Read Ateso Ageun 38 Bible Online

Ageun 38 - Ateso bible

Ageun 38

¹ Kosodi kapaarasia kaŋun, konyou Yuda kama ejaas ikeinacan, koloma mama ejai Edulamit, ekekiror Kira.

² Koany Yuda kanen apese naka Ekanaanit ekekiror Sua; koyaŋa ŋes, koloma mama ejai.

³ Kopotuu, kidou ikoku yenitelepat; komaik ekekiror Er.

⁴ Kopotuu bobo, kidou ikoku yenitelepat; komaik ekekiror Onan.

⁵ Kidou bobo da ikoku yenitelepat, komaik ekekiror Sela; ajai Cesib, nakidounio ŋes.

⁶ Komanyak Yuda Er ekekiyai aberu, ekekiror Tamar.

⁷ Arono Er, ekiyai loka Yuda, kakonyen nuka EJAKAIT; koar EJAKAIT ŋes.

⁸ Kotema Yuda Onan atiar, “Koloma mama ejai aberu naka onacekon, kikonak ŋes kwape kibusakinitor onace loka lokatwan, kodumak onacekon aur.”

⁹ Kojen Onan ebe mam aur emaikinio nake; kosodi nakelomaria mama ejai aberu naka onaceke, kobukonori kwap, kinyek ainakin onaceke aur.

¹⁰ Akirot ŋin nakiswamai arono kakonyen nuka EJAKAIT: koar ŋes da.

¹¹ Kosodi kotema Yuda Tamar aberu naka okokuke atiar, “Kosal irai apuserut kotogo loka papakon, aitodol neepolooror Sela okokuka”; naarai kotema atiar, “Kinye ŋes da atwanare, kwape kikeinacan.” Kolot Tamar kiboienenei kotogo loka papake.

¹² Kotuboros apaarasia kotwana aberu naka Yuda akoku naka Sua; kosub Yuda asuban, kosodi kolot mama ejaas ikekatubok ajulo nuka amerekekin koTimuna, ŋes ka ekepapero Kira Edulamit.

¹³ Kolimokinai Tamar atiar, “Koany, papaakon elosi Timuna aitub ajulo nuka amerekekin.”

¹⁴ Kolaca inapen luka eipuseruneke, kimuko ekereet, kimukor kegoe kiboikin orute loka Enaim, loejai orot loelosi Timuna; naarai abu koany ebe apoloor Sela, komam einakina airumakin kaŋes.

¹⁵Keanyu Yuda ŋes, koomite ebe nadote; naarai kimukorit akekonyen.

¹⁶Kopaa korot neejai, kotema atiar, “Ikatuan, keŋaiŋait, kiyu kaloma mama ijai.” Naarai mam ajeni ebe ŋes aberu naka okokuke, Kotema atiar, “Kiinakini con inyo, arai kilom mama ajai?”

¹⁷ Kotema atiar, “Kejukakini ikalol yenika akinei kosipan.” Kotema atiar, “Kititini eoŋ inyo aitodol neijukunia?”

¹⁸ Kotema atiar, “Aititiŋet anyoin kainakini?” Kotema atiar, “Egilutukon ka aunokon, ka ebela loejai akanikon.” Koinak ŋes, koloma mama ejai, kopotik ŋes.

¹⁹ Konyou kolot, kolaca ekegoe lokimukos, konap inapen luka eipuserune.

²⁰Kijuka Yuda ikalol yenika akinei kakan naka epaperoke Edulamit, ainyakunia aititiŋet kakan naka aberu: konye mam abu kodum ŋes.

²¹Kiŋit tuna luka aibois naka aberu atiar, “Anibo nadote nalem ejai Enaim ariri naka erot?” Kotemasi atiar, “Emamei lem nadote kane.”

²²Koboŋo mama ejai Yuda, kotema atiar, “Mam abu kadum ŋes, ido ebalasi ituŋa luka aibois ebe, ‘Emamei lem nadote kane.’ ”

²³Kotema Yuda atiar, “Kenyeisi koyaŋaa, kinyein aisurum oni ileic; koany, ejuka ikalol yen, mam jo idumunit ŋes.”

²⁴ Kosodi ketuboros ilapio kwaka iuni, kolimokinai Yuda ebe, “Erai Tamar aberu naka okokukon naadote; ido koany, epotie akoik naka adoteu.” Kotema Yuda atiar, “Kitolomut ŋes, kicweai.”

²⁵ Nakitolomasi ŋes, kiyakik papaake atiar, “Ekiliokit elopet iboro lu, ŋes kapotikini.” Kotema atiar, “Keŋaiŋait, kojen lukaŋai lu, egilut, ka auno, ka ebela.”

²⁶ Kocam Yuda kes, kotema atiar, “Ketelekaa eoŋ karaut naedolit, naarai mam abu kainak ŋes Sela okokuka.” Mam bobo abu kojenu ŋes.

²⁷Kosodi, kedol apak naka aidoun, koany, kojaas imwatok kakoikike.

²⁸Kosodi keapu aidoun kitolom idiope akan; kitiŋ akesidon koenik eusi lokareŋan akan, kinera atiar, “Yen ŋes esiau alomun.”

²⁹Kosodi nakinyaka akan, koany, kolomu onaceke; kotema atiar, “Kanukinyo icilunori ijo kanukon?” Ŋes kemaikinere ekekiror Peres. [31]

³⁰Kokau kolom onaceke, loejai eusi lokareŋan akanike; komaik ekekiror Sera.