Read Ateso Ageun 44 Bible Online

Ageun 44 - Ateso bible

Ageun 44

¹Kicorak ekeŋadan loka etogoke ebe, “Kilelebana ipukoi luka ituŋa inyamat kwape epedoriata kes aibwok, ido kibwaik apesan nuka ŋolituŋanan aituk naka epukoke.

²Ido kibwaik aikopoka, aikopo naka epuesa aituk naka epuko loka eŋoorit, akepesan da nuka akima.” Kiswama kwape ajaar akirot naenera Yosep.

³Nakiwala akwap kotwarai ituŋa, kes ka asigirianakec.

⁴Kedautu kes anyoun kore, eriŋa ejaas die, kotema Yosep ekeŋadanike atiar, “Konyou, kotupa ituŋa; kidolok ijo kes, kolimok kes ebe, ‘Kanukinyo itacakiniata aronis itia ajokis?

⁵Mere na ŋes naemasenena ejakaitika, ŋipeŋin da naedwarenenea? Ipotu kiswamata aronis aswam kwaŋin.’ ”

⁶Kodolok, kolimonok kes akiro ŋun.

⁷Kotemasi kesi atiar, “Inyo ainaki ejakaitika ener akiro nuikote kwaka ŋun? Madi akuj arai esubito ibulesinikon akirot naetia nen!

⁸ Koany, apesan nukipou isio kaanyutu kaituke nuka ipukoikosi, kipou kenyakutu mama ijai anyoun kakwap naka Kanaan: okwe tikikwaik ai kikokoi epuesa arai esabu kotoma togo loka ejakaitikon?

⁹ Ŋinituŋanan kotoma obulesinikon yenetakanuni ejai kaŋes, kotwana, isio da kiraun ibulesin luka ejakaitika.”

¹⁰Kinera ebe, “Aso do koraunos kwape ejaatar akusikiro: loetakanuni ejai kaŋes, koraun do ebulesitika; yes da emamuun akirot.”

¹¹Kosodete kisunyasi kesi awounun ŋolituŋanan epukoke kwap, kolac ŋolituŋanan ekepuko.

¹²Konie, ageun kama ejai ekiyai, kirikak kaneejai eŋoorit: kotakanu do aikopo kopuko loka Benyamin.

¹³ Kosodete kesi acilicil inapenekec, kibwaanakis iboro ŋolituŋanan asigiriake, kosodete aboŋor ore.

¹⁴ Kodol Yuda nepepe kikeinacan togo loka Yosep; kodumutu ŋes eroko ejai: kibirokinos kwap akonyeneke.

¹⁵Kotema Yosep kes atiar, “Akirot anyoin na nakiswamakis? Mam ijenete ebe etuŋanan kwape keoŋ epedori cut aidwar?”

¹⁶ Kinera Yuda atiar, “Kitemari bo isio ai ekajakait? Kinera biai? Arai kikwaikini ai kitojokaar? Arou Edeke numam edolito kobulesinikon; koany kirai ibulesin luka ejakaitika, isio ka ŋol da loatakanu ejai aikopo akanike.”

¹⁷ Kinera ŋesi ebe, “Madi akuj mam eoŋ eswamai kwaŋin: etuŋanan loatakanu ejai aikopo akanike, ŋes eraun ebulesitika: konye yes, konyout koloto mama ejai papakus kainapakin.”

¹⁸ Kosodi Yuda aikunyakin mama ejai, kiner ebe, “Wu ejakaitika, keŋaiŋait, mere kiner ekonibulesit akirot aki nuka ejakaitika, ido kinyek akoninyunyura anomor ekonibulesit; naarai isubit ijo cut bala Parao.”

¹⁹Abu ejakaitika kiŋit ikebulesin ebe, “Ejai yes papakus, arai onacekus?”

²⁰ Kasodete isio da alimokin ejakaitika ebe, “ ‘Ejai sio papakosi, emojoŋit, ka ikoku da yenaurie ŋesi kemojoŋ, edit ikoku; onaceke da atwana, ŋes esalit bon kodwe luka totoke, emina da papake ŋes.’

²¹ Ijo da kotema ikonibulesin atiar, ‘Koinunai, kaany.’

²²Katemasi isio ejakaitika atiar, ‘Mam epedori etelepat ainyein papake: naarai arai kinyei papake, etwani papake.’

²³ Kotema ijo ikonibulesin atiar, ‘Mam bobo ianyunete akakonyen dimikito kiupunos kenooritikus.’

²⁴Kasodete kiidol neejai ebulesitikon papaka, kalimonokis ŋes akiro nuka ejakaitika.

²⁵ Kosodi papakosi atemar ebe, ‘Koboŋosi bobo, kogwelakis sio idisinyamat.’

²⁶Kenerata isio da ebe, ‘Mam kipedori alosit. Arai kiupar kenooritikosi, kilosi: naarai mam kianyuni akonyen nuka etuŋanan dimarai kiupara kenooritikosi.’

²⁷ Ekonibulesit papaka kotema sio atiar, ‘Ijenete ebe abu akaberu kaurik eoŋ idwe iarei lutelepai:

²⁸ Konyou idiopet kaneajai, kenera ebe, “Abeit aponi kopoopoai”; eoŋ da ageuni kaŋin mam bobo aanyunit:

²⁹ Ido arai kiidemasi ŋin da, kosodi kodoik aronis, itolomarete ca akakorwo toma okatwak kanuka aiturur.’

³⁰ Aso do arai kalot mama ejai ebulesitikon papaka, komamei etelepat kasio: naarai akeijar imorikikina kaijar naka etelepat:

³¹Kosodi arai keanyu etelepat emamei, etwani: ikonibulesin da itolomarete akorwo nuka ebulesitikon papakosi toma okatwak kanuka aiturur.

³² Naarai ekonibulesit ŋes abwouni etelepat kama ejai papaka, kobala ebe, ‘Arai mam ayauni mama ijai, kabei eoŋ akirot kama ejai papaka apaarasia kere.’

³³ Okwe, keŋaiŋait, kosal do ekonibulesit ne aibois naka etelepat araun ebulesit loka ejakaitika; kouparos etelepat kiinacanake.

³⁴Naarai ekwaikini ai alosi mama ejai papaka, komamei etelepat keoŋ? Kenyek aanyun aronis naedolokini papaka.”