Read Ateso 2 Samuel 19 Bible Online

2 Samuel 19 - Ateso bible

2 Samuel 19

¹Aponi kolimokinai Yoab ebe, “Koany emonyi ekabaka ekuudiani Abisalom.”

²Koluor aipikor aibworo mama ejaas ituŋa kere kapaaran kaŋin: naarai kopuput ituŋa ebakai ebe, “ltururwei ekabaka okokuke.”

³Kidaudaununos ituŋa ore kapaaran kaŋin, kwape idaudaunotor ituŋa luirumito ileic naekeriata koile.

⁴ Kimuko ekabaka akonyeneke, komony ekabaka keporoto kaloepol ebe, “Wu ikakoku Abisalom, wu Abisalom, ikakoku, ikakoku!”

⁵Kobu Yoab togo mama ejai ekabaka, kotema atiar, “Itadaka ijo lolo akwes nuka ikejaanakinakakon kere, luapotu kitajarata aijarakon lolo, ka aijar naka ikonidwe lusap ka lupesur, ka aijar naka aŋorokon, ka aijar da naka abusianakon:

⁶Naarai imina ijo lukilaete jo, ilai da lukiminas jo. Naarai ilimo lolo ijo ebe mam ipodo cut ikapolok ka ikejaanakinak; naarai aany eoŋ lolo ebe, arai kejari Abisalom, ka sio da kere katwakito lolo, tiisiyalamikinit ijo noi.

⁷ Aso do konyou, koloma, kitalaka ikejaanakinakakon: naarai eyapoi alimit EJAKAIT ebe arai mam jo ilomari, emamei etuŋanan loiboiete kajo akuare na: ŋin da erono kamakon adepar aronis kere nakidoikinit jo ageun keiditeukon kiton kwana.”

⁸ Kosodi ekabaka anyoun, kiboikin orute. Aponi kolimokinai ituŋa kere ebe, “Koany, iboikin ekabaka orute.” Kopotu ituŋa kere mama ejai ekabaka. Abu Isirael koker ŋinituŋanan owemake.

⁹ Kopegas ituŋa kere anatar atekerin kere nuka Isirael atiar, “Kilaku ekabaka oni kakan naka lukasurupowok, kitajar oni kakan naka Ipilisitian; kwana da aker anyoun kakwap kaneejai Abisalom.

¹⁰Atwaniki Abisalom kojie, lokinyonyoikini akinyet ayait oni. Aso do kanukinyo mam yes ilimunioto akirot ainyakun ekabaka?”

¹¹Kijuka ekabaka Daudi mama ejai Sadok ka Abiatar isasedotin, ebe, “Kolimokis imakio luka Yuda ebe, ‘Kanukinyo iraunotor yesi lukawasia ainyakun ekabaka togoke? Naarai adol akirot naka Isirael kere mama ejai ekabaka, ainyakun ŋes togoke.

¹² Yes ikainacan, yes akoitika, ka akiriŋika; kanukinyo iraunotor yesi lukawasia ainyakun ekabaka?’

¹³ Kolimokis Amasa da ebe, ‘Mam kereka jo irai akoitika ka akiriŋika? Keswamak Edeke eoŋ kwaŋin ka adepar da, arai mam jo iraun ekapolon loka ajore kakonyeneka tiritir aibois naka Yoab.’ ”

¹⁴ Kitukukum itauon luka ituŋa kere luka Yuda, kwape etau loka ediopetuŋanan; kijukasi do mama ejai ekabaka ebe, “Koboŋ, ijo ka ikejaanakinakakon kere.”

¹⁵ Koboŋ ekabaka kobu Yorodan. Kobu Yuda Giligal, alosit airiamakin kekabaka, aikwanun ekabaka koYorodan.

¹⁶ Kisunya Simei okoku loka Gera, Ebenyamit lokerai loka Bakurim, kodok nepepe kiruna luka Yuda airiamakin kekabaka Daudi.

¹⁷ Kejaas ituŋa elukumit luka Benyamin kaŋes, ka Siba ekejaanakinan loka etogo loka Saul, ka odweke itomon ka lukany ka ikekejaanakinak akaisaarei kaŋes; kitoroto Yorodan akonyen nuka ekabaka.

¹⁸Kotubor ataker naerisi aikwaŋar ekal loka ekabaka, aswam da nuitojokit ŋesi, Kibirokin Simei okoku loka Gera akonyen nuka ekabaka naatubunor Yorodan.

¹⁹ Kotema ŋesi ekabaka atiar, “Kinyek ejakaitika aimarakin eoŋ aronis, sirikiitu da epali lokiswamakin ekejaanakinanikon jo kapaaran naalomaria ejakaitika ekabaka koYerusalem, sirikibwaiki ekabaka ŋun otau.

²⁰ Naarai ejeni ekejaanakinanikon ebe Adiak eoŋ: aso koany, abu eoŋ lolo karau losodit kotogo kere loka Yosep alosit airiamakin kejakaitika ekabaka.”

²¹ Konye Koboŋok Abisai okoku loka Seruia ebe, “Mam kereka eario Simei kanu elamia loenyonyoikinit EJAKAIT akinyet?”

²² Kotema Daudi atiar, “Inyoin bo kimariai eoŋ kayes, yes odwe luka Seruia, yes araun lukasurupoka lolo? Eario kereka idiotuŋanan lolo koIsirael? Mam kereka ajeni ebe arai eoŋ lolo ekabaka loka Isirael?”

