Read Ateso Ageun 29 Bible Online

Ageun 29 - Ateso bible

Ageun 29

¹ Kosodi kolot Yakob alositeke, kodol akwap naka ituŋa lukokide.

²Kosesen, ido koany, ajai atan mana, ido koany, koperete kanen isipanin iuni luka amerekekin koapiete katan; naarai toma atan ŋin ŋes eruenenere isipanin: amoru da naajai aituk naka atan apol noi.

³Kotukonokinos isipanin kere ŋina; kikokorioroi amoru alemar kaituk naka atan, kiruata amerekekin, kinyakakis amoru aituk naka atan toma aiboisike.

⁴Kotema Yakob atiar, “Ikainacan, lukai bo yesi?” Kotemasi atiar, “Kirai isio Ikaranin.”

⁵Kotema kes atiar, “Ijenete Laban okoku loka Nakor?” Koboŋokis ebe, “Kijeni.”

⁶ Kotema kes atiar, “Eŋalei?” Kobalas ebe, “Eŋalei, ido koany, ebunit apeseke Rakel nepepe kamerekekin.”

⁷Kotema atiar, “Koany, eroko erai kidiŋ paaran, eroko da apak edolo naetukonokinere ibaren; kiruata amerekekin, kolot aitadak.”

⁸Kotemasi atiar, “Mam kipedori, aitodol neetukonokinotor isipanin kere, kikokoriosi amoru kaituk naka atan, kasodete airu amerekekin.”

⁹ Eroko ŋesi inera kakes, kobu Rakel nepepe kamerekekin nuka papake; naarai ŋes ecokienenei.

¹⁰ Kosodi nakeanyunia Yakob Rakel akoku naka Laban onace loka totoke, ka amerekekin nuka Laban onace loka totoke, kikuny Yakob, kikokorio amoru kolema kaituk naka atan, kiruanak esipan loka Laban onace loka totoke.

¹¹ Konu Yakob Rakel, kodelo.

¹² Kolimok Yakob Rakel kwape eraar ŋesi onace loka papake, ido kwape eraar okoku loka Rebeka; koker kolimok papake.

¹³ Kosodi kiira Laban akiro nuka Yakob okoku loka inacike, koker airiamun kaŋes; kotun, konu noi, kitoloma togoke. Kolimok Laban akiro ŋun kere.

¹⁴ Kotema Laban ŋes atiar, “Abeit irai ijo akoitika ido akuanaka.” Kiboikin nepepe kaŋes elap ediopet.

¹⁵Kotema Laban Yakob atiar, “Naarai irai onaceka ŋes ibusakinitor ijo aijaanakin eoŋ tai? Kolimokinai, enyoin ekoniropit?”

¹⁶Ajaas Laban adwe aarei, ekiror loka nakapolon Lea, ekiror da loka nadidi Rakel.

¹⁷Ido anonok akonye nuka Lea, konye arai Rakel naetemelel, akonyeneke da nuisiyalamikinete.

¹⁸ Kominakite Yakob Rakel, kotema atiar, “Kejaanakini ikar ikanykaarei tetere kiinakini Rakel akokukon nadidi.”

¹⁹Kotema Laban atiar, “Ejok ainakin jo, aitelekarit ainakin ecetuŋanan: kiboikin keoŋ.”

²⁰ Kijaanak Yakob ikar ikanykaarei tetere einakinio Rakel; kosubata apaarasia bala ikidioko, kanuaminar ŋes.

²¹ Kotema Yakob Laban atiar, “Koinakinai akaberu, naarai adoloto akapaarasia, kalomak mama ejai.”

²² Kotukonok Laban ituŋa kere luka aibois kaŋin, kipo epucit.

²³Kosodi kedol atiboŋ, koyaŋau Lea akokuke, koinu ŋes; koloma mamake.

²⁴Koinak Laban Silupa akebulesit mama ejai akokuke Lea araun akebulesit.

²⁵Kosodi kiwala akwap, koany ŋesi erai Lea, kotema Laban atiar, “Anyoika bo nu nukiswamak? Mam abu kejaanak jo kanuka Rakel? Aso kanukinyo kinalakinia eoŋ?”

²⁶Kotema Laban atiar, “Mam ikonio kwaŋin kotoma akwapukosi aikor nadidi ageikin nakapolon.

²⁷ Kodau ber apaarasia akanykaarei nuka ŋin, kasodete konyet akorakin jo ace kanuka aijaanakin nakijaanakini eoŋ bobo, adaun ikar ice ikanykaarei.”

²⁸Kiswama Yakob kwaŋin, kodau apaarasia akanykaarei, kokorak ŋes Rakel akokuke aimany.

²⁹Koinak Laban akokuke Rakel Bilika akebulesit araun akebulesit.

³⁰ Koloma neejai Rakel da, komina Rakel aitelekarit Lea, kijaanak bobo ikar ice ikanykaarei.

³¹ Koany EJAKAIT ebe aponi kolaai Lea, kopuko akekoik: konye arai Rakel arakan.

³² Kopotuu Lea, kouru ikoku yenitelepat, komaik ekekiror Reuben; kotema atiar, “Naarai abu EJAKAIT koany ikacan; kwana kaminuni do okilenika.”

³³Kopotuu bobo, kouru ikoku yenitelepat; kotema atiar, “Naarai abu EJAKAIT kiira kwape kalaitere, ŋes kainakinia bobo ikoku yen.” Komaik ekekiror Simeon.

³⁴Kopotuu bobo, kouru ikoku yenitelepat; kotema atiar, “Aso irwan na imorikikin do okilenika keoŋ, naarai kauriki idwe lutelepai iuni.” Ŋes kemaikinere ekekiror Lebi.

³⁵Kopotuu bobo, kouru ikoku yenitelepat; kotema atiar, “Irwan na eturi EJAKAIT.” Ŋes kemaikinere ekekiror Yuda; kinye kwaŋin aur.