Read Ateso Ageun 39 Bible Online

Ageun 39 - Ateso bible

Ageun 39

¹ Koyaŋaarai Yosep Misiri; kosodi Potipar, ejakait loka Parao, ekapolon loka iserikalen, Emisiriat, agwel ŋes kakanin nuka Isimaelin, lukeyaunete ŋes nen.

² Kojai EJAKAIT ka Yosep, kokerianar, kiboie kotogo loka ekapolonike Emisiriat.

³ Koany ekapolonike kwape ejaar EJAKAIT kaŋes, ido kwape abu EJAKAIT kitekeriana ŋinibore kere yenikiswamai.

⁴ Kodum Yosep asianut kakonyeneke, kijaanak; kodakak ŋes araut ekaanyanaran kotogoke, kititiŋ lukejaas kaŋes kere.

⁵ Kosodi ageun kapak naadakakinia araun ekaanyanaran kotogoke, ayait ŋinibore kere yenajaatatar, kisirereŋ EJAKAIT etogo loka Emisiriat kanuka Yosep; arereŋ da naka EJAKAIT kojai kaŋinibore yenajaatatar ŋesi, lukotogo ka lukomana da.

⁶ Kinyekik kere luajaatatar ŋesi kakan naka Yosep, komam ejeni ibore yenejai kaŋes nabarai inyamat lukenyamenenei. Ido arai Yosep lotemel, akekonyen da nuisiyalamikinete.

⁷ Kosodi kokau kaŋun, kosesen aberu naka ekapolonike Yosep; kotema atiar, “Kapero.”

⁸Konye kogiri ŋesi, kolimok aberu naka ekapolonike ebe, “Koany, mam ekapolonika ejeni lueja keoŋ kotogo, ido abu ketitiŋ kere;

⁹ Emamei loketelekarit eoŋ kapolou kotogo kalo; emamei da imodiobore yenimam kainakinit nabarai ijo bon, naarai irai ijo akeberu: aso ekoni apedori ai aswam aronis naetia nen, adiakar da kama ejai Edeke?”

¹⁰Kosodi kinerenena kaYosep ŋinipaaran, komam enupakini apero kaŋes karaida aiboi kaŋes.

¹¹Kosodi kapakio kaŋun koloma togo aswam akeswamisio; komameete ituŋa lukotogo kanen.

¹² Kitiŋ akenapito, kobala ebe, “Kapero.” Kinyek Yosep akenapito kakanike koburucar koker kiŋa.

¹³Kosodi kanen keanyu ebe enyek Yosep akenapito kakanike aker da.

¹⁴Konyarau ituŋa luajaas togoke, kobala kes ebe, “Koany, kiinu Eburaniat aboliar oni; alom ŋesi mama ajai ebe tikiipere keoŋ, keluluk eoŋ keporoto loepol:

¹⁵Kosodi kiira ebe eluluk eoŋ keworoi, kinyekini do akenapito kama ajai con, kopaar akerit.”

¹⁶Kiŋadak anapitoke aitodol nakeboŋunio l ekapolonike ore.

¹⁷ Kolimonok kwape kejaatatar akiro nu ebe, “Ekonibulesit Eburaniat lukiinuni, abu kolom mama ajai aboliar eoŋ;

¹⁸Kosodi kanen keluluk eoŋ keworotoi, kinyek akenapito kama ajai, koker.”

¹⁹ Kosodi kiira ekapolonike akiro nuka aberuke nukelimonokini ebe, “Ekonibulesit abu keswamak eoŋ kwaŋin”; kinep akenyunyura.

²⁰ Kosodi ekapolonike ayaŋaar Yosep, kibwaik aidaris.

²¹ Konye kojai EJAKAIT ka Yosep kitodik nukasianut, koinak arereŋ kakonyen nuka ekedaran loka aidaris.

²² Kititiŋ ekedaran loka aidaris ienan kere lukejaas aidaris akanin nuka Yosep; ŋes da etetemenenei kere nukiswamaenenete kanen.

²³ Mam ekedaran loka aidaris apodo imodiobore kere yenabu kititiŋ ŋes; naarai ajai EJAKAIT kaŋes; kitekerianite EJAKAIT nukiswamaenenei ŋesi kere.