Read Ateso Ageun 33 Bible Online

Ageun 33 - Ateso bible

Ageun 33

¹ Kiteluo Yakob akekonye koŋolia, ido koany, ebunit Esau, ka ikiliok akwat aoŋon eupas kaŋes, Kokoranak idwe neejai Lea ka Rakel ka abulesin nuarei.

²Kisinaren abulesin ka ikecedwe, kitutupik Lea ka ikedwe, kinyek Rakel ka Yosep kokau.

³ Kotubor ŋesi da elopet kiŋarenikec, Kokukokin kwap irwan akanykaarei, aitodol naekunyakinia die mama ejai onaceke.

⁴ Koker Esau airiamun kaŋes, kotun ŋes, kibirokin omurisiŋike konu: komonyata akiyo.

⁵ Kiteluo akekonye, koany aŋor ka idwe; kobala ebe, “Lukaŋai lu luejaas kajo?” Koboŋok ebe, “Lu kes idwe luabu Edeke koinak ekonibulesit kanuka asianut.”

⁶Kosodete kikunyut abulesin, kes nepepe kikecedwe, kokukokinos.

⁷Kikuny Lea da ka ikedwe, kokukokinos: kokau kikuny Yosep ka Rakel, kokukekinos.

⁸ Kobala ebe, “Ekodet ŋol kere lokiriamun keoŋ apolouke inyo?” Koboŋok ebe, “Adumunia asianut kakonyen nuka ejakaitika.”

⁹Kobala Esau ebe, “Onac, luejaas keoŋ kadaunito; luejaas kajo koraunos lukon.”

¹⁰ Kobala Yakob ebe, “Mam, keŋaiŋait, arai kwana adumunit asianut kakonyenekon, kocam akainakinet naka akaninika; naarai aany akonyenekon, kwape eanyunia etuŋanan akonyen nuka Edeke, ijo da kisiyalamik eoŋ.

¹¹ Keŋaiŋait, kocam akainakinet nakiinun; naarai keswamak Edeke nukasianut, ido naarai lukijaa keoŋ kadaunito.” Kisidik, kocam.

¹²Kobala ebe, “Kageut erot, kaloto, eoŋ da keŋarenikini jo.”

¹³Kotema atiar, “Ekajakait, ijeni ebe emameete idwe agogoŋ, ido kwape kamerekekin ka aituk nukiiaa keoŋ itanakete: ido arai kemeata noi apaarit adiopet, etwakete isipanin kere.

¹⁴ Keŋaiŋait, kiŋarenik ejakaitika ekebulesit, eoŋ da alosi motimot, kwape kalosit naka ibaren luejaas kakonyeneka, ido kwape ejaar alosit naka idwe, aitodol neadolunio eoŋ Seir mama ejai ejakaitika.”

¹⁵ Kobala Esau ebe, “Aso do kenyekinia ice kotuŋa lukijaa keoŋ.” Kobala ebe, “Mam akiro; kadum asianut kakonyen nuka ejakaitika.”

¹⁶Kosodi Esau aboŋor kapaarit kaŋin kobea Seir.

¹⁷ Kolot Yakob Sukot, koduk eketogo, kobwaik ibarenike aujoi: ŋes keraunor ekiror loka aibois Sukot. [25]

¹⁸ Kodol Yakob kainapakina ore loka Sekem, loejai akwap naka Kanaan, kenyou koPadan-Aram; kidukur kiŋaren naka ere.

¹⁹ Kogwel alup nuabu kibubuk ekewema, katutubeta akwatat nuka epuesa kakanin nuka idwe luka Kamor, papa loka Sekem.

²⁰ Kodukok ŋina etem, komaik ekekiror El-eloke-Isirael. [26]