Read Ateso 2 Samuel 23 Bible Online

2 Samuel 23 - Ateso bible

2 Samuel 23

¹Nu kes akiro nukawasia nuka Daudi. Abu Daudi okoku loka Yese, Etuŋanan da loekeunitai kuju, Loenyonyoikinit Edeke loka Yakob akinyet, Ekayoot da loitojokitai koIsirael kobala ebe:

² “Kiner emoyo loka EJAKAIT kotomakaŋ, Kojaun akirotoke anaiepeka.

³ Abala Edeke loka Isirael, Kiner Atiiba naka Isirael keoŋ ebe, Ŋol loeyait ituŋa kadolit, Loeyait kayoŋit naka Edeke.

⁴ Eraun ŋol kwape aica naka tupuruc kelom akoloŋ: Atupuruc naemameatar idouon; Kelom amel kokwap, Kecau kipioror kikwaa akiru.

⁵ Abeit mam ekakek esubit kwaŋin mama ejai Edeke; Konye do kitutuk ŋesi keoŋ aitutuket namam edaun, Naitemokino kakiro kere, naitieasitai; Naarai erai aitajarioka kere, ka eimielika kere, Karaida mam itopoloi.

⁶Konye eraunos lumam eyoŋito Edeke kere kwape ikukwa lueremorio, Naarai mam epedorio aitiŋ kakan: Konye etuŋanan loetini kes

⁷Kibusakinit akapakin kasuat ka amorok naka akwara; Icweikinio kes cut kakim kaiboisikec.”

⁸Lu kes ikiroria luka ituŋa lukirigin lukejaas kaDaudi: Yoseb-basebet Etakemonit, ejakait loka ikapolok; kodaku ŋol akekwara asurokin akwat akanykauni luaari atipet.

⁹ Kotupite Eleasar okoku loka Dodai okoku loka Ekokait, ediopet kotuŋa iuni lukirigin luka Daudi, nakemwanitotor kesi Ipilisitian lukejaas ŋina etukokina ejie, kolosito ituŋa luka Isirael:

¹⁰Konyou ŋesi, kodany Ipilisitian aitodol neetegia akekan, kimakakin akekan okileŋ: kijaik EJAKAIT aipikor naepol kapaaran kaŋin; koboŋut ituŋa kodumut ebe asal aijoreun bon.

¹¹ Kotupite Sama okoku loka Agee Ekararit. Kotukonokinos Ipilisitian korioŋet, nekejai emanikor loeleleba epone ece loka akima; kokerata ituŋa kaneajaas Ipilisitian.

¹²Konye kobwo ŋol kokidiŋ omanikor, koiiu ŋes, koar Ipilisitian: kijaik EJAKAIT aipikor naepol.

¹³ Kikokororos iuni kotoma akaisauni lukapolok, kopotu mama ejai Daudi kapak naka aisak, neejai abua naka Adulam; kidukurite erioŋet loka Ipilisitian aditot naka Repaim.

¹⁴ Kejai Daudi toma abwas, kejai abwas naka iserikalei luka Ipilisitian Bet-lekem.

¹⁵Kimiela Daudi, kotema atiar, “Arai kainak idiotuŋanan eoŋ akipi aimat nuka atan naka Bet-lekem, naidunyas kerute!”

¹⁶Kocila ituŋa luuni lukirigin ajore naka Ipilisitian, kowokut akipi katan naka Bet-lekem, naidunyas kerute, koyaŋas, koinutu Daudi: konye koŋer aimat, konye kiwela mama ejai EJAKAIT.

¹⁷ Kotema atiar, “Madi akuj eoŋ aswam ŋin, wu EJAKAIT: amasi kereka aokot nuka ituŋa lualosito akaŋas naka aijarakec?” Kanuka ŋun koŋer aimat. Kiswamata ituŋa luuni lukirigin akiro ŋun.

¹⁸ Kerai Abisai onace loka Yoab, okoku loka Seruia, lokapolon loka luuni, Kodaku ŋesi akwarake asurokin akwat auni, koar kes, kodum ekiror kotoma luuni.

¹⁹Mam ŋes etopolooritai kouni? Kanuka ŋun kitaraunai ekapolonikec: konye mam abu kodolok luuni lusodit.

²⁰ Benaia da okoku loka Yekoiada, okoku loka etuŋanan loetitiŋ loka Kabuseel, loabu kiswama aswamisio nukagogoŋ, abu ŋesi koar odwe iarei luka Ariel loka Moab: kijesar da koar eŋatuny kokidiŋ aipany kapak naka akako:

²¹ Koar ŋesi Emisiriat, etuŋanan lotemel: kitiŋite Emisiriat akwara kakanike; konye kolot ŋol mama ejai ŋesi kebela, kodem akwara kakan naka Emisiriat, koar ŋes kakwarake elopet.

²²Kiswama Benaia okoku loka Yekoiada akiro ŋun, kodum ekiror kotuŋa luuni lukirigin.

²³ Kitopolooritete ŋes adepar akaisauni, konye mam abu kodolok luuni lusodit. Kodakak Daudi ŋes ayait ikedarakake.

²⁴ Kerai Asakel onace loka Yoab ediopet kotoma akaisauni; Elanan okoku loka Dodo loka Bet-lekem;

²⁵ Sama Ekarodit, Elika Ekarodit;

²⁶Keles Epalitit, Ira okoku loka Ikkes Etekoit;

²⁷Abieser Enatotait, Mebunai Ekusatit;

²⁸Salumon Ekokait, Makarai Enetopatit;

²⁹Keleb okoku loka Baana Enetopatit, Itai okoku loka Ribai loka Gibea loka idwe luka Benyamin;

³⁰ Benaia Epiratonit, Kidai loka aguurun nuka Gaas;

³¹Abi-alibon Erabatait, Asumabet Ebarumit;

³²Eliaba Esaalibonit, odwe luka Yasen, Yonatan;

³³Sama Ekararit, Akiam okoku loka Sarar Erarait;

³⁴Elipelet okoku loka Akasibai, okoku loka Emaakatit, Eliam okoku loka Akitopel Egilonit;

³⁵Kesero Ekaramelit, Paarai Erabait;

³⁶Igal okoku loka Natan loka Soba, Bani Egadit;

³⁷Selek Emonait, Nakarai Ebeerotit, luadakito lujiis luka Yoab okoku loka Seruia;

³⁸ Ira Etirit, Gareb Etitit;

³⁹ Uria Ekitit: akaisauni ka lukanykaarei kere.