Read Ateso 2 Samuel 18 Bible Online

2 Samuel 18 - Ateso bible

2 Samuel 18

¹Kimar Daudi ituŋa lukejaas kaŋes, kodakanak ijaka luka ilukumin ka ijaka luka akwat.

² Kijuka Daudi ituŋa korioŋeta iuni, ediopet akan naka Yoab, ediopet akan naka Abisai okoku loka Seruia, onace loka Yoab, ka ediopet da akan naka Itai Egitit. Kobala ekabaka ituŋa ebe, “Eoŋ da elopet kiupar kayes ojie.”

³ Konye kobalas ituŋa ebe, “Mam jo ilosi: naarai kiiker isio mam kipodoi: karaida ketwana atutubetekosi, mam kipodoi: konye jo iriakas kasio ilukumin itomon: aso tiejok jo asalakin ore ikapakina ayuun sio.”

⁴Kotema ekabaka kes atiar, “Nuitojokata yesi, kes eswamai eoŋ da.” Kobwo ekabaka kawai kerute, kolomete ituŋa kere kakwat ka ilukumin.

⁵Kicorak ekabaka Yoab ka Abisai ka Itai kinera atiar, “Kiyamuyamut etelepat kanukaŋ, ŋes Abisalom.” Kiirasi ituŋa kere naecorakinia ekabaka ijaka kere akiro nuka Abisalom.

⁶ Kosodete kolomasi ituŋa ais ejie ka Isirael; kojau ejie amagoro naka Epuraim.

⁷ Kipikoroi kaŋina ituŋa luka Isirael kakonyen nuka ikejaanakinak luka Daudi, kojau aario naepol kapaaran kaŋin naka ituŋa ilukumin akwat aarei.

⁸Naarai kaŋina abu ejie kisiarakin akwap kere: koar amagoro ituŋa luipu kapaaran kaŋin aitelekarit lukeari ekileŋ.

⁹ Koturiaikin Abisalom ikejaanakinak luka Daudi. Kibwanenite Abisalom ekenyubu, kitor enyubu kwap katenun nuetumito nuka ekum loepol, kikamakin akou okum, kijeko kokidiŋ akuj ka akwap: korasite enyubu lokibwanenit kiŋaren.

¹⁰Kojai etuŋanan lokeanyuni, kolimok Yoab kinera atiar, “Koany, abu kaany Abisalom iiekokino okum.”

¹¹Kotema Yoab etuŋanan lokelimokini atiar, “Koany, ibu ijo koany, kanukinyo kigirio aibirun ŋes kwap? Eoŋ da tikainak jo atutubeta atomon nuka epuesa ka arukan.”

¹²Kobala etuŋanan Yoab ebe, “Karaida kaainakin atutubeta alukumit nuka epuesa akanika, timam karioo akakan mama ejai okoku loka ekabaka: naarai kipou keirasi kicorakini ekabaka jo ka Abisai ka Itai ebe, ‘Kocoito kereka kinye etuŋanan atiror etelepat Abisalom.’

¹³Konye tikeswama nakaiŋal aiar akeijar (kwabo emamei akirot naibwaio kama ejai ekabaka), aso tikiŋadaar ijo da olopet.”

¹⁴Kosodi kotema Yoab atiar, “Mam apedori aitumor kajo kwaŋin.” Kitiŋ ikojoi iuni kakekan, koremio Abisalom otau, eroko ejari kokidiŋ okum.

¹⁵Itelepai da itomon lukitinenenete lujiis luka Yoab kirigaut kicwnueumata Abisalom, koara.

¹⁶Kokut Yoab arupepe, koboŋut ituŋa kama kerukitotor Isirael naarai kitikok Yoab ituŋa.

¹⁷ Koyaŋaasi Abisalom, kocakakis aipany nakepol kamagoro, kotukokis kujuke atukot naepol noi naka amor: kosodete kokera luka Isirael kere, ŋinituŋanan owemake.

