Read Ateso Ageun 28 Bible Online

Ageun 28 - Ateso bible

Ageun 28

¹ Konyarau Isaak Yakob, kilipak arereŋ, kicorak, kobala ebe, “Sirikimany aberu naka apesur nukoKanaan.

²Konyou, kolot Padan-Aram, togo loka Betuel papa loka totokon, komanya kaŋina aberu kapesur nuka Laban onace loka totokon.

³ Edeke da Lokapedor kere kisirereŋ jo, kitupu, kiyatanak, koraun erioŋet loka atekerin;

⁴ Koinak jo arereŋ naka Aburaam, ijo nepepe kakoniwur, tetere irumi akwap nakolo kitorit nakeinakini Edeke Aburaam.”

⁵Kiyakia Isaak Yakob: kolot Padan-Aram, mama ejai Laban okoku loka Betuel Esuriat onaceke loka Rebeka toto naka Yakob ka Esau.

⁶Koany Esau ebe elipaki Isaak Yakob arereŋ, kijuka da ŋes alosit Padan-Aram aimany kaŋina aberu; ido ilipakini arereŋ abu kicorak ebe, “Sirikimany aberu naka apesur nukoKanaan”;

⁷Korimak Yakob papake ka totoke, kolot Padan-Aram:

⁸ Koany Esau ebe mam apesur nukoKanaan isiyalamikinito papake ka totoke;

⁹ Kolot Esau mama ejai Isimael, komany Makalat akoku naka Isimael okoku loka Aburaam, kinac naka Nebaiot araun akeberu, nepepe kaŋor nukejaas kaŋes.

¹⁰ Konyou Yakob koBeer-seba, kobeia Karan.

¹¹Kodol aceibois korotoke, koper aitiwalar akwap, naarai alomarit akoloŋ; koyaŋa amoru adiopet naka aibois kaŋin, kicolonik akekou, kojotoor kaibois kaŋin.

¹² Kiruja airujasit, ido koany, adoket naesipokinitai kwap, kodolite aidike kuju; ido koany, imalaikan luka Edeke kodokanarete, kodokununete da kanen.

¹³ Ido koany, ebwoi EJAKAIT kokujuke, kobala ebe, “Eoŋ EJAKAIT, Edeke loka Aburaam papaakon, ido Edeke loka Isaak: akwap naiperio, kainakini jo, nepepe kakoniwur;

¹⁴ Akoniwur da eluori kwape kapua naka akwap, ido isiarakin ari nakoto ka nakokide, agolitomei, ka eŋalakimak; tomakon, toma aurikon da, ŋes edumuniata atekerin kere nuka akwapisinei arereŋ.

¹⁵ Ido koany, ajai eoŋ kajo, kedarenenei kaneilosi kere, kenyakuni akwap na; naarai mam kenyeini aitodol neeswamaa nukalimok jo.”

¹⁶ Kokweny Yakob kajo, kotema atiar, “Abeit ejai EJAKAIT aibois na; mam eoŋ da ajeni.”

¹⁷Koyoŋ, kotema atiar, “Esogim noi aibois na! Abeit ŋes etogo loka Edeke, ŋes erute loka akuj.”

¹⁸Konyou Yakob tupuruc sek, kolem amoru naecolonit kakouke, kosipok araun epir, kobukok akinyet kuiuken.

¹⁹ Komaik aibois ŋin ekekiror Bet-el: [17] konye sek arai ekiror loka ere Lus.

²⁰ Kiyapoik Yakob aiyaposit, kobala ebe, “Arai ejaenena Edeke keoŋ, arai da kedarenenei kotoma orotoka loalosi, kainanakini da inyamat lunyaman, ka igoen lunapan.

²¹ Tetere aboŋuni togo loka papaka kainapakina, ŋes do eraunor EJAKAIT Ekadeke.

²² Amoru na da, naasipok araun epir, eraun etogo loka Edeke; ido kakere lukiinanakinenei mam aswaki ainanakin jo idiopet kotomon.”