Read Ateso 2 Samuel 6 Bible Online

2 Samuel 6 - Ateso bible

2 Samuel 6

¹Kotukonok bobo Daudi ituŋa kere luseuna luka Isirael, ilukumin akaisauni.

² Konyou Daudi, kolot nepepe kituŋa kere luajaas kaŋes, anyoun koBaale-Yuda, ayaun kanen asaduku naka Edeke, naenyaritai Ekiror, ŋes ekiror loka EJAKAIT loka ajoresio loiboikin okerubin.

³ Kibwaikis asaduku naka Edeke agali nakitetet, kitolomut kotogo loka Abinadab loajai oukot: kireŋeata odwe luka Abinadab Usa ka Akio agali ŋin nakitetet.

⁴Kitolomut kotogo loka Abinadab loajai oukot kasaduku naka Edeke: kiŋarenik Akio asaduku.

⁵Koram Daudi ka ekek kere loka Isirael iponesio kere luka lueruos lueswamatai kakito, ka adeudeun, ka isabulin, ka isiman, ka ikacwi, ka aisinin nueruosi kakonyen nuka EJAKAIT.

⁶ Nakedolioto kesi opejal loka Nakon, korio Usa akekan neejai asaduku naka Edeke, kikam ŋes; naarai apotu kiguikis imoŋin.

⁷ Kinep anyunyura naka EJAKAIT aluikin Usa; kinom Edeke ŋes kanuka aibucareteke; kotwanik nen eiduny kasaduku naka Edeke.

⁸Kokadak Daudi, naarai acil EJAKAIT Usa: komaik aibois ŋin Peres-Usa,[2] kiton lolo.

⁹ Kokurianar Daudi EJAKAIT kapaaran kaŋin; kotema atiar, “Ikonakini ai asaduku naka EJAKAIT ebuni mama ajai?”

¹⁰Koŋer Daudi alemar asaduku naka EJAKAIT ayaun ore loka Daudi; konye kodaka Daudi ŋes awai togo loka Obed-edom Egitit.

¹¹ Kosalak asaduku naka EJAKAIT togo loka Obed-edom Egitit ilapio iuni: kisirereŋ EJAKAIT Obed-edom ka eketogo kere.

¹²Kolimokinai ekabaka Daudi ebe, “Esireren EJAKAIT etogo loka Obededom, ka lukejaatar kaŋes kere, kanuka asaduku naka Edeke.” Kolot Daudi koyau asaduku naka Edeke kotogo loka Obed-edom kitoloma ore loka Daudi kaiyalama.

¹³ Kojaun kwanata ebe, nakelosioto ŋul luadakete asaduku naka EJAKAIT ailameta akanykape, koinak emoŋ ka yenikasiepai.

¹⁴ Kikosi Daudi kakonyen nuka EJAKAIT kagogoŋuke kere; konap Daudi epod loka ebaputa.

¹⁵Kwaŋin koyau Daudi ka ekek kere loka Isirael asaduku naka EJAKAIT, keibwoŋ, ka eporoto loka arupepe.

¹⁶Kojaun kwanata ebe, kelom asaduku naka EJAKAIT ore loka Daudi, koŋolia Mikal akoku naka Saul kadirisa, koany ekabaka Daudi esomanari ikosie kakonyen nuka EJAKAIT; komwaŋ ŋes kotauke.

¹⁷ Kitolomut asaduku naka EJAKAIT, kibwaikis aiboisike, kidiŋ owema loebubukinit Daudi kanukeŋ: koinak Daudi ainakineta nuicweio ka ainakineta nuka ainapakin kakonyen nuka EJAKAIT.

¹⁸Kedau Daudi ainakin ainakinet naicweio ka ainakineta nuka ainapakin, kilipak ituŋa arereŋ kokiror loka EJAKAIT loka ajoresio.

¹⁹ Kokorak ituŋa kere, ŋes ekodet kere loka Isirael, ikiliok ka aŋor da, ŋinituŋanan emugati ka aturosit naka akiriŋ, ka aluŋuret naka imusabibun luaokito. Kwaŋin koloto ituŋa kere ŋinituŋanan togoke.

²⁰ Kosodi Daudi aboŋor ailipakin lukokaleke arereŋ, Kolom Mikal akoku naka Saul airiamakin kaŋes, kotema atiar, “Ibus ca lolo ekabaka loka Isirael, loetodiar lolo kakonyen nuka akejaanakinak nuka ikejaanakinakake, kwape itodiaror ediopet kotuŋa luutai komam ileicikinit!”

²¹ Kotema Daudi Mikal atiar, “Ajai akonyen nuka EJAKAIT, lokaseuni eoŋ aitelekar papakon, ka ekekike kere, adakakin eoŋ araun ekapolon ayait ituŋa luka EJAKAIT, ayait Isirael, ŋes ekosioo eoŋ akonyen nuka EJAKAIT.

²²Ido eyatakini bobo araun lomam kayonitai, loasilior kakonyeneka; konye kayonete eoŋ akejaanakinak ŋun nuilimit ijo.”

²³ Amamei Mikal akoku naka Saul ikoku kiton apaaran naatwania.