuka amotikon, kamat.”

¹⁸ Kotema atiar, “Komat, ekajakait.” Kisunya awoun amoti, kibwaik akanike kitamat ŋes.

¹⁹Kedau aitamat ŋes kotema atiar, “Aokokini ikonikaalai da, komata kimonikinos.”

²⁰Kisunya abukokin akipi nuka amotike atuba, koker bobo atan aiwok, kowokok ikekaalai kere.

²¹ Kite ŋes etuŋanan, kopala ajenun arai abu EJAKAIT kisirereŋ akelosit, arai bo mam.

²² Kosodete, kedaut ikaalai aimat, kolem etuŋanan egilut loka esabu, alaŋiruke atutubet naka esekel, aikomon da aarei nuka akaninike, alanirukec isekelin itomon luka esabu;

²³Kotema atiar, “Iŋai papakon? Keŋaiŋait kolimokinai. Ejai apak ore loka papakon kapero isio?”

²⁴Kotema atiar, “Arai eoŋ apese naka Betuel okoku loka Milika, lokeurikini ŋesi Nakor.”

²⁵ Kotema da atiar, “Kija kanya ka inyamat lukidaunete, ka apak da naperot.”

²⁶ Kitulur etuŋanan akekou, koma EJAKAIT.

²⁷ Kotema atiar, “Kituritete EJAKAIT, Edeke loka ejakaitika Aburaam, lomam eswaki aitodikin ekajakait akeitim ka akebeit; ka eoŋ da, abu EJAKAIT keŋarenik korot kiton togo loka iinacan luka ejakaitika.”

²⁸Koker apese, kolimok lukotogo loka totoke kwape ejaatar akiro ŋun.

²⁹ Ido ajai Rebeka onaceke, ekekiror Laban; koker neejai etuŋanan, aisiriama ŋes katan.

³⁰Kosodi nakeanyunia ŋesi egilut, ka aikomon kakanin nuka inacike, kiira da akiro nuka Rebeka inacike ebe, “Kalimoki etuŋanan kwaŋin”; kodol ŋesi neejai etuŋanan; ido koany, ebwoi kidunyasi kikaalai kaneajai atan.

³¹ Kotema atiar, “Kolom ijo lokisirereŋit EJAKAIT; inyo bo ibwoia kokiŋa? Naarai etemonok eoŋ etogo, ka apak da naka ikaalai.”

³² Koloma etuŋanan togo, kolac ikaalai; koinak anya ka inyamat kanuka ikaalai, ka akipi ailosia akekejen ka akejen nuka ituŋa kaluajaas nepepe kaŋes.

³³ Kibwaikinai aimuj akonyeneke ebe, “Kimuj.” Konye kotema atiar, “Mam eoŋ emuji, eriŋa kelimuno nukejukunitere.” Kotema atiar, “Kolim.”

³⁴Kotema atiar, “Arai eoŋ ebulesit loka Aburaam.

³⁵ Abu EJAKAIT kisirereŋ noi ejakaitika, ido araun lokapolon; abu koinak da ŋes isipanin luka amerekekin ka aituk, ka epuesa, ka esabu, ka ibulesin ka abulesin, ka ikaalai ka asigirian.

³⁶ Abu Sara aberu naka ejakaitika kourik ŋes ikoku kemojoŋ: abu koinak ŋol kere lukejaatar.

³⁷ Kesiyapoik eoŋ ejakaitika ebe, Mam imanyakini okokuka apese naka apesur nuka Ikanaanin lueboie eoŋ kakwapukec.

³⁸Konye ilosi togo loka papaka, neejai atekerika komanyak okokuka aberu.

³⁹Abu katema ejakaitika atiar, ‘Elemuni bo aberu kogir aupun keoŋ.’

⁴⁰ Kalimok eoŋ ebe, ‘EJAKAIT, Ioalosenenei eoŋ kakonyeneke, iyakiari ekemalaika nepepe kajo, isirereŋi akonilosit, imanyakini da okokuka aberu naelomuni koinacanaka kotogo loka papaka.

⁴¹ Kwaŋin mam nukibeete jo kanuka akaiyaposit, arai kidol oinacanaka; ido arai mam kes kiinakinete aberu, emameete nukibeikinete jo kanuka aiyapositika.’

⁴² “Abu lolo eoŋ atan, kasodi atemar, ‘Wu EJAKAIT, Edeke loka ejakaitika Aburaam, arai teni kisirereŋ erotoka loalosi;

⁴³ Koany, abwoi eoŋ kariri naka atan naka akipi; aso kojaut kwana, ebe, apese naelomuni aiwok, naabala eoŋ ebe, “Koinakinai akipi kamotikon kamat, keŋaiŋait”;

⁴⁴ Kosodi ŋesi da ebe, “Komat ijo, ido awokokini eoŋ ikonikaalai da”: koraun ŋin aberu naeseikinit EJAKAIT okoku loka ejakaitika.’

