Read Ateso Ageun 6 Bible Online

Ageun 6 - Ateso bible

Ageun 6

¹ Kosodete nakegeuniata ituŋa eiyas kakwap, kouriata apesur.

² Koanyut odwe luka Edeke adwe nuka ituŋa ebe ejokuka; komanyata aŋor kotoma kaŋun kere nuaseununete kesi.

³ Kotema EJAKAIT atiar, “Mam ekatau epegenenas ketuŋanan ikar ka ikar, naarai erai ŋesi da akuan: konye eraunos akepaarasia ikar akwatat ka akaisaarei.”

⁴ Kapaarasia kaŋun kojaas Inepilin roma akwap: ido kokau kaŋun, nakelomanariata odwe luka Edeke mama ejaas adwe nuka ituŋa, kourianakis kes: nulkes ituŋa lukagogoŋ lukolo sek, ituŋa luajenas.

⁵ Koany EJAKAIT aronis naka ituŋanan epol kotoma akwap, ka aitetemonorikere naka aomisio nukotauke erai naerono duc.

⁶ Kiitu EJAKAIT naarai abu kosub etuŋanan kotoma akwap, kokadak kotauke.

⁷Kobala EJAKAIT ebe, “Amwatari eoŋ ituŋanan yenabu kasub kakwap; ageun kotuŋanan, ka etiaŋ, ka lueliatos, ka lueporitos kapak; naarai eitu eoŋ kanuabu kasubunia kes.”

⁸ Konye kodum Noa asianut kakonye nuka EJAKAIT.

⁹ Na ŋes aur naka Noa. Arai Noa etuŋanan loedolit, lomam itoronitai katurike: kolosenenei Noa nepepe ka Edeke.

¹⁰Kouri Noa isap iuni Sem, ka Kam, ka Yapet.

¹¹Komunaun akwap kakonyen nuka Edeke, kikerepik akwap.

¹² Koany Edeke akwap, ido koany, kemunaun; naarai ŋinibore kere yenejai akuan abu komunau ekerot kotoma akwap.

¹³ Kotema Edeke Noa atiar, “Adolu awasia naka ŋinibore kere yenejai aijar kakonyeneka: naarai ekerepiki akwap kanukec; aso koany, amudiari eoŋ kes nepepe ka akwap da.

¹⁴Kikeu ataker naka ekitoi loka goper; kitemok agolai toma ataker, kilada kemina toma kokiŋa da.

¹⁵Lo ŋes epone loitemokinio ŋes: aojau naka ataker ikubitin [4] akwat auni, alalauke ikubitin akaisakany, amukururuke ikubitin akaisauni.

¹⁶Kopedok adirisa ataker, ekubit ediopet kuju; kibwaik ekekosiep loka ataker; kiswama ataker kicul itogoi, lokokwap, ka lokiareit, ka lokiwuniet.

¹⁷ Koany, ayauni eoŋ da akalele naka akipi toma akwap, amudiar akuan kere naejai eiyeŋane loka aijar toma, kwap kakuj; etwani ŋinibore kere yenejai toma akwap.

¹⁸Konye etogogoŋi eoŋ akaitutuket kajo; ilomari ijo ataker, ijo, ka odwekon, ka akoniberu, ka aŋor nuka odwekon, nepepe kajo.

¹⁹Ido imeikini toma ataker epone loka ŋinibore kere yenejai aijar naka akuan, iareiarei luka ŋolipone, imeikini toma ataker tetere ejarete nepepe kajo; ido koraas yenikiliokit ka yeniberu.

²⁰Lueporitos toma oponekec, ka ibaren toma oponekec, ka ŋinibore kere yeneliat kokwap toma oponeke, iareiarei luka ŋolipone epote neijai, tetere ejarete.

²¹ Koyaŋa inyamat kere luenyamio, kotukonok neijai; tetere inyami ijo, ka kes da.”

²² Kiswama Noa kwaŋin; kwape kicorakinia ŋes Edeke, kiswama kwaŋin.