Read Ateso Ageun 27 Bible Online

Ageun 27 - Ateso bible

Ageun 27

¹ Kosodi kanen, kemojoŋ Isaak, kowariwarete da akekonye, komam epedori aanyun, konyarau Esau okokuke losodit, kotema atiar, “Ikakoku.” Kobala ebe, “Eoŋ lo.”

² Kotema atiar, “Koany, amojoŋ eoŋ, mam ajeni apaaran naatwania.

³ Aso kwana keŋaiŋait, kitiŋ lumeias, ekonieoe, ka akonikabwa, kolot ais, komejak imejauna;

⁴ Kitemok akiriŋ naejijim, kwape akotor, koinu, kanyam; kasodi kelipak jo arereŋ eroko eoŋ ketwana.”

⁵Kiira Rebeka nueneras Isaak kaEsau ikekoku. Kolot Esau ais amejaun imejauna, ka ayaun da.

⁶Kolimok Rebeka Yakob ikekoku ebe, “Koany, apup papakon elimokini onacekon Esau ebe,

⁷‘Koinunai imejauna kitemok akiriŋ naejijim, kanyam, kelipak jo arereŋ kakonyen nuka EJAKAIT eroko eoŋ ketwana.’

⁸ Aso ikakoku, kiira ekaporoto kwape ejaatar ŋun nukecorakini.

⁹Kolot kwana osipan loka akinei, koinu ikaalei iarei luejok; etemokini eoŋ da kes araun akiriŋ naejijimikini papakon, kwape ekotor:

¹⁰ Iinari ijo papakon, konyam, kosodi kilipak jo arereŋ eroko ketwana.”

¹¹ Kotema Yakob totoke Rebeka atiar, “Koany, erai onaceka Esau etuŋanan loecekit, konye arurut eoŋ.

¹² Elemuni papaka kararapana, araun eoŋ da ekeŋalan kamake; kasodi ailamakinio kwabo mere aisirereŋio.”

¹³ Kotema totoke atiar, “Kabeik eoŋ akoniilamakinio, ikakoku; na bon, kiira ekaporoto, ape koomikinai.”

¹⁴ Kolot, koom, koinu totoke: kitemok totoke akiriŋ naejijim, kwape akotor papake.

¹⁵ Kolem Rebeka inapen luejok luka Esau ekiyaike, luajaas kaŋes togo, kitanap ŋul Yakob okokuke lodidi:

¹⁶Kitanapanak imukulen luka ikaalei akaninike, omurisiŋike da nearurut.

¹⁷Koinak okokuke Yakob akiriŋ naejijim ka inyamat luetemokinit akaninike.

¹⁸Kobu neejai papake, kotema atiar, “Ipapa.” Kobala ebe, “Eoŋ lo; iŋai bo ijo, ikakoku?”

¹⁹ Kotema Yakob papake atiar, “Eoŋ Esau ekiyaikon; ido eswama kwape ibu kicorakinia; keŋaiŋait, konyou, kiboikin, konyam imejaunaka, kosodi kilipak eoŋ arereŋ.”

²⁰ Kotema Isaak okokuke atiar, “Ikonakini ai isunyari adumun kwaŋin, ikakoku?” Kobala ebe, “Naarai EJAKAIT Ekonideke ŋes ketusunyaari.”

²¹ Kobala Isaak Yakob ebe, “Keŋaiŋait kikunyu, kararapana, ikakoku, arai kito ijo ikakoku Esau cut cut, arai mere.”

²²Kikunyak Yakob neejai Isaak papake; korarapana, kiner ebe, “Eporoto erai eporoto loka Yakob, konye do akanin eraas akanin nuka Esau.”

²³ Mam abu komisiik, naarai acekitos akaninike, kwape kakanin nuka onaceke Esau: kosodi ailipakin arereŋ.

²⁴ Kotema atiar, “Ijoŋ ikokuka Esau cut?” Kosodi ebe, “Eoŋ lopelo.”

²⁵Kotema atiar, “Kisukunyikinai, kanyam imejauna yenika ikokuka, kasodi kelipak arereŋ.” Kisukunyik neejai, konyam: koinu ajon da, komat.

²⁶Kosodi Isaak papake kotema ŋes atiar, “Ikakoku, kikunyu do, konu eoŋ.”