²³ Kotema ekabaka Simei atiar, “Mam jo itwani.” Kiyapoik ekabaka ŋes.

²⁴ Kobu Mepiboset okoku loka Saul airiamakin kekabaka; mam abu kimadite akejeke karaida abarenit epenekike, karaida ailosit igoeneke, ageun kapaaran naalosio ekabaka aitodol apaaran naaboŋunio ŋesi ore inapakina.

²⁵ Kosodi kanen, naabunio ŋesi Yerusalem airiamakin kekabaka, kotema ekabaka ŋes atiar, “Inyo bo kitikokini jo aupar keoŋ, Mepiboset?”

²⁶Koboŋok ŋesi ebe, “Ekajakait, wu ekabaka, kenalanal eoŋ ekejaanakinanika; naarai abala ekejaanakinanikon ebe, ‘Kopetanak lupetan asigiria, kebwanen, kauparos kekabaka’; naarai eŋwalit ekejaanakinanikon.

²⁷ Konye abu kosabanak ekejaanakinanikon kaneejai ejakaitika ekabaka; konye erai ejakaitika ekabaka kwape emalaika loka Edeke: aso kiswama nuitojokit ijo.

²⁸ Naarai keraas lukokek loka papaka kere kwape lukatwak kakonyen nuka ejakaitika ekabaka: konye ibu ijo kodakak ekejaanakinanikon toma kaŋul luanyamete komesakon. Aso apolou anyoin kijaa keoŋ aiyatakin aimony mama ejai ekabaka?”

²⁹ Kotema ekabaka ŋes atiar, “Kanukinyo iyatakinitor einer akirokon? Abala eoŋ ebe, ‘Kotiakata ijo ka Siba alup.’ ”

³⁰Kotema Mepiboset ekabaka atiar, “Eebo, koyaŋa ŋesi kere, naarai abu ekajakait ekabaka togoke inapakina.”

³¹ Kobu Barisilai Egileadit koRogelim; kotubor Yorodan kekabaka, aiŋarenikin ŋes koYorodan.

³² Kemoionit Barisilai noi, kerai loka ikar akaisakanykauni: abu koinakinite ekabaka inyamat naajaar ŋesi Makanaim; naarai kerai ŋesi etuŋanan loapol noi.

³³Kotema ekabaka Barisilai atiar, “Kadokasi keoŋ, ketani eoŋ jo, koYerusalem.”

³⁴ Kotema Barisilai ekabaka atiar, “Imwaasi ai apaarasia nuka ikar luka aijaraka, tape eoŋ kilosi kekabaka Yerusalem?

³⁵ Arai eoŋ lolo loka ikar akaisakanykauni: apedori kereka atiakun nuejok ka nueroko? Epedori bo ekejaanakinanikon akiir nuanyami ka nuamasi? Apedori bobo akiirar eporoto loka ikiliok lueyeete ka aŋor nueyeete? Aso kanukinyo eraunor ekonikejaanakinan alaŋir mama ejai ekajakait ekabaka?

³⁶Edokari bo ekejaanakinanikon Yorodan kekabaka: kanukinyo karopia ekabaka eoŋ keropit loetia nen?

³⁷ Keŋaiŋait, kisiik ekonikejaanakinan aboŋor bobo, katwanik oreka, ates naka papaka ka totoka, Konye koany, ekejaanakinanikon Cimukam: kodoka ŋesi kejakaitika ekabaka; kiswamak ŋes nuitojokit ijo.”

³⁸Koboŋok ekabaka ebe, “Edokari Cimukam keoŋ, eswamakini ŋes nuitojokit ijo: ŋin da yenikoto ijo kaneajai eoŋ, keswamakini jo ŋin.”

³⁹ Kodokasi ituŋa kere Yorodan, kodoka ekabaka da; konu ekabaka Barisilai, kilipak ŋes arereŋ; koboŋo ŋesi aiboisike.

⁴⁰Kodoka ekabaka kiton Giligal, kodoka Cimukam kaŋes: apotu ituŋa kere luka Yuda ka atutubet naka ituŋa luka Isirael kitodokut ekabaka.

⁴¹ Kosodi koany, kopotu ituŋa kere luka Isirael mama ejai ekabaka, kotemasi ekabaka atiar, “Kanukinyo kekokwarotor iinacanawok ituŋa luka Yuda, aitodokun ekabaka ka lukokaleke Yorodan, ka ituŋa kere luka Daudi kaŋes?”

⁴² Koboŋokis ituŋa kere luka Yuda ituŋa luka Isirael ebe, “Naarai erai ekabaka lokokekikosi: aso kanukinyo inyunyuratar yesi kakiro kaŋun? Kinyam kereka isio luka ekabaka kere? Kiinak kereka isio adioinakinet?”

⁴³ Koboŋokis ituŋa luka Isirael ituŋa luka Yuda atiar, “Atutubeta atomon nuka ekabaka eraas nukosi, ido kijaa isio kanuipu adepar yes kama kaDaudi: kanukinyo kimwanitotor sio, mere ti isio kirai lusodit ainerun ainyakun ekabakawok?” Adedeŋ akiro nuka ituŋa luka Yuda aitelekarit akiro nuka ituŋa luka Isirael.