Read Ateso 2 Samuel 1 Bible Online

2 Samuel 1 - Ateso bible

2 Samuel 1

¹ Kosodi kanen kedau Saul atwanare, keboŋu Daudi kajar Imalekain, kodaunite da Daudi apaarasia aarei koSikilag;

² Kosodi kanen kapaaran nakiwuniet, koany, kobu etuŋanan koidukurun kama ejai Saul koeilieilite ikenapen, kojukite alupot da akouke; kosodi kedol mama ejai Daudi, kisuded, kiyoga.

³Kobala Daudi ŋes ebe, “Laali bo kibunio?” Kotema atiar, “Akui koidukurun luka Isirael.”

⁴ Kobala Daudi ŋes ebe, “Ekote bo ai? Keŋaiŋait kolimokinai.” Koboŋok ebe, “Akera ituŋa kojie, ido ebiroros ituŋa luipu atwaka; Saul ka okokuke Yonatan atwaka kesi da.”

⁵Kobala Daudi etelepat lokelimokini ŋes ebe, “Kijenuni biai ebe atwana Saul ka okokuke Yonatan?”

⁶ Kotema etelepat lokelimokini ŋes atiar, “Napajaar eoŋ moru Giliboa, koany, kogoŋakin Saul akwarake; ido koany, agalin ka luibwanenito kituburuunitos.

⁷Kosodi kenolia kau, kaany eoŋ, kanyara. Kaboŋok ebe, ‘Eoŋ lo.’

⁸Katemaeoŋ atiar, ‘Iŋai bo ijo?’ Kaboŋok ŋes ebe, ‘Eoŋ Emalekait.’

⁹Katema eoŋ atiar, ‘Keŋaiŋait, kobwo kosiepika, koar eoŋ, naarai kerumut ican; naarai akaijar eroko ejari kotomakaŋ.’

¹⁰ Kasodi aibwo kosiepike, kaar ŋes, naarai abu kajen cut ebe mam epedori araut ekajaran kedau aibirokin kwap; kayaŋa aboko naajai akouke, ka aisinit naajai akanike, ido ayaunit mama ejai ekajakait.”

¹¹ Kosodi kitiŋ Daudi ikenapen kodi; kiswamata da kwape kwaŋin ituŋa kere lukejaas kaŋes.

¹²Kibworoto, komonyata akiyo, koluŋata aitiwar akwap, kanuka Saul, kanuka Yonatan da okokuke, kanuka ituŋa luka EJAKAIT, kanuka ekek da loka Isirael; naarai ebiroros kekileŋ.

¹³Kobala Daudi etelepat lokelimokini ŋes ebe, “Lokai bo ijo?” Koboŋok ebe, “Arai eoŋ okoku loka emoit, Emalekait.”

¹⁴ Kobala Daudi ŋes ebe, “Kanukinyo mam kiyonia arior akonikan amudiar ŋol loinyonyoikinit EJAKAIT akinyet?”

¹⁵ Konyarau Daudi ediopet kotelepai, kolimok atiar, “Kikunyak, kosomakin.” Kicum ŋes kotwana.

¹⁶ Kobala Daudi ŋes ebe, “Akoniwokot kobeata akoukon; naarai akoniituk ŋes akajenan kamakon inera atiar, ‘Aar ŋol loinyonyoikinit EJAKAIT akinyet.’ ”

¹⁷Kosodi kokuudian Daudi Saul ka Yonatan okokuke akuudian na:

¹⁸ Kicorak aisisianakin idwe luka Yuda ekosio loka akabwa: koany, kiwadikatai oitabo loka Yasar. Kobala ebe:

¹⁹“Aibusesukon, WU okwe Isirael, aari kaiboisiokon nuiceleleete! Wu okwe ebiroros itikirigin!

²⁰ Sirikilimonokis koGat, Sirikisiarakis orotin luka Asukelon; Kinyeis adwe nuka Ipilisitian aiyalama, Kinyeis adwe nuka kalumam ekepitai ailel.

²¹ Yes iroŋan luka Giliboa, Kinyeis akopyo karaida akiru ajaut kokujukus, Karaida imanikoria luka kaluiinakina; Naarai ŋina acakakinio kileic ebuku loka itikirigin, Ebuku loka Saul bala lomam enyonyoikinitai akinyet.

²² Kaokot nuka ŋul kalukearia, Kasiepa da nuka itikirigin, Akabwa naka Yonatan mam abonunenei kau, Ka ekileŋ loka Saul da mam aboijunenei atitai.

²³ Saul ka Yonatan araas lukajokak ido luitalakaarito kaijarakec; Mam aponi kotiakai katwanarekec; Atiroko aitelekarit imorukaalen, Agogoŋ aitelekarit iŋatunyo.

²⁴Yes adwe nuka Isirael, kibworoto Saul, Lokitanapi yes lukareŋak lukaitojoka, Lokisiri ikusinapen kesabu.

²⁵Wu okwe ebiroros itikirigin Kokidiŋ ojie! Aari Yonatan kaiboisiokon nuiceleleete.

²⁶ Eturur kanukon, onaceka Yonatan; Ibu kitalakaanari eoŋ noi noi; Akonomin mamakaŋ arai nakaumokin, Adepar amin naka aŋor.

²⁷Wu okwe ebiroros itikirigin, Amudiaros da lujiis luka ajore!”