Read Ateso 2 Samuel 12 Bible Online

2 Samuel 12 - Ateso bible

2 Samuel 12

¹ Kijuka EJAKAIT Natan mama ejai Daudi. Kobu ŋesi mama ejai, kotema ŋes atiar, “Ajaas ituŋa iarei toma ore ediopet; abarit ediopet, kicana loce.

²Ajaas ekabaran isipanin luipu noi luka aituk ka amerekekin:

³Konye amamei lokican ibore, dimarai amerekek adiopet nakalol, naagweli ŋesi, kitan da: kopoloor nepepe kaŋes ka ikedwe; komorete kaŋes ikenyamat luikidioko, komasete kaikopoke, koperi katorobuke, kosubite bala erai akokuke.

⁴Kobu ekaloton mama ejai ekabaran, mam abu koyaŋa yenikosipaninike luka aituk ka luka amerekekin apuikin ekaloton loabu kobu mamake, konye koyaŋa imerekek yenika lokican, kopuik etuŋanan loabu kobu mamakeŋ.”

⁵Kinep noi anyunyura naka Daudi aluikin etuŋanan; kotema ŋesi Natan atiar, “Kwape ejaria EJAKAIT, etuŋanan loeswamai ŋun ibusakinit atwanare.

⁶ Egeli imerekek irwan aoŋon, naarai abu kiswama akirot ŋin, ido naarai mam abu kitim.”

⁷ Kotema Natan Daudi atiar, “Ijo ŋes etuŋanan ŋol. Inera EJAKAIT, Edeke loka Isirael, kwanata ebe, ‘Abu eoŋ kenyonyoik jo akinyet araun ekabaka loka Isirael, abu kayu jo kakan naka Saul:

⁸Abu kainak jo etogo loka ejakaitikon, aŋor da nuka ejakaitikon katorobukon, kainak jo ekek loka Isirael ka loka Yuda; arai kiikadito ŋul, tikeyatakinit jo ice bobo.

⁹ Kanukinyo imwania akirot naka EJAKAIT, aswam nueroko kakonyeneke? Inom ijo Uria Ekitit kekileŋ, iyana aberuke araun akoniberu, iara ŋes kekileŋ loka idwe luka Amon.

¹⁰ Aso do mam enyouni ekileŋ kokekikon; naarai imwan ijo eoŋ, iyana aberu naka Uria Ekitit araun akoniberu.’

¹¹ Inera EJAKAIT kwanata ebe, ‘Koany, etonyoikini jo aronis kotogokon, ayaŋaari aŋorokon kakonyenekon, ainakini kes mama ejai eidunyetekon, eperete ŋes kanorokon paaran kaitebeikin.

¹²Naarai iswama ijo kaiyeiyea: konye eswamai eoŋ akirot nln kakonyen nuka Isirael kere paaran kaitebeikin.’ ”

¹³ Kotema Daudi Natan atiar, “Adiaka kama ejai EJAKAIT.” Kotema Natan Daudi atiar, “Alema da EJAKAIT adiakaretekon; mam jo itwani.

¹⁴ Konye naarai iinak lukasurupo luka EJAKAIT amoromor kanuka aswamisioit ŋin, abeit etwani ikoku yenikiwurikinitai jo.”

¹⁵ Kolot Natan togoke. Kinom EJAKAIT ikoku yenaurikini aberu naka Uria Daudi, kodekakin noi.

¹⁶ Kanuka ŋun kiŋaiŋa Daudi Edeke kanuka ikoku: kikany Daudi eteŋei, koloma, koper kalup, akuare kia.

¹⁷Konyout imakio lukotogoke, kobwaata kosiepike, aitonyoun ŋes kokwap: konye koŋer, mam da abu konyam atap kakes.

¹⁸Kosodi kanen, kapaaran nakikanyetekaarei kotwana ikoku. Kokuriakata ikejaanakinak luka Daudi alimokin ŋes ebe atwana ikoku; naarai kobalas ebe, “Koany, naariŋar ikoku ejari, kinera oni kaŋes, mam abu kopup iporotoiwok: ikwaikini lolo ai ŋesi erieba, arai kilimokini ŋes ebe atwana ikoku?”

¹⁹Konye keanyu Daudi ebe iyeiyeanakinos ikejaanakinakake, kojenik Daudi ebe atwana ikoku: kotema Daudi ikekejaanakinak atiar, “Atwana ikoku?” Kotemasi kesi atiar, “Atwana ŋesi.”

²⁰ Kosodi Daudi anyoun kokwap, kiloŋ, kinyonyoik akinyet, kijul anapitoke; koloma togo loka EJAKAIT, koma: kosodi aboŋor togoke: kekotokin atap kibwaikis akonyeneke, konyam.

²¹Kosodete ikekejaanakinak atemar ŋes atiar, “Anyoika nu nuiswama? Naariŋar ikoku ejari ikany ijo eteŋei komony kanuka ikoku; konye naatwania ikoku, inyou, inyam atap.”

²² Kotema atiar, “Naariŋar ikoku ejari, abu kekany eteŋei, kamony: naarai abala ebe, ‘Iŋai bo ejeni motoko esiana EJAKAIT mamaka, tetere ejari ikoku?’

²³ Konye do atwana, kanukinyo ekanyia bobo eteŋei? Apedori ainyakun ŋes bobo? Alosi eoŋ rwaru mamake, konye mam ŋes eboŋuni mamakaŋ.”

²⁴ Kipud Daudi Bat-seba akeberu, koloma mamake, koperoto kaŋes: kouru ikoku yenisapat, komaik ekekiror Solomon. Komina EJAKAIT ŋes;

²⁵Kijuka akirot konabi Natan, komaik ekekiror Yedidia,[3] kanuka EJAKAIT.

²⁶ Kitiji Yoab Raba loka idwe luka Amon, koyaŋa ere loka ekabakane.

²⁷Kijuka Yoab ikiyakia mama ejai Daudi kotema atiar, “Etiji Raba, eebo, ayaŋa eoŋ ere loka akipi.

²⁸Aso do kotukok ituŋa ice luesalito, kidukur asurokin ere, koyaŋa ŋes: kenyek eoŋ ayaŋaar ere, komaikinai ekakiror.”

²⁹Kotukonok Daudi ituŋa kere, kolot Raba kitiji, kirum.

³⁰ Kolem ŋesi aboko naka ekabakakec kakouke; alaŋiruke atalat naka esabu, kejaas amor nuka akais nuipu tomake: kitanapikinai akou naka Daudi. Kitolom luŋatuna luka ere luipu noi.

³¹Kitolom da ituŋa lukejaas nen, kibwaik kes kwap kimusemenin, kwap kasua nuboket, kwap kaepei nuka asua, kitotor kes neecweere amatapalin: kiswamak ireria kere luka idwe luka Amon kwaŋin, Koboŋo Daudi ka ituŋa kere Yerusalem.