Read Ateso Ageun 25 Bible Online

Ageun 25 - Ateso bible

Ageun 25

¹Kosodi Aburaam aimany aceberu, ekekiror Ketura.

² Kouri ŋin Simuran ka Yokusan, ka Medan, ka Midian, ka Isibak ka Sua.

³Yokusan kouri Seba ka Dedan. Idwe luka Dedan kes Asurim ka Letusim ka Leumin.

⁴Bwe luka Midian; Epa ka Eper, ka Kanok, ka Abida, ka Eludaa. Ŋul kere kes idwe luka Ketura.

⁵ Koinak Aburaam Isaak kere luajaatar.

⁶ Konye idwe luka abulesin, luajaatar Aburaam, koinak Aburaam kes ainakineta: kitonyou kes kama ejai Isaak okokuke, eroko ŋesi ejari, kolototo kide akwap nakokide.

⁷Nu kes apaarasia nuka ikar luka aijar naka Aburaam nuabu kobut, ikar akwatat ka akaisakanykaarei ka lukany.

⁸ Kojal Aburaam aijar, kotwana kodaunite akokosan ejok, komoionite noi, kodoloto ikekar; koyaŋaarai mama ejaas iketuŋa.

⁹ Ikedwe Isaak ka Isimael kidaikis ŋes toma abua naka Makupela, toma omanikor loka Epuron okoku loka Sokar Ekitit, loitei Mamure;

¹⁰ Emanikor loetwegelete idwe luka Ket Aburaam; kidaikinai nen Aburaam ka aberuke Sara.

¹¹ Kosodi kedau Aburaam atwanare kisirereŋ Edeke Isaak okokuke; kiboienenei Isaak koBeer-lakai-roi.

¹² Na ŋes aur naka Isimael okoku loka Aburaam, loabu Kagar Amisiriat, abulesit naka Sara, kourik Aburaam:

¹³Lu kes ikiroria luka odwe luka Isimael, kwape ejaatar ikiroriakec, kwape ejaatar aturiokec: ekiyai loka Isimael ŋes Nebaiot; ka Kedar, ka Adubeel ka Mibusam.

¹⁴Ka Misima, ka Duma, ka Masa;

¹⁵Kadad, ka Tema, jetur, ka Napis, ka Kedema;

¹⁶ ŋul kes idwe lutelepai luka Isimael ido ŋul kes ikiroriakec kwape ejaatar ireriakec, ido kwape edukuroto iwemaikec, ijaka itomon ka luarei kwape ajaatar akecetekerin.

¹⁷ Ikar da luka Isimael luabu kobut, ikar akwatat ka akaisauni ka lukanykaarei; kojal aijar, kotwana; koyaŋaarai mama ejaas iketuŋa.

¹⁸ Kiboioto anyoun koKabila aitodol Sur naitei Misiri; bala ilosi Asuria; eboienenei kaneajaas ikeinacan kere.

¹⁹ Na ŋes aur naka Isaak okoku loka Aburaam; abu Aburaam kouru Isaak:

²⁰ Ido abu Isaak kodaunite ikar akaisaoŋon komanya Rebeka, akoku naka Betuel, Esuriat loka Padan-aram, inacike ka Laban Esuriat, araun akeberu.

²¹ Kiŋaiŋa Isaak EJAKAIT kanuka akeberu, naarai arai arakan; kiira EJAKAIT aiŋainaitoike, kopotuu akeberu Rebeka.

²² Kopegasi idwe kotoma akoikike; kotema atiar, “Arai ikote nen, kanukinyo apotio eoŋ?” Kolot ŋesi aiŋit EJAKAIT.

²³ Kolimok EJAKAIT ŋes atiar, “Ejaas atekerin aarei toma akoikikon. Ido atekerin aarei epote atiak napeelomunete kaliligetekon; Ateker adiopet da itelekari ateker ace kagogoŋ; Ido lokapolon ijaanakini lodidi.”

²⁴Kedoloto apaarasia nuka aidounike, koany, ajaas imwatok akoikike.

²⁵ Kolom yenisodit erai yeneren akuanake kere, koeekite bala anapito naka ajul; komaikis ekekiror Esau.

²⁶ Kokau kolom onaceke, itiŋit akekan atitibat naka Esau; komaikinai ekekiror Yakob; [12] korai Isaak loka ikar akaisakanykape ewuriei akeberu kes.

²⁷ Kopolooros itelepai; koraun Esau ekamejan loepiriana, etuŋanan loka ais; korau Yakob etuŋanan loiyapaara, kiboienenei kotoma owemai.

²⁸ Komina do Isaak Esau naarai anyamenenei lumejanake; Rebeka da komina Yakob.

²⁹Kipo Yakob emanor; kolom Esau kais, ilworuna noi:

³⁰Kotema Esau Yakob atiar, “Keŋaiŋait, kitanyamai emanor ŋol loereŋ, naarai elworuna cut.” Ŋes enyaritere ekekiror Edom.[13]

³¹Kotema Yakob atiar, “Kitwegelai lolo akonipolou.”

³²Kotema Esau atiar, “Koany, eapie eoŋ atwanare, ido keŋarakini eoŋ apolou biai?”

³³ Kotema Yakob atiar, “Kiyapoikinoi lolo.” Kiyapoik: kitwegel Yakob akepolou.

³⁴ Koinak Yakob Esau atap ka emanor loka imare; konyam, komat, konyou, kolot; kwaŋin amwania Esau akepolou.