²⁷ Kikunyak konu: kiŋu elos loka anapitoke, kilipak arereŋ, kotema atiar, “Koany, elos loka ikokuka Esubit bala aures naka emanikor Ioisirerenit EJAKAIT:

²⁸ Ido koinanakini Edeke jo akopyo nuepote kokuju, Ka amio naka akwap, Akima ka ajon nuipu:

²⁹ Kijaanakinete jo ituŋa, Kokukonokinos jo atekerin: Koyaite ikoniinacan, Kokukonokinos jo odwe luka totokon: Kilamanakinete yenikilami jo, Ido kisirereŋenenete yenikilipakini jo arereŋ.”

³⁰Kosodi kanen, nepedauni Isaak ailipakin Yakob arereŋ, korai Yakob da anyoun ŋipeŋin kaneejai papake Isaak, kobonuni do Esau onaceke kotoma amej.

³¹ Kipo ŋesi da akiriŋ naejijim koinu papake; kotema papake atiar, “Ipapa konyou ca bo, konyam imejauna yenika okokukon, kosodi kilipak arereŋ.”

³²Isaak papake kotema ŋes atiar, “Iŋai bo ijo?” Kotema atiar, “Eoŋ ikonikoku yenikiyai, Esau.”

³³ Komaran Isaak noi noi, kotema atiar, “Aso iŋai bo ŋol lokemejauni imejauna kainu: anyam eoŋ kere eroko ijo kebuno, kasodi ailipakin arereŋ? Eebo, isirereŋio ŋes da.”

³⁴ Kiira Esau akiro nuka papake, kikiliar aimony noi, kiutie, kobala papake ebe, “Okwe ipapa, kilipakinai eoŋ da arereŋ, eoŋ da, ba.”

³⁵ Kotema atiar, “Abu onacekon kobu iŋalai, ido kidemak arerenukon.”

³⁶ Kotema atiar, “Mam aponi komaikinai ejok ekekiror Yakob? Naarai alomaki nukaŋ irwan nu kere aarei; abukadema apolouka; ido koany, natikwana da kadema akareren.” Kotema atiar, “Mam kideikinit eoŋ da adiorerene”

³⁷ Koboŋok Isaak kotema Esau atiar, “Koany, adakak ŋes ayait jo, ainak da iinacanake kere mama ejai aijaanakin; ido esimii ŋes akima ka ajon, aso anyoika nukasubakini jo ikakoku?”

³⁸ Kotema Esau papake atiar, “Ejai jo arereŋ adiopet bon ipapa? Okwe ipapa, kilipakinai eoŋ da arereŋ, eoŋ da ba.” Kodelo Esau, komony.

³⁹ Isaak papake Koboŋok ŋes ebe, “Koany, eraun etogokon loka amio naka akwap, ido loka akopyo nuepote kotoma akuj kokuju;

⁴⁰ Ido ijarenenei kanuka ekileŋikon, Ijaanakini da onacekon; Kosodi ejaun nailakakinor, Ilakilakaari ajookot komurisiŋikon.”

⁴¹ Kosac Esau Yakob kanuka arereŋ naelipakin ŋes papake. Kotema Esau kotauke atiar, “Eapiete apaarasia nuka aimony papaka; kasodi aiar onaceka Yakob.”

⁴² Kolimokinai Rebeka akiro nuka Esau okokuke lokapolon; kijuka, konyarau Yakob okokuke lodidi, kotema atiar, “Koany, onacekon Esau, toma akirokon, italakaara naarai inerunit aiar jo.

⁴³ Aso kwana, okokuka, kiira ekaporoto; konyou, koker Karan mama ejai Laban onaceka;

⁴⁴Kiboioror kaŋes apaarasia adis aitodol neiŋoŋaror adedeŋ naka onacekon;

⁴⁵Aitodol neiŋoŋaror anyunyura naka onacekon, kimurwokis da nuiswamak ŋes; ŋes ejukunia anyaraun jo kaŋina; kanukinyo tikademarere eoŋ yes kere kotoma apaaran adiopet?”

⁴⁶ Kotema Rebeka Isaak atiar, “Apas aijaraka kanuka apesur nuka Ket: arai kemany Yakob da aberu kotoma apesur nuka Ket, nuesubitos bala ŋun. Kotoma apesuru nuka akwap kana, iŋarakinete akaijar biai?”