Read Ateso Ageun 7 Bible Online

Ageun 7 - Ateso bible

Ageun 7

¹ Kotema EJAKAIT Noa atiar, “Koloma ijo ka ekalekon kere toma ataker, naarai adau aanyun jo idolit kakonyeneka katur kana.

² Ka ŋolitiaŋ loelai ilemari ijo ikanykaarei ka ikanykaarei, ikiliokit ka ikeberu; ka itiaŋ lumam elaete iareiarei, ikiliokit ka ikeberu;

³ka lueporitos luka apak, ikanykaarei ka ikanykaarei, yenikiliokit ka yeniberu: tetere ejari aurikec kotoma akwap kere.

⁴ Naarai akaulo kapaarasia akanykaarei, etetepi eoŋ akiru kakwap apaarasia akaisaoŋon apaaran ka akuare; ido amwatari kotoma akwap ŋinibore kere yenejari yenabu kasub.”

⁵ Kiswama Noa kere kwape kicorakinia ŋes EJAKAIT.

⁶Kedaunit Noa ikar akwat akanykape nakejaunor akalele naka akipi toma akwap.

⁷ Koloma Noa, ka odweke, ka akeberu, ka aŋor nuka odweke nepepe kaŋes toma ataker, kanuka akipi nuka akalele.

⁸Ka itiaŋ luelaete, ka itiaŋ lumam elaete, ka lueporitos, ka ŋinibore kere yeneliat kokwap.

⁹Kolomasi iareiarei neejai Noa toma ataker, yenikiliokit ka yeniberu, kwape kicorakinia Edeke Noa.

¹⁰Kosodi ketuboros apaarasia akanykaarei, kojaas akipi nuka akalele toma akwap.

¹¹ Kokaru lokakwat akanykape loka aijar naka Noa, toma olap lokiareit, kapaaran nakitomonet kakanykaarei naka elap, kapaaran kaŋin kocilunos akonyen nuka ataroi nukapolok, koŋaaros apedon nuka akuj.

¹²Kotep akiru akwap apaarasia akaisaoŋon paaran ka kuare.

¹³Kapaaran kaŋin kolomasi Noa, ka Sem, ka Kam ka Yapet, odwe luka Noa, ka aberu naka Noa, ka aŋor auni nuka odweke nepepe kakes, toma ataker;

¹⁴kes, ka ŋolitiaŋ koponeke, ka ibaren kere kotoma oponekec, ka ŋinibore kere yeneliat kokwap toma oponeke, ka ŋinibore yeneporitoi toma oponeke, ka ŋinikweny yenikejaas abebenoka.

¹⁵Kolomasi neejai Noa toma ataker, ŋinikuan kere naajai eiyeŋane loka aijar iareiarei.

¹⁶ Lualomarete da, kolomasi yenikiliokit ka yeniberu yenika ŋinikuan kere, kwape kicorakinia ŋes Edeke: kogolok EJAKAIT ŋes toma.

¹⁷Kojai akalele toma akwap apaarasia akaisaoŋon, kiyatakinos akip, kileput ataker, kikalelo kokuju akwap.

¹⁸ Kipikosi akip, kiyatakinos noi kakwap, kijelelitoi ataker kokuju akipi.

¹⁹ Kiyatakinos akip noi airap akwap, iroŋan da luaojak kere luajaas kwap kakuj kere, koraparos.

²⁰Kiyatakinos akip ikubitin itomon ka lukany kuju; koraparos iroŋan.

²¹ Kotwana akuan kere nakelosi kotoma akwap, lueporitos, ka ibaren, ka itiaŋ, ka ŋinibore kere yeneliat kokwap, ka ŋinituŋanan;

²² kotwakata kere lukejaas eiyeŋane loka etau loka aijar toma okumesikec, kere lukejaas toma akwap nakeonit.

²³ Komwatarai ŋinibore kere yenajari yenajai toma akwap, ituŋanan, ka ibaren, ka ibore yeneliat, ka lueporitos kokuju, komwatarai kakwap; kosalak Noa bon, ka kes lukejaas nepepe kaŋes toma ataker.

²⁴ Kirumata akip akwap adaun apaarasia akwatat ka akaisakany.