¹⁸ Ido eroko Abisalom ejari abu kolem epir lokejai aditot naka ekabaka kosipok: naarai enera atiar, “Emamei een ikoku yeniitununere ekakiror.” Komaik epir ekekiror: ido enyaritai aiitunet naka Abisalom kiton lolo.

¹⁹ Kosodi Akimaas okoku loka Sadok, kobala ebe, “Mere kaker kwape kwana, kaina ekabaka akiro, kwape abu EJAKAIT kitokokolikinio ŋes lukasurupoke.”

²⁰Kobala Yoab ebe, “Mam iyaŋaari akiro lolo, konye iyaŋaari aeepaaran; konye lolo mam iyaŋaari akiro, naarai atwana okoku loka ekabaka,”

²¹Kosodi kobala Yoab Ekusit ebe, “Kolot kolimok ekabaka akiro nuiany ijo.” Kokukokin Ekusit Yoab, kopaari akerit.

²²Kosodi Akimaas, okoku loka Sadok, kobala bobo Yoab ebe, “Mam akiro, kisiikinai kaker eoŋ da katupa Ekusit.” Kobala Yoab ebe, “Ikakoku, kanukinyo ikotor ijo akerit, naarai mam ibore yenidumuni kaŋina?”

²³Kotema ŋes atiar, “Mam akiro, akeri eoŋ.” Kobala ŋes ebe, “Koker bo.” Kosodi koker Akimaas, kitor Apuuton, kilany Ekusit.

²⁴ Kiboie Daudi kokidiŋ orutei iarei; kodoka eketeon kuju orute loka abwas, kiteluo koŋoleŋol, ido koany, ekeruni etuŋanan bon.

²⁵Kiworok eketeon kolimok ekabaka. Kobala ekabaka ebe, “Arai erai ediopet, eyaunit akiro.” Kodiŋirir akerun; koeku die.

²⁶Kosodi koany eketeon ecetuŋanan loekeruni: konyarau eketeon ekedaran erute, kobala ebe, “Koany, ecetuŋanan loekeruni bon.” Kobala ekabaka ebe, “Eyaunit ŋesi da akiro.”

²⁷ Kotema eketeon atiar, “Aomit eoŋ akerit naka ŋol kaloinarenit esubit bala akerit naka Akimaas, okoku loka Sadok.” Kobala ekabaka ebe, “Erai etuŋanan lokajokan, eyaunit akiro nukajokak.”

²⁸Kiworok Akimaas ekabaka, kotema ŋes atiar, “Yoga.” Kisuded kakonyen nuka ekabaka, kinera atiar, “Kituritete EJAKAIT Ekonideke, loepiko ituŋa lukedakakinete akecekanin ekajakait ekabaka.”

²⁹Kobala ekabaka ebe, “Ejai etelepat Abisalom ejok?” Koboŋok Akimaas ebe, “Nakejukunia Yoab ekejaanakinan loka ekabaka, ŋes eoŋ ekonikejaanakinan, abu kaany autaar naepol konye mam abu kajen akiro.”

³⁰Kobala ekabaka ebe, “Komanu, kobwo kane.” Komanu, kobwo.

³¹ Ido koany, kobu Ekusit; kobala Ekusit ebe, “Ainunit ekajakait ekabaka akiro: naarai kitokokolik lolo EJAKAIT ediŋet loka ŋul kere lukinyoikinete jo.”

³²Kobala ekabaka Ekusit ebe, “Ejai etelepat Abisalom ejok?” Koboŋok Ekusit ebe, “Lukasurup luka ekajakait ekabaka ka ŋul kere lukinyoikinete jo aikonakin aronis, ekonakis kwape ejaar etelepat ŋol.”

³³ Kosodi kiturur noi ekabaka, kodoka togo loejai orute, komony akiyo: napelosi kinera kwanata, ebe, “Wu ikakoku Abisalom, ikakoku, ikakoku Abisalom! Karai gwai eoŋ atwanit kojari ijo, wu Abisalom, ikakoku, ikakoku!”