⁴⁵ “Napeneranakin ŋun kotauka, koany, kolom Rebeka kamotike kokeperike; kijesar atan, kowok; kasodi eoŋ ebe, ‘Keŋaiŋait, ae kamat.’

⁴⁶Kisunya ŋesi awoun amotike kokeperike, kotema atiar, ‘Komat, eruanakini ikonikaalai da’; kasodi aimat, kiruanak ikaalai da.

⁴⁷ Abu keŋit ŋes ebe, ‘Irai ijo akoku naka iŋai?’ Kotema atiar, ‘Akoku naka Betuel, okoku loka Nakor, loaurikini ŋes Milika’; kebwaik egilut okumesike, ka aikomon da akaninike.

⁴⁸ Ketulur akouka kwap, kama EJAKAIT, ketur EJAKAIT, Edeke loka ejakaitika Aburaam; loabu keteten eoŋ korot ayaŋaar apese naka onaceke loka ejakaitika kanuka okokuke.

⁴⁹ Natikwana da arai iyuunitos asubakin ejakaitika asianut ka abeit, kolimokinai; arai mam, kolimokinai; kebelokin teten, arai kediany.”

⁵⁰ Kosodete koboŋokis Laban ka Betuel atiar, “Alomu akirot ŋin kama ejai EJAKAIT; mam kipedori alimokin jo nuejok karaida nueroko;

⁵¹ Koany, ejai Rebeka akonyenekon, koyaŋa ŋes, kolot, koraun ŋesi aberu naka okoku loka ejakaitikon kwape atemaria EJAKAIT.”

⁵²Kosodi kiira ebulesit loka Aburaam akecekiro, kokukokin kwap mama ejai EJAKAIT.

⁵³ Koyau ebulesit inapen luka epuesa, ka luka esabu, ka igoen, koinak Rebeka; koinak da onaceke ka totoke iboro luka akais nuipu.

⁵⁴ Konyamata, komatata, ŋesi ka ituŋa luajaatar, kiwalakis; konyout tupuruc, kotema atiar, “Kotwarai eoŋ, kalot neejai ejakaitika.”

⁵⁵Kotema onace loka apese ka totoke atiar, “Kosal ber apese kasio adaun apaarasia adis, arai atomon: kosodi konyet alosit.”

⁵⁶ Kotema atiar, “Sirikiisibo eoŋ, naarai abu EJAKAIT kisirereŋ akalosit; kotwarai eoŋ kalot neejai ejakaitika.”

⁵⁷Kotemasi atiar, “Kinyarauni apese, keŋitata nuelomunete kaitukuke.”

⁵⁸Konyaraut Rebeka, kotemasi ŋes atiar, “Ikoto alosit nepepe ketuŋanan kalo?” Kotema atiar, “Alosi.”

⁵⁹ Kotwarata Rebeka kinacikec, ka akasaanike, ka ebulesit loka Aburaam, ka iketuŋa.

⁶⁰ Kilipakis Rebeka arereŋ, kotemasi atiar, “Inacikosi, korau ijo toto naka ilukumin luka ilukumin itomon, akoniwur da kirumia erute loka ŋul kaluelaete kes.”

⁶¹Konyou Rebeka, kapesuruke, kibwanenoto ikaalai, kotupasi etuŋanan; koyaŋa ebulesit Rebeka, kolot.

⁶² Kobu Isaak korot loka Beer-lakai-roi: naarai kiboienenei kakwap naka ari naka Eŋalakimak.

⁶³ Koloma Isaak omanikor eboŋ aomoom; kiteluo akekonye, kite, ido koany, eponitos ikaalai.

⁶⁴ Kiteluo Rebeka akekonye: keanyu Isaak kodok kokaalai.

⁶⁵ Kotema ŋesi ebulesit atiar, “Iŋai bo etuŋanan ŋol loitorunit omanikor airiamun kaoni?” Kotema ebulesit atiar, “Ŋes ejakaitika.” Kitiŋ ekegoe lokimukos, kimuko akekonyen.

⁶⁶Kolimok ebulesit Isaak akiro kere nuabu kiswama.

⁶⁷Kitoloma Isaak Rebeka owema loka Sara totoke, koyaŋa ŋes, korau akeberu; komina ŋes; kitalakarite Isaak nakedaunia totoke atwanare.