Read Ateso Ageun 41 Bible Online

Ageun 41 - Ateso bible

Ageun 41

¹Kosodi akaulo kikar iarei, kiruja Parao: ido koany, bala ebwoi kariri naka ecor.

²Ido koany, bala apotu kolomut kocor aituk akanykaarei nuejok nuetumito, kodakasi toma osege.

³Ido koany, aituk ace akanykaarei kotupakis kwa, kolomut kocor, irikorodas kosenyito; kobwaata kariri naka ecor kama ejaas aituk nuce.

⁴Aituk nuerikorodas nuasenyito konyama aituk akanykaarei nuajok nuatumito. Kokweny Parao.

⁵Kojotoor kiruja irwan nakiareit, ido koany, bala kosuroto kakimait adiopet aluŋuren nuka akima akanykaarei, iturananas kojokuka.

⁶Ido koany, aluŋuren akanykaarei nutinoi nuesirinyorit ekwam lokokide kotupakis kobwaŋut.

⁷Aluŋuren nutinoi kilikos aluŋuren akanykaarei nuturaŋ nukapolok. Kokweny Parao, ido koany, erai airujasit.

⁸ Kosodi kiwala akwap kiyaloŋoŋ eketau; kiyakia anyaraun imurwok kere luka Misiri, ka lukacoa kere: kolimok Parao airujasitike; konye komamu yenabu kopedo aitejenikin Parao apolouke.

⁹Kosodi ekawokon lokapolon alimokin Parao ebe, “Eitu lolo akaibucareta:

¹⁰ Abu Parao konyunyurik ikebulesin, koen kotogo loka ekapolon loka iserikalen: eoŋ ka ekepoon lokapolon da;

¹¹ Kerujata airujasit kakuare adiopet, eoŋ ka ŋes; kipou kerujata ŋinituŋanan kwape ajaar apolou naka airujasitike;

¹² Ido kojai nepepe kasio etelepat Eburaniat, ebulesit loka ekapolon loka iserikalen; kalimonokisi ŋes; kitejenik apolou naka airujasiakosi; kitejenik ŋinituŋanan kwape kejaar akeirujasit.

¹³ Kosodi kanen, kwape kitejenikinia ŋesi sio, kikonakis kwape kwaŋin; kenyakak eoŋ aswamuka, ka ŋol da kikajak.”

¹⁴ Kosodi Parao aijukar anyaraun Yosep, koyaut ŋes atipet kaidaris: kobaren, kilocok akenapito, koloma mama ejai Parao.

¹⁵ Kobala Parao Yosep atiar, “Erujat eoŋ airujasit, konye emamei yenepedori aitejenun apolouke: ido eira kilimitoi ebe naipupunio ijo airujasit ipedori aitejenun apolouke.”

¹⁶ Koboŋok Yosep Parao atiar, “Mere nukaŋ: Edeke ŋes einakini Parao abonokinio naka ainapakin.”

¹⁷Kotema Parao Yosep atiar, “Toma airujasitika, koany, bala abwoi eoŋ kariri naka ecor.

¹⁸Ido koany, bala apotu kolomut kocor aituk akanykaarei, nuetumito nukajokak; kodakasi toma osege.

¹⁹Ido koany, aituk akanykaarei ace kotupakis kwa kolomut kocor, nudokor nuerikorodas noi, nukasenyak, numam aanyunit apeŋo nukitetemet akeceronis kakwap nako Misiri kere.

²⁰Aituk nukasenyak nurikoda konyamata aituk akanykaarei nukatumak nuageete;

²¹Aso kedaut ainyam, mam ipedori ajenun ebe kenyamito; naarai aroko edokororos kwape ajaatar sek. Kasodi akwenyun.

²²Kaanyu kotoma airujaka, ido koany, bala kosuroto kakimait adiopet aluŋuren akanykaarei nuturaŋ nukajokak;

²³Ido koany, bala aluŋuren akanykaarei nuawokito, nutinoi, nuesirinyorit ekwam lokokide, kotupakis kobwaŋut.

²⁴ Apotu aluŋuren nutinoi kilikosi aluŋuren nuturaŋ akanykaarei, Kalimok imurwok; konye komamu yenepedori aitejenikin eoŋ apolouke.”

²⁵ Kotema Yosep Parao atiar, “Airujasit naka Parao erai adiopet: nuelosi Edeke aisub, kes nualimoki ŋesi Parao.

²⁶Aituk akanykaarei nukajokak kes ikar ikanykaarei, ka aluŋuren akanykaarei nuturaŋ kes ikar ikanykaarei; airujasit erai adiopet.

²⁷ Aituk da akanykaarei nukasenyak nurikoda nuatupakinete, kes ikar ikanykaarei, ido aluŋuren akanykaarei nuesirinyorit ekwam lokokide; eraunos ŋun ikar ikanykaarei luka ebeli.

²⁸Ŋin ŋes akirot naalimok eoŋ Parao; nuelosi Edeke aisub, etodiki ŋesi Parao.

