Read Ateso Ageun 45 Bible Online

Ageun 45 - Ateso bible

Ageun 45

¹ Kosodi kekurwoki Yosep aitik etauke kakonyen nuka ŋul kere luabwoete aaput kaŋes; kiworo kotema atiar, “Kitolomasi ŋinituŋanan konyout kaneajai.” Komamuun ituŋanan yenabwoi kaneajai ŋesi, naalimoror Yosep koinacanake.

²Kodelo noi; kiirasi Imisirian, kiira da etogo loka Parao.

³ Kotema Yosep ikeinacan atiar, “Eoŋ Yosep; eriŋa papaka ejari?” Mam iinacanake apotu koboŋokis ŋes: naarai eyaloŋoŋoete kakonyeneke.

⁴ Kotema Yosep ikeinacan atiar, “Kikunyutu neajai, keŋaiŋaito.” Kikunyakis. Kotema atiar, “Eoŋ Yosep onacekus, Loipotu kogwelasi tape kayaunio Misiri.

⁵ Natikwana sirikiikadakis, karaida anyunyurikin kotauonokus, kanukigwelariata tape kayaunio ne: naarai abu Edeke ketiliŋ eoŋ aitajar yes.

⁶Adau ebeli kotoma akwap ikar iarei: ido eriŋa esalito ikar ikany lumam ekoriere karaida asakia.

⁷Ido Edeke ŋes ketilini aitajarikin yes ipapai kotoma akwap, aitajar da yes koraut erioŋet loepol loedeun.

⁸ Aso mere yes kiyaunete eoŋ ne, nabarai Edeke; ketuluo da papa neejai Parao, ido ejakait loka etogoke kere, ekayaiton akwap kere nako Misiri.

⁹ Kisunyito, koboŋosi neejai papaka, kotemasi ŋes atiar, ‘Okokukon Yosep atema kwanata ebe, “Abu Edeke ketuluo ejakait loka Misiri kere: kobwot neajai, sirikiyap.

¹⁰ Ido iboienenei kakwap nako Gosen, kidunyakin keen, ijo ka ikonidwe, ka idwe luka idwekon, ka akonimerekekin, ka akoniituk, ka luijaatar kere.

¹¹ Ketanenenei da kanen: naarai eriŋa esalito ikar ikany luka ebeli: kinye aiyarorotoi, ijo ka ekalekon ka luijaatar.” ’

¹² Ido koany, esesenete akusikonye, akonye da nuka onaceka Benyamin, aitukuka ŋipeŋin inera kayes.

¹³ Ilimokinete papaka aibusesuka kere kotoma Misiri kwape ejaar, ka nuianyut kere: kiwonyakisi kitwobotut papaka ne.”

¹⁴Kosodi kibirokin omurisiŋ loka onaceke Benyamin, komony akiyo: Benyamin da komony komurisinlke.

¹⁵Konuana ikeinacan kere, komony kamakec: kokau kaŋun kiyalata ikeinacan kaŋes.

¹⁶Kopupunos akiro ŋun kotogo loka Parao, ebe, “Apotu iinacan luka Yosep.” Kisiyalamikis ŋun Parao, ka ikekejaanakinak da.

¹⁷Kotema Parao Yosep atiar, “Kolimok iinacanakon ebe, ‘Kikwaikis neta: kisibwoka itiaŋikus iboro, koloto kakwap nako Kanaan;

¹⁸ Kooma papakus ka ikaliakus, kopotu mamakaŋ: eoŋ da kainakinete luejok luka akwap nako Misiri, ido inyamenenete lukajokak luka akwap.’

¹⁹Natikwana kecorakinit jo, kikwaikis neta: koyaŋaasi agalin kakwap nako Misiri kanuka idwekus ludidik, ka aŋorokus da, koyaut papakus, kopotu.

²⁰Sirikipodokinos da iborokus luinyeinete: naarai ajokis naka akwap nako Misiri nakus.”

²¹Kiswamata odwe luka Isirael kwaŋin: abu Yosep koinak kes agalin, kwape kicorakinia Parao, koinak da inyamat luka erot.

²²Abu koinak ŋolituŋanan kere inapen luibusak, konye abu koinak Benyamin atutubeta nuka epuesa akwat auni ka inapen ikany luibusak.

²³Kijukak papake kwanata; isigirian itomon luebwokitos lukajokak luko Misiri, ka asigirian nuunor atomon nuebwokitos akima ka inyamat ido luunyaman luenyami papake korot.

²⁴Kotwara do ikeinacan, koloto: kotema kes atiar, “Kocoito kinyeis aijolopikin korot.”

²⁵Konyout kakwap nako Misiri, kopotu akwap nako Kanaan mama ejai Yakob papakec.

²⁶ Kotemasi atiar, “Eriŋa Yosep ejari, ido ŋes ekayaiton akwap kere nako Misiri.” Kodusaun etauke, naarai mam abu kiyu.

²⁷Kolimokis ŋes akiro kere nuka Yosep, nuabu kolimok kes: nakeanyunia agalin nuabu Yosep kijuka aomia ŋes, kikwar etau loka Yakob papakec.

²⁸Kotema Isirael atiar, “Edolit do: eriŋa okokuka Yosep ejari: alosi aanyun ŋes eriŋa eoŋ ketwana.”