Read Ateso Ageun 43 Bible Online

Ageun 43 - Ateso bible

Ageun 43

¹ Kodedenear ebeli kakwap.

²Kosodi kanen, kedaut ainyam akima kere nuaomete koMisiri, kotema kes papakec atiar, “Koloto bobo, kogwelut idisinyamat.”

³ Kobala Yuda ŋes ebe, “Abu etuŋanan kiyapoik sio cut, kobala ebe, ‘Mam ianyunete akakonyen dimikito ejai onacekus kayes.’

⁴Arai ijukari onacekos kasio, kilosi agwelakin jo inyamat;

⁵Konye arai mam ijukari, mam kilosi: naarai abu etuŋanan kobala sio ebe, ‘Mam ianyunete akakonyen, dimikito ejai onacekus kayes.’ ”

⁶Kobala Isirael ebe, “Kanukinyo kiswamakiniata eoŋ erono kwaŋin, alimokin etuŋanan ebe ejai onacekus ece?”

⁷Kobalas ebe, “Abu etuŋanan je kiŋitiŋit sio kwape kijaar, ido kwape ejaar cwokokek, kobala ebe, ‘Eroko papakus ejari? Ejai yes onacekus ece?’ Kalimokis ŋes kwape ejaatar akiro ŋun; tikipedo biai ajenun ebe etemari atiar, ‘Koyaut onacekus da’?”

⁸Kotema Yuda Isirael papake atiar, “Kijuka esapat keoŋ, kinyouni isio da kaloto: tetere kijari, kenyeisi atwakare, isio ka jo, ka idwekosi ludidik.

⁹ Araun eoŋ ekabwoiaranike: kitepeseni eoŋ kanukeŋ; arai mam enyakunit mamakon, kebwaik kakonyenekon, kabeik eoŋ akirot apaarasia kere:

¹⁰Naarai kedim isio aitumor, abeit tikiibonu sek irwan nakiareit.”

¹¹ Kobala kes papakec Isirael ebe, “Arai do ikote nen, kiswamata kwanata; koyaata koborokus adisiraito nuka akwap nuitelekarito ajokis, koinakis etuŋanan ainakinet, ediomina, ka ediosik, ka luesaete, ka akinyet, ka emaido ka akunur:

¹² Koyaata da apesan aitemisio aarei kotoma akaninikus; koyaata bobo kakaninikus apesan nuenyakunio kaituke nuka ipukoikus; diat kinyakunio kanuka abuikin:

¹³Koyaata onacekus da, konyout, koboŋosi mama ejai etuŋanan.

¹⁴ Edeke Lokapedor koinak aitimio kakonyen nuka etuŋanan, kolacak onacekus je ka Benyamin. Eoŋ da arai katwania idweka, atwaniari.”

¹⁵Koyaata ituŋa ainakinet ŋin, koyaata apesan aitemisio aarei kakaninikec, ka Benyamin; konyout koloto Misiri, kobwaata kakonyen nuka Yosep.

¹⁶ Keanyu Yosep Benyamin ejai kakes, kotema ekeŋadan loka etogoke atiar, “Kitoloma ituŋa togo, kopuik, kitemonok; naarai kimori ituŋa ŋul keoŋ luka paaran.”

¹⁷Kiswama etuŋanan kwape kicorakinia Yosep; kitoloma etuŋanan ituŋa togo loka Yosep.

¹⁸Koyoŋa ituŋa, naarai etolomar kes togo loka Yosep; kobalas ebe, “Kanuka apesan nukinyakanakinio opukoiwok ŋes kitolomunere nee; akodokod, kosodi akakakin oni, anatar araun ibulesinike, ka awokosigirian da.”

¹⁹Kikunyakis neejai ekeŋadan loka etogo loka Yosep, kinerata kaŋes kokek loka etogo.

²⁰Kobalas ebe, “Okwe ejakait, abeit kipou kapotu nasodit agwel inyamat:

²¹ Kosodi kanen, kiidol aibois naperot, kalacasi ikosipukoi, ido koany, apesan nuka ŋolituŋanan kojaas aituk naka epukoke, akosipesan da koriana ekecetiai; kinyakunit bobo kakaninikosi.

²²Ido kiyau acepesan kakaninikosi agwelia inyamat: mam sio kijeni yenikibwaikini apesanakosi opukoikosi.”

²³Kobala kes ebe, “Ainapakin kojai mama ijaas, sirikiyoŋa, Edekekus ido Edeke loka papakus, ŋes kiinakini abara kotoma opukoikus: aponi kainakin akusipesan.” Kitolomik kes Simeon.

²⁴ Kitoloma etuŋanan ituŋa togo loka Yosep, koinak kes akipi, kilotata akecekeje: koinak akecesigirian da inyamat.

²⁵Kitemonokis ainakinet tetere kebu Yosep paaran; naarai apuput ebe enyamete atap kanen.

²⁶ Aso keboŋu Yosep ore, koinasi ŋes kotogo ainakinet naajai akaninikec, kisudedikinos ŋes.

²⁷ Kiŋit kes kwape ejaatar, kobala ebe, “Enale papakus, emojoŋ loibalasi? Eroko ejari?”

²⁸ Kobalas ebe, “Eŋalei ebulesitikon papakosi, eroko ejari.” Kituluroto akecekwes, kokukumoto.

²⁹ Kiteluo Yosep akekonye, koany onaceke Benyamin, okoku loka totoke, kobala ebe, “Lo ŋes enooritikus loibalasi yesi?” Kobala ebe, “Edeke kosianik jo, ikakoku.”

³⁰ Kiburak Yosep; naarai arieba noi eketau onaceke; komo neemonyia; koloma agolake komony kanen.

³¹ Kilot akonyen, kolom; kotik etau kobala ebe, “Kodutata inyamat.”

³² Kodutakinai ŋes bon, kes da bonik, ka Imisirian da luanyamenenete kaŋes, bonik: naarai mam Imisirian apedorete ainyam nepepe kIburanian; naarai arai ŋin naketal kama ejaas Imisirian.

³³Kiboikinos kakonyeneke, ekiyai kwape ejaar akepolou, ka eŋoorit da kwape ejaar eiditeuke: koumokis ituŋa noi.

³⁴ Koodonok kes inyamat luajaas akonyeneke; konye aodokinet naka Benyamin kitelekarite nukec irwan akany. Komatata, kiyalamikinos kaŋes.