Read Ateso Ageun 46 Bible Online

Ageun 46 - Ateso bible

Ageun 46

¹ Kolot Isirael, koyaŋa kere luajaas kaŋes, kobu Beer-seba, koinak asuban mama ejai Edeke loka papake Isaak.

² Kiner Edeke ka Isirael kotapo loka akuare ebe, “Yakob, Yakob.” Kotema atiar, “Eoŋ lo.”

³ Kobala ebe, “Eoŋ Edeke, Edeke loka papakon: sirikikurianar alosit Misiri, naarai ketuluori jo kaŋina ateker naepol.

⁴ Alosi nepepe kajo Misiri; abeit da kenyakuni jo bobo; Yosep da ŋes itemokini akonikonye naitwania ijo.”

⁵ Konyou Yakob anyoun koBeer-seba: apotu odwe luka Isirael kodakasi Yakob papakec, ka ikecedwe ludidik ka akeceŋor da, kagalin nuejukari Parao adakunia ŋes.

⁶ Koyaata ikecebaren, ka ikeceboro luadumunete kakwap nako Kanaan, kopotu Misiri, Yakob ka aurike kere.

⁷Odweke, ka odwe luka odweke nepepe kaŋes, adweke, ka adwe nuka odweke, ka aurike kere koyau kes Misiri.

⁸ Lu kes ikiroria luka idwe luka Isirael, luapotu kolomasi Misiri, Yakob ka odweke; Reuben, ekiyai loka Yakob.

⁹Odwe luka Reuben; Kanok, ka Palu, ka Kesuron, ka Karami.

¹⁰ Odwe luka Simeon; Yemuel, ka Yamin, ka Okad, ka Yakin, ka Sokar, ka Saul okoku loka aberu Akanaanit.

¹¹Odwe luka Lebi; Gereson, ka Kokat, ka Merari.

¹² Odwe luka Yuda; Er, ka Onan, ka Sela, ka Peres, ka Sera; konye kotwaka Er ka Onan kakwap naka Kanaan. Odwe luka Peres, Kesuron ka Kamul.

¹³Odwe luka Isakar; Tola, ka Puba, ka Iob, ka Simuron.

¹⁴Odwe luka Sebulun; Sered, ka Elon, ka Yakalecl.

¹⁵Ŋul kes odwe luka Lea, lukeurikini Yakob koPadan-Aram, nepepe kakokuke Dina: ituŋa kere luka ikedwe lusap ka lupesur emwaasi akaisauni ka luuni.

¹⁶ Odwe luka Gad; Sipion, ka Kagi, ka Suni, ka Esebon, ka Eri, ka Arodi, ka Areli.

¹⁷ Odwe luka Aser; Imina, ka Isiba, ka Isibi, ka Beria, ka Sera kinacikec; odwe luka Beria, Keber, ka Malakiel.

¹⁸ Ŋul kes odwe luka Silupa, naabu Laban koinak akokuke Lea, lukeurikini Yakob, ituŋa itomon ka lukanykape.

¹⁹Odwe luka Rakel aberu naka Yakob; Yosep ka Benyamin.

²⁰ Ido kakwap nako Misiri kouri Yosep Manase ka Epuraim, luaurikini ŋes Asenas akoku naka Potipera esasedoti loka On.

²¹ Odwe luka Benyamin; Bela ka Beker, ka Asabel, ka Gera, ka Naaman, ka Eki, ka Ros, ka Mupim, ka Kupim, ka Arad.

²²Ŋul kes odwe luka Rakel, lukeurikini Yakob; ituŋa kere emwaasi itomon ka luoŋon.

²³ Odwe luka Dan; Kusim.

²⁴ Odwe luka Naputali; Yakaseel, ka Guni, ka Yeser, ka Silem.

²⁵ Ŋul kes odwe luka Bilika, naabu Laban koinak Rakel akokuke, ŋul lukeurikini Yakob; ituŋa kere emwaasi ikanykaarei.

²⁶ Ituŋa kere luapote nepepe ka Yakob Misiri, lualomunete kakuanake, komam imarakinitai aŋor nuka odwe luka Yakob, ituŋa kere emwaasi akaisakanykape ka lukanykape.

²⁷ Odwe luka Yosep, lukeurikinio ŋes koMisiri, emwaasi ituŋa iarei: ituŋa kere lukokek loka Yakob, lukelomarete Misiri, emwaasi akaisakanykaarei.

²⁸ Kiyakia Yuda aiŋarenikin ŋes mama ejai Yosep, ailip aitodikinio erot loebei toma Gosen; kodoloto akwap nako Gosen.

²⁹Kitemonok Yosep agalike, kolot airiamakin ka Isirael papake, toma Gosen; kitodikin mama ejai, kibirokin omurisiŋike, komony akiyo komurisiŋike apak naepol.

³⁰ Kotema Isirael Yosep atiar, “Mere do katwana, naarai aany akonikonye iroko ijari.”

³¹Kotema Yosep ikeinacan ka ekalloka papake atiar, “Alosi alimokin Parao ebe, ‘Apotu mama ajai ikainacan ka ekalloka papaka luajaas akwap nako Kanaan.

³²Ido eraas kesi ikecokok, naarai icokienenete ibaren; ayaut da isipaninikec luka amerekekin ka aituk, ka iboro kere luejaatar.’

³³ Kosodi arai kiinyara Parao, kiin it ebe, ‘Anyoin bo akusiswam?’

³⁴ Iboŋokinete ebe, ‘Icokienenete ikonibulesin ibaren ageun koiditeukosi aitodol lolo, isio ka lukapapaakosi da’: tetere iboikinos roma akwap nako Gosen; naarai nolikecokon erai loketal mama ejaas Imisirian.”