Read Ateso Ageun 26 Bible Online

Ageun 26 - Ateso bible

Ageun 26

¹ Kojai ebeli ece akwap, konye mere je losodit lokejai kapaarasia nuka Aburaam. Kolot Isaak mama ejai Abimelek ekabaka loka Ipilisitian toma Gerar.

² Kitaanyikin EJAKAIT ŋes, kotema atiar, “Mam ilosi Misiri; kiboikin toma akwap nakalimokin:

³ Kiboienenei kakwap kana, eboienenei eoŋ da kajo, ido kesirereŋenenei, naarai kainakini jo ka aurikon akwapin nu kere; etogogoŋi da aiyaposit naabu keyapoik Aburaam papakon;

⁴ Ido esupui akoniwur kwape kaacer nuka akuj, ainakini da akoniwur akwapin nu kere; toma akoniwur da ŋes esirerenio atekerin kere nuka akwapisinei.

⁵ Naarai arimarit Aburaam ekaporoto, aricenenei nualimonokin, aicorakinetaka, akiroka, ka ikakisila da.”

⁶Kiboienenei Isaak kotoma Gerar.

⁷ Kiŋitata ŋes ituŋa luka nen nuka akeberu; kotema atiar, “Ŋes kinacika”; naarai akuriana einer ebe, “Akaberu”; “elemuni ituŋa luka nen kaara eoŋ kanuka Rebeka; naarai etemelel.”

⁸Kosodi kedau apak naepol, kosesen Abimelek, ekabaka loka Ipilisitian kotoma adirisa, kite, ido koany Isaak ebolias kakeberu Rebeka.

⁹Konyarau Abimelek Isaak kotema atiar, “Koany, abeit erai akoniberu; kanukinyo ibalar ebe, ‘Erai kinacika?’ ” Kotema Isaak atiar, “Naarai aomit ebe, ‘Elemuni katwana kanukeŋ.’ ”

¹⁰ Kotema Abimelek atiar, “Anyoika nu nukiswamak sio? Tikeperoto ediopet kotuŋa kaberukon, komam ejeni, ti ijo kitagwaik sio akirot.”

¹¹ Kicorak Abimelek ituŋa kere kinera atiar, “Ŋol loetirori etuŋanan lo arai akeberu eario do.”

¹² Koye Isaak toma akwap ŋin, koton da kokaru kaŋol irwan akwatat; kisirereŋ EJAKAIT ŋes.

¹³ Koraun etuŋanan loepol, kiyatanakin aitodol nearaunor ŋesi loepol noi.

¹⁴ Ajaas ŋes isipanin luka amerekekin ka luka aituk, ka ibulesin luipu; koliliata Ipilisitian.

¹⁵ Apotu Ipilisitian konwokanasi atanin kere nuapotu ibulesin luka papake kobokata, kapaarasia nuka Aburaam papake, kilelebata alup.

¹⁶ Kotema Abimelek Isaak atiar, “Konyou kanekija isio; naarai igogoŋ ijo aitelekarit sio.”

¹⁷Konyou Isaak kibubuk ewemake toma aditot naka Gerar, kiboikin nen.

¹⁸ Kowad Isaak atanin nuabokitai kotoma apaarasia nuka Aburaam papake; naarai apotu Ipilisitian konwokanasi ketwana Aburaam; komaanak ikecekiroria kwape kemaanakinitor papake.

¹⁹Kobokata ibulesin luka Isaak toma aditot ŋin, koanyut kanen atan naka akipi nuibulubulas.

²⁰ Kopegata ikecokok luka Gerar ka ikecokok luka Isaak, kobalas ebe, “Akosikipi nu.” Komaik atan ekekiror Esek [14] naarai apotu kitepegata ŋes.

²¹Kobokata atan ace; ŋin da kopegatatar. Komaik ekekiror Situna.[15]

²² Konyou kanen, kobok atan ace; mam ŋin aponi kopegare, komaik ekirorike Rekobot,[16] kobala ebe, “Naarai kwana kitalala oni EJAKAIT, kiwuriar kakwap.”

²³Konyou kanen kolot Beer-seba.

²⁴ Kitaanyikin EJAKAIT kakuare kaŋin, kotema atiar, “Eoŋ Edeke leka Aburaam papakon; sirikikurianar, naarai ajai eoŋ nepepe kajo, kesirereŋi, eyatanakini da akoniwur kanuka Aburaam ekabulesit.”

²⁵ Kodukok nen etem, kiwone ekiror loka EJAKAIT, kibubuk nen ekewema; nepenen da ŋes abokikinete ibulesin luka Isaak atan.

²⁶ Kosodi konyou Abimelek koGerar alosit neejai, ka Akusat opaperoke, ka Pikol ekapolon loka ajoreke.

²⁷ Kotema Isaak atiar, “Kanukinyo iponitotor neajai, naarai kilaitos? Ido ipotu kireŋeata kamakus?”

²⁸ Kotemasi atiar, “Kipou kaanyutu cut ebe ejai EJAKAIT kajo, kasodete atemar ebe, ‘Kojau ca do aiyaposit nekija oni kidiŋikosi kajo,’ ketutukoto kajo.

²⁹ Kinyek ijo aitican sio, kwape mam sio kitiroritor jo, kwape da mam sio kikonakinitor jo amodiokirot nabarai ajokis bon, ido kipou katwarata jo kainapakina; irai do ijo lokisirereŋit EJAKAIT.”

³⁰ Kipoik epucit, konyamata, komatata.

³¹ Kodilokis anyoun tupuruc sek, kiyaponokinos. Kotwar Isaak kes, koloto kainapakina.

³²Kosodi kapaaran kaŋin, kopotu ibulesin luka Isaak kolimokis nuka atan naabokitos kesi, kolimokis ebe, “Kiany akipi.”

³³ Komaik Siba: ŋes enyaritere ekiror loka ere Beer-seba aitodol lolo.

³⁴ Adaunit Esau ikar akaisaoŋon emanyi Yudit akokuke naka Beeri Ekitit, ka Basemat akokuke naka Elon Ekitit:

³⁵ Kitakadikis itauon luka Isaak ka Rebeka.