Read Ateso Ageun 32 Bible Online

Ageun 32 - Ateso bible

Ageun 32

¹ Abu Yakob kolot, kiriamunos kimalaikan luka Edeke.

² Keany Yakob kes kobala ebe, “Na ŋes ajore naka Edeke.” Komaik aibois ŋin Makanaim.[22]

³ Kijuka Yakob ikiyakia aiŋarenikin ŋes mama ejai Esau onaceke akwap naka Seir, ŋes emanikor loka Edom.

⁴ Kicorak kes, kobala ebe, “Kolimokis ejakaitika Esau kwanata ebe; ‘Ebala kwanata ebulesitikon Yakob ebe, Abu keboienenei ka Laban, kajaenenei ŋina aitodol kwana:

⁵ Ido ajai kimoŋin ka isigirian, ka isipanin, ka ibulesin, ka abulesin da: ido eyakunit alimokin ekajakait, kadum asianut kakonyenekon.’ ”

⁶ Koboŋut ikiyakia mama ejai Yakob kotemasi atiar, “Kipou kadoloto mama ejai onacekon Esau, ido ebunit ŋesi airiamun kajo; ka ituŋa akwat aoŋon eupas kaŋes.”

⁷ Kwaŋin kokurianar Yakob noi, kiyaloŋoŋ; kotiak ituŋa luajaas kaŋes, ka isipanin, ka aituk, ka akaalai araun atukon aarei.

⁸Kobala ebe, “Arai kedolok Esau atukot adiopet kitiji, ekui atukot naesali.”

⁹ Kotema Yakob atiar, “Wu Edeke loka papaaka Aburaam, Edeke loka papaka Isaak, wu EJAKAIT, lokatemari ebe, ‘Koboŋo akwap nakobukus ido mama kiinacanakon, eoŋ da kasubanakini jo ejok’;

¹⁰ Mam kebusakinit nepetai da aitimesia kere, ka nuka abeit da kere, nuibu kitodianak ekonibulesit; naarai abu katub Yorodan lo, kajai kebela bon; kwape kwana da aluor atukon aarei.

¹¹ Keŋaiŋait, koyuunai kakan naka onaceka, kakan naka Esau; naarai akuriana ŋes, kinye abunore aitiji eoŋ, toto ka idwe da.

¹² Ka jo da ibu kobala ebe, ‘Abeit kasubanakini jo ejok; ido etuluori akoniwur kwape kasiŋe naka aŋolol namam imarun.’ ”

¹³ Koper nen akuare ŋin, kolem kotoma kaŋul luajaas kaŋes araun ainakinet mama ejai Esau onaceke;

¹⁴Akinei akwat aarei, ka ikorwa akaisaarei, amerekekin akwat aarei ka imerekekin akaisaarei;

¹⁵Akaalai nuicirio akaisauni ka idwekec, aituk akaisaoŋon, ka lumaseniko itomon, asigiria akaisaarei ka idwekec itomon.

¹⁶Kititiŋ akanin nuka ibulesinike, nolisipan owaike bon; kotema ibulesinike atiar, “Kinarenikinai kotuboros, kojai apak kidiŋ kesipan ka esipan.”

¹⁷Kicorak Ioenarenikinit kobala ebe, “Nairiamunotor ijo konaceka Esau, kiiŋit jo ebe, ‘Lokaŋai bo ijo? Ilosi bo ai? Lukaŋai da ŋul luejaas kakonyenekon?’

¹⁸Kolimok ŋes ebe, ‘Luka ebulesitikon Yakob; ŋes ainakinet naeinunitai ejakaitika Esau: ido koany, ejai ŋesi da kaukosi.’ ”

¹⁹Kicorak lokiareit, ka lokiwuniet da, ka ŋul kere luameetos isipanin, kobala ebe, “Ilimokinete Esau kwaŋin kianyutu ŋes.

²⁰ Ido kineras ebe, ‘Koany ebulesitikon Yakob ejai kaukosi.’ ” Naarai abala ebe, “Esinapikini ŋes kainakinet naegei, kasodi konyet kaany akekonyen; diat kacamuni kanuka ŋun.”

²¹Kwaŋin kotubor ainakinet kiŋarenike: ŋes da elopet koper akuare ŋin nepepe kipaupake.

²² Konyou akuare ŋin, koya akeŋor aarei, ka akebulesin aarei, ka ikedwe itomon ka lodiopet, kotubor kodoket loka Yabok.

²³Koya kes, kitutub ecor, kitutub kere luajaatar.

²⁴ Kosalak Yakob bon; koutata etuŋanan kaŋes aitodol neacilar kide.

²⁵ Keany ebe mam epedori aibirokin, kotiro etul; kinunyakin etul loka Yakob eutas kaŋes.

²⁶ Kotema atiar, “Koosikinai, naarai acila kide.” Kotema atiar, “Mam kaosikin, dimikiinak arereŋ.”

²⁷Kotema ŋes atiar, “Ekonikiror iŋai?” Kobala ebe, “Eoŋ Yakob.”

²⁸ Kotema atiar, “Ekonikiror mam bobo enyaritai Yakob, dimarai Isirael: [23] naarai ipegata nepepe ka Edeke ka ituŋa, ido iteleka.”

²⁹ Kiŋit Yakob ŋes kobala ebe, “Keŋaiŋait kolimokinai ekonikiror.” Kobala ebe, “Inyo iŋisitor ekakiror?” Kisirereŋ ŋes kanen.

³⁰ Komaik Yakob aibois ŋin ekekiror Penuel; [24] kobala ebe, “Naarai aany Edeke kasesenas, akaijar da ajar.”

³¹Kolomak ŋes akoloŋ ketub Penuel, kicodokin amurwo.

³²Ŋes mam idwe luka Isirael enyamiata akiriŋ nakotul aitodol lolo, naarai abu kotiro etul loka Yakob, toma akiriŋ nakotul.