Read Ateso Ageun 8 Bible Online

Ageun 8 - Ateso bible

Ageun 8

¹ Kiitu Edeke Noa, ka ibore kere yenikajaran, ka ibaren kere lukejaas nepepe kaŋes toma ataker: kitukut Edeke ekwam kitor akwap, kiŋoŋaros akip.

² Kogolokinoi akonyen nuka ataroi, ka apedon nuka akuj, kitikokinai da akiru nakokuju.

³ Koboŋonorete akip ducuduc anyoun kokwap. Kedaunos apaarasia akwatat ka akaisakany kiŋoŋaros akip.

⁴Kolap lokikanyetekaarei, kapaaran nakitomonet kakanykaarei naka elap, kidokokin ataker oroŋan luka Ararat.

⁵Kiŋoŋaros akip aitodol olap lokitomonet: kotoma olap lokitomonet kapaaran nasodit naka elap, kotakanut aidiasia nuka iroŋan.

⁶ Kosodi ketuboros apaarasia akaisaoŋon koŋaa Noa adirisa naka ataker nakikei ŋesi.

⁷ Kijuka ekuruk, kirim aitodol nekeonikinioto akip kakwap.

⁸Kijuka ajele aanyun arai eŋoŋaros akip kokwap;

⁹ konye mam ajele kedumuna neisibworaria akekeje, koboŋo neejai ŋesi toma ataker, naarai ajaas akip akwap kere; korio ŋesi akekan kitiŋ ŋes kitolom toma ataker.

¹⁰Kidarek apaarasia ace akanykaarei; kijuka bobo ajele alomar kataker;

¹¹ koboŋo ajele neejai ŋesi eboŋ; ido koany, etodit akiot naka eseitun nakedenuni: kosodi kojen Noa ebe eŋoŋaros akip kakwap.

¹²Kidarek bobo apaarasia akanykaarei; kijuka ajele; mam bobo abu koboŋu neejai.

¹³Kosodi kokaru lokakwat akanykape ka lodiopet, toma olap losodit, kapaaran nasodit naka elap, koonikis akip kakwap. Kopuko Noa arapetait naka ataker kite, ido koany, eonit akwap.

¹⁴Kotoma olap lokiareit, kapaaran nakakaisaarei kanukanykaarei naka elap, koono akwap.

¹⁵Kotema Edeke Noa atiar,

¹⁶ “Kolom kataker, ijo ka akoniberu, ka odwekon, ka aŋor nuka odwekon nepepe kajo.

¹⁷ Kitoloma nepepe kajo ŋinibore kere yenejari yenejai nepepe kajo, yenika ŋinikuan kere, ka lueporitos, ka ibaren, ka ŋinibore kere yeneliat kokwap; kouriata noi kesi kakwap, konyaaros, kipuaros kakwap.”

¹⁸Kolom Noa ka odweke, ka akeberu, ka aŋor da nuka odweke nepepe kaŋes.

¹⁹Ŋolitiaŋ, ka ŋinibore yeneliat, ka ŋinibore yeneporitoi kere, yenelosi kere kakwap, kwape ejaatar atekerinikec, kolomut kataker.

²⁰ Kodukok Noa EJAKAIT etem, kolem kanolitian kere loelai, ka ŋinibore yeneporitoi yenelai, koinak asuban otem.

²¹ Kiŋu EJAKAIT asakat naeur saa; kiner EJAKAIT kotauke atiar, “Mam bobo ekenokini alup kanuka ituŋanan, naarai aitetemonori nakotau loka ituŋanan erono ameuni koiditeuke; ido mam bobo adanyi ŋinibore kere yenejari kwape abu keswamaa.

²² Eriŋa akwap ejai, mam edaununos apakio nuka aiye, ka aisak, aterot ka aibuse, akamu ka aiporo, apaaran ka akuare.”