²⁹Koany, epote ikar ikanykaarei luka amio naepol noi anatar akwap kere nako Misiri.

³⁰ Kokau kaŋul ejaunete ikar ikanykaarei luka ebeli; kisimurwokinete amio kere naka akwap nako Misiri; emudiari da ebeli akwap.

³¹Amio da mam ejenunio kakwap kanuka ebeli loetupakini; naarai ededeneari noi jokan.

³²Aponi kirucakinai Parao airujasit, naarai itogogoŋit Edeke akirot, itodolikini da Edeke ŋun atipet.

³³Aso do komou Parao etuŋanan loemisiana lokacoa, kodakak ayait akwap nako Misiri.

³⁴Kiswama Parao kwaŋin, ido kibwaik ikaanyanarak kakwap, kiŋadak idiopet kokany yenika akwap nako Misiri kokar ikanykaarei luka amio.

³⁵Kotukonokinai inyamat kere luka ikar kalu kaluejok lueponito, kinadai akima akan naka Pamo oreria lukapolok, kidarai.

³⁶Inyamat ŋul da eraunete imono luka akwap kanuka ikar ikanykaarei luka ebeli, luejaunete akwap nako Misiri; kinye akwap atwanare ebeli.”

³⁷Akirot ŋin ajokuna kakonye nuka Parao, kakonye da nuka ikekejaanakinako

³⁸ Kotema Parao ikekejaanakinak atiar, “Kipedori adumun etuŋanan loeputos kalo, etuŋanan loejai emoyo loka Edeke?”

³⁹Kotema Parao Yosep atiar, “Naarai kitodik Edeke jo ŋun kere, emamei loemisiana lokacoa da kwape kajo.

⁴⁰ Iyai ijo ekatogo, ido kwape ejaar akonikirot kirimarete ikatuŋa kere; dimarai ajakanutuka bon ketelekaria jo kapolou.”

⁴¹ Kotema Parao Yosep atiar, “Koany, kadakak jo ayait akwap kere nako Misiri.”

⁴² Kolaca Parao ekegilut lokaanyunet kobokoritike, kitanapik obokorit loka Yosep, kitanap inapen luka abaputa naejok, kitanapik irikot yenika esabu omurisiŋike.

⁴³Kitolot kagali kanakiareit naajai ŋesi. Kolimoroi kakonyeneke ebe, “Kokukokinos.” Kodakak ayait akwap kere nako Misiri.

⁴⁴Kobala Parao Yosep ebe, “Eoŋ Parao, emamei bobo ituŋanan yenitonyouni akekan karaida akekeju kakwap kere nako Misiri, dimarai kisiik ijo.”

⁴⁵Komaik Parao Yosep ekekiror Sapenat-panea; koinak Asenat akoku naka Poti-pera esasedoti loka On aimany. Kolot Yosep kirimo akwap kere nako Misiri.

⁴⁶ Kerai Yosep loka ikar akaisauni naabwoia kakonyen nuka Parao ekabaka loka Misiri. Konyou Yosep kama ejai Parao, kolot anatar akwap kere nako Misiri.

⁴⁷Kokar ikanykaarei luka amio, kobwaŋ akwap inyamat luipu noi.

⁴⁸Kotukonokinenei inyamat kere luka ikar ikanykaarei luajaunete akwap nako Misiri, kiijadanakinenei inyamat oreria; inyamat luka amanan nuerimorito ŋolire, eŋadanakinenei ore ŋol.

⁴⁹ Kinada Yosep akima nuipu noi kwape kasiŋe naka aŋolol, aitodol neenyeinia aimar; naarai mam emarunos.

⁵⁰ Kouri Yosep idwe iarei, koroko ekaru loka ebeli kedoluno, luaurikin Asenat akoku naka Poti-pera esasedoti loka On.

⁵¹Komaik Yosep ekiyai ekekiror Manase[32] ebe, “Naarai kesumurwoki Edeke akaitaaritoi, ka ekal loka papaka kere.”

⁵²Lokiareit da komaik ekekiror Epuraim[33] ebe, “Naarai ketupu Edeke eoŋ kakwap naka aiticanioka.”

⁵³Kodaunos do ikar ikanykaarei luka amio luajaas akwap nako Misiri.

⁵⁴ Kogeunos ikar ikanykaarei luka ebeli, kwape kebalar Yosep: kojaun ebeli akwapin kere, konye kojaas inyamat akwap kere nako Misiri.

⁵⁵ Naariebia eteŋei akwap kere nako Misiri, komonyatar ituŋa Parao kanuka inyamat. Kotema Parao Imisirian kere atiar, “Kolosenenete neejai Yosep; nukitemanari ŋesi yes, kiswamanakinete kwaŋin.”

⁵⁶ Koŋata ebeli akwapin kere; koŋaa Yosep imono kere kitwegelenenei Imisirian; kodedenear ebeli kakwap nako Misiri.

⁵⁷ Lukakwapin kere koponenakinete Yosep koMisiri agwel akima; naarai kodedenear ebeli kakwapin kere.