Read Ateso 2 Samuel 22 Bible Online

2 Samuel 22 - Ateso bible

2 Samuel 22

¹ Kolimok Daudi EJAKAIT akiro nuka ekosio kalo kapaaran naayuunia EJAKAIT ŋes kakan naka lukasurupoke kere, kakan da naka Saul.

² Kotema atiar, “EJAKAIT ŋes atiibaka, ka akabwas, ekayuunanika, lokaŋ obe;

³ Edeke loka atiibaka, amunokina ŋes; Ebukuka, amumwarat naka akaitajario, Akaŋopis naicelelei, neakereanari; Eketaiaranika, ijo kitajari eoŋ kotoma akale.

⁴Eworoi eoŋ EJAKAIT, loibusakinit aiturio; Ketajareneneo kwaŋin kama kalukasurupoka.

⁵“Karapiasi eoŋ akailan nuka atwanare, Ketukuriana eoŋ akalele nuka numam ayoŋit Edeke.

⁶Kerimorito aunoi nuka Okatwak: Kepoka iica luka atwanare.

⁷ “Keworo EJAKAIT kotoma ocanika, Eebo, keworo mama ejai Edekeka: Abu kiira ekaporoto koyekaluke, Kodolok aimonyoka akiike.

⁸ “Kosodi kijaŋijaŋa akwap, komarani, Kilokilokos da apeteta nuka akui, Kiianiianas, naarai anyunyura ŋesi.

⁹ Kisusumau apuru kokumesike, Kidonyo akim nakelomuni kaitukuke: Kisinep atotol.

¹⁰ Kitukukum akuj, kodok; Kojai amuton naejesi ŋaŋ kwap kakejeke.

¹¹ Kibwanen ekerubi, koporo: Eebo, aponi koanyunai kabebenoka nuka ekwam.

¹²Kituluo amuton iweman luiswaparito ŋes, Atukon nuka akipi, idouon luitolimakinito luka akui.

¹³Kanuka amwekimwek naka akonyeneke, Kineput atotol nuka akim.

¹⁴ Kiretu da EJAKAIT kotoma akuj, Kolimo ŋol loejai kuju kakuj ekeporoto.

¹⁵ Koguma ikekoioi, kisiarisiara; Aimiliaunet, kisiyaloŋoŋ kes.

¹⁶Kotakanutu da alelesia nuka aŋolol, Kideleleut apeteta nuka akwapin, Kanuka airetakin naka EJAKAIT, Kanuka akutun naka eiyeŋane loka ekumesike.

¹⁷“Abu kijuk kokuju, kayaŋa; Kegalala kakipi nuipu.

¹⁸Abu kayu kama kalokasurupoka lokagogoŋ, Kama kakesi da lukalaito; Naarai ketelekarito eoŋ kagogoŋ.

¹⁹Kabunokis kapaaran naka epolaka; Konye EJAKAIT ŋes ketogogoŋi.

²⁰ Ido abu ketoloma aibois naelal; Abu kayu eoŋ naarai kesiyalamikinit.

²¹“Karop EJAKAIT eoŋ kwape kejaar akadolit; Katacak kwape ejaar alaunite naka akaninika.

²²Naarai abu karic irotin luka EJAKAIT, Ido mam abu kejerukana kama ejai Ekadeke.

²³ Naarai ajaas itubesiake kere kakonyeneka, Mam abu kanyou da kaneejaas ikisilake.

²⁴ Abu karai loadolit kamake, Abu kedara kenyek aswam numam adolit.

²⁵Ŋes katacakinia EJAKAIT kwape ejaar akadolit, Kwape ejaar alauniteka kakonyeneke.

²⁶ “Mama ejai yeniketimon itodianakini aitim: Mama ejai yenikadoliton da itodianakini adolit;

²⁷ Mama ejai yenesegara itodianakini aseg; Ido mama ejai yenetumaana itodianakini airebokinet.

²⁸ Naarai itajari ituŋa luemwaŋitai; Konye esesenete akonikonye lueomiara, tetere itisili kes.

²⁹Naarai irai ijo atalaka, wu EJAKAIT: Itacauni EJAKAIT akamuton.

³⁰Naarai kanukon arukitor ajore; Ido kanuka aiŋarakinio naka Edekeka elami abwas.

³¹ Konye Edeke, edolit ekerot; Egimor akirot naka EJAKAIT; Ŋol ŋes ebuku loka ŋul kere luemunos ŋes.

³² “Naarai iŋai bo Edeke dimarai EJAKAIT? Iŋai bo da atiiba dimarai Edekewok?

³³ Edeke ŋes akabwas naegogoŋ: Iŋarenikini ŋesi ikadoliton.

³⁴ Ituluori akekeje kwape nuka amiam: Ido kebwaikini eoŋ aiboisioka nukokuju.

³⁵Isisianakini akakanin ejie; Tetere ikesete akakanin akabwa naka aikomon.

³⁶Kiinak eoŋ da ebuku loka akoniitajar: Ketopoloo eoŋ aiyapeperakon.

³⁷Kitalalik eoŋ neetorit, Mam ejurusiaros akatitiban.

³⁸Ebwapit lukasurupoka, amudia kes; Mam abu kabon aitodol neamudiarotor.

³⁹Adau kes, eeumueum kes komam epedorete anyoun: Eebo, kibirokinos kwap akejeka.

⁴⁰Naarai ibu kitanapik eoŋ agogoŋ najiis; Itukukum ŋul lukanyoikinete.

⁴¹Isibonik lukasurupoka ikecepuran neajai eoŋ, Tetere amudiari lukalaito.

⁴² Apotu kosesenata, konye komameun yenitajari: Mama ejai EJAKAIT, konye mam abu Koboŋok.

⁴³Kasodi kepudapud kes bala apua nuka akwap, Kecakacak kes bala erit loka irotin, kesiarak kes.

⁴⁴ “Ibu da koyu eoŋ kotoma aŋolopa naka ikatuŋa; Kituluo ekeŋarenon loka atekerin: Kejaanakinete eoŋ ituŋa lumam lem ajeni.

⁴⁵Kanonokikinete imo: Atipet kepuput nukaŋ karimarete.

⁴⁶ Eoliorete imo, Elomunete emaranete kaiboisiokec nuŋopis.

⁴⁷ “Ejari EJAKAIT: kituritete atiibaka; Kitopolooritete Edeke loka atiiba naka akaitajario.

⁴⁸ Ŋes Edeke lokenyanakini, Ketapatanikini eoŋ ituŋa.

⁴⁹Kaiyanari eoŋ kama ejaas lukasurupoka; Eebo, kidaka eoŋ kuju kaŋul kalukanyoikinete: Kiyu eoŋ kama ejai ituŋanan yenikakaje.

⁵⁰ “Ŋes kemalaenena jo kotoma atekerin, wu EJAKAIT, Ayeenenei aiturit ekonikiror.

⁵¹Einakini ekabakake aitajar naepol; Itodianakini da nuka asianut-nakamin lokinyonyoikitonoke akinyet, Daudi ka akeur ikar